Read Mizo Lushai Genesis 36 Bible Online

Genesis 36 - Mizo Lushai bible

Genesis 36

¹Hei hi Esauva thlahte chanchin chhuina a ni; ani hi Edoma tih a ni bawk.

²Esauva chuan hêng Kanan hmeichhiate hi nupuiah a nei a: Hit mi Elona fanu Adaii te, Hiv mi Zibeona fapa Ana fanu, Oholibami te,

³Ismaela fanu Nebaiota farnu Basemathi te hi.

⁴Adaii chuan Esauva chu fapa Elifaza a hrinsak a; Basemathiin Reuela a hring a;

⁵Oholibami chuan Jeusa te, Jalama te, Kora te a hring a. Khîng khi Esauva fapa, Kanan rama piangte chu an ni.

⁶Esauva chuan a nupui te, a fanu leh fapa te, an chhûng zînga awm ve zawng zawng te, a ran vulh, ran chi hrang hrang te, Kanan rama sum leh pai a neih tâk te chu chhawmin, a nau Jakoba dîp lo tûrin, Seir tlângramah a pêm ta a.

⁷An neihnun dun tâk êm avângin an awm ho hlei thei tawh lo a ni, an mikhualna ram chuan an ran tlatna tûr a daih tawh ngang lo.

⁸Tichuan, Esauva chu Seir tlângramah chuan a awm ta a. Esauva chu Edoma tih a ni bawk.

⁹Seir tlângrama Edom-ho thlahtu Esauva thlahte chanchin chu hetiang hi a ni:

¹⁰Hêng hi Esauva fate chu an ni; Elifaza, Esauva nupui Adaii hrin; Reuela, Esauva nupui Basemathi hrin.

¹¹Elifaza chuan fapa - Temana te, Omara te, Zefoa te, Gatama te, Kenaza te a nei a.

¹²Esauva fa Elifaza chuan hmei, Timnai a nei a; chu chuan Elifaza chu fapa Amaleka a hrinsak a. Chûng chu Esauva nupui Adaii thlahte chu an ni.

¹³Hêng hi Reuela fate chu an ni: Nahata te, Zera te, Sama te, Miza te: chûng chu Esauva nupui Basemathi thlahte chu an ni.

¹⁴Esauva nupui Oholibami, Zibeona fapa Ana fanu chuan Esauva chu fapa pathum - Jeusa te, Jalama te, Kora te a hrinsak a.

¹⁵Esauva thlah chi hrang hrangte chu hêng hi an ni: Esauva fa tîr Elifaza thlahte: Teman-ho te, Omar-ho te, Zefo-ho te, Kenaz-ho te,

¹⁶Kora-ho te, Gatam-ho te leh Amalek-ho te hi an ni. Khîng khi Elifaza chi, Edom rama awm, Adaii thlahte an ni.

¹⁷Esauva fa Reuela thlahte chu hêng hi an ni: Nahat-ho te, Zera-ho te, Sama-ho te leh Miza-ho te; khîng khi Reuela chi Edom rama awm, Esauva nupui Basemathi thlahte chu an ni.

¹⁸Esauva nupui Oholibami thlahte chu hênghote hi an ni: Jeusa chi te, Jalam chi te, Zera chi te, khîngho khi Ana fanu Oholibami, Esauva nupui thlahte an ni.

¹⁹Chûng chu Esauva, Edoma an tih bawk, thlah chi hrang hrang hmingte chu a ni.

²⁰He rama lo awm sa Hor mi, Seira thlahte chu hêng hi an ni: Lotana te, Sobala te, Zibeona te, Ana te,

²¹Disona te, Ezera te, Disana te, Edom rama Hor hnam Seira thlahte chu khîngte khi an ni.

²²Lotana fate chu Hora leh Hemana an ni. Lotana chuan farnu Timnai a nei bawk.

²³Sobalan fa hêngte hi a nei: Alvana te, Manahata te, Ebala te, Zefoa te, Onama te.

²⁴Zibeonan fapa pahnih Aia leh Ana a nei. Ana hi a ni, a pa Zibeona sabengtung thlaha thlalêra tuihna hmu chhuaktu chu.

²⁵Ana chuan fapa Disona leh fanu Oholibami a nei.

²⁶Disona chuan fapa Hemdana te, Esbana te, Ithrana te, Kherana te a nei a.

²⁷Ezera chuan fapa pathum Bilhana te, Zavana te, Akana te a nei a.

²⁸Disana chuan fapa - Uza leh Arana a nei a.

²⁹Lotana chi te, Sobal chi te, Zibeon chi te, Ana chi te,

³⁰Dison chi te, Ezer chi te, Disan chi te hi Hor hnam an ni. Seir rama Hor hnam awmte chu a chi chiin khîngte khi an ni.

³¹Israel rama lal an awm hmain hêngte hi Edom rama lal awm tawhte chu an ni.

³²Beora fapa Bela chu Edom ram lalah a ṭang a, a khawpui hming chu Dinhaba a ni.

³³Bela a thih chuan Bozra khaw mi Zera fapa Jobaba chuan a ai a awh a.

³⁴Jobaba a thih chuan Teman-ho rama mi Husaman a ai a awh a.

³⁵Husama a han thih ve chuan Bedada fapa Hadada chu a aiawhin a lal a, ani hi Moab rama Midian-ho hnehtu kha a ni; a khawpui hming chu Avit a ni.

³⁶Hadada a thih chuan Masreka mi Samlaa chu a aiawhin a lal a.

³⁷Samlaa a thih chuan Rehobot khaw awmna Luipui an tih aṭanga lo kal Saula chuan a ai a rawn awh a.

³⁸Saula a thih chuan Akbora fapa Baal-hanana chu a aiawhin a lal a,

³⁹a khawpui hming chu Pau a ni. A nupui chu Mehetabeli a ni a, Mezahaba fa Matredi fanu a ni.

⁴⁰Hêng chi, Timna chi te, Alva chi te, Jethet chi te,

⁴¹Oholibam chi te, Ela chi te, Pinon chi te,

⁴²Kenaz chi te, Teman chi te, Mibzar chi te,

⁴³Magdiel chi te, Iram chi te hi Esauva thlahte an ni. An awmna bial chuan a awmte chi hming chu a pu ṭheuh zêl a. Chûng chu Esauva thlah, Edom mi, Edom rama chêngte chu an ni.