Read Mizo Lushai Genesis 37 Bible Online

Genesis 37 - Mizo Lushai bible

Genesis 37

¹Jakoba chu a pa mikhualna ram, Kanan ramah chuan a awm ta a. Hei hi Jakoba chhûngte chanchin chu a ni.

²Kum sâwm leh pasarih a tlinin Josefa chuan a ute berâm vênpuiin a pa hmei Bilhaii leh Zilpaii fate chu a zui ve ṭhîn a, an chanchin ṭha lo a pa hnênah a rawn thlen a.

³Israela chuan Josefa chu a tar lam fa a nih avângin a fa dang zawng aiin a duat zâwk a; kawrfual mawi tak a ṭhuisak a.

⁴An pa chuan a fa dang zawng zawng aiin ani chu a ngaina zâwk tih a ute chuan an hriatin an haw ta êm êm a, ṭawng ṭha pawhin an be duh ta lo hial a.

⁵Vawi khat chu Josefa chuan mumang a nei a, a ute chu a hrilh a, chumi avâng chuan an haw zual sauh va.

⁶An hnênah chuan, “Ka mumang hi lo ngaithla teh u.

⁷Lovah buhphal kan lo têl a, ka buhphal têl chu a ding hlut a, in buhphal têlte chuan an rawn din hual a, chibai bûkin zu rawn kûn a!” a ti a.

⁸A ute chuan, “Nang tehchai hian kan chungah ro i rêl ang maw? Kan hotu i ni vei ang maw?” an ti a; a mumang a sawi chu an huat lehzualna chhan a ni.

⁹Mumang dang a nei leh a, a ute chu a hrilh leh bawk a: “Ngai teh u, mumang dang ka nei leh asin. Tûn ṭuma ka mumangah chuan ni te, thla te leh arsi sâwm leh pakhatte khi ka hmaah lo zu kûn a!” a ti a.

¹⁰A pa pawh a hrilh a, ani chuan a lo zilh a, “I mumang hi engtihna nge ni ngai! Kei leh i nu te, i ute hi i hmaah lei siin kan la kûn ang maw!” a ti a.

¹¹A ûte chu a chungah an lungni lo hle a, a pa erawh chuan a ngaihtuah neuh neuh ṭhîn a.

¹²Ni khat chu a ute chuan an pa berâm Sekem-ah an va thlah a.

¹³Israela chuan Josefa hnênah, “I uten Sekem-ah berâm an thlah kha. Ti teh, an hnênah ka tîr teh ang che,” a ti a. Ani chuan, “Mi tîr ta che,” a ti a.

¹⁴“Kal ta la, i ute leh an berâmte chu eng angin nge an awm va chian la, min rawn hrilh leh ang che,” a ti a. Hebron ruam aṭang chuan a tîr chhuak a, Sekem lam chu a pan ta a.

¹⁵Phûla a tei a tei lai chuan mi pakhat a lo kal a, “Eng nge i zawn?” a ti a.

¹⁶Ani chuan, “Ka ute ka zawng a ni, Khawiah nge berâm an thlah i hre lo maw?” a ti a.

¹⁷Ani chuan, “Heta ṭanga an insawn dâwn khân, ‘Dothan lamah i kal ang u,’ an ti ni âwmin ka hria e,” a ti a. Tichuan, Josefa chuan a ute chu a ûmzui a, Dathan-ah chuan a va ûm phâk a.

¹⁸Hla fea a la awm laiin a ute chuan an lo hmu a, a lo thlen hnaih hma chuan tihhlum zai an lo rêl a.

¹⁹“En teh u, mumang neia a lo kal saw.

²⁰Engah nge kan thah mai loh vâng? Khurah kan paih ang a, sa-in a seh a ni kan ti mai tûr alâwm. A mumang kha eng meuh nge a nih phah dâwn kan hre mai ang,” an inti a.

²¹Chu chu Reubenan a lo hria a, an kut ata chhan chhuah a tum a, “A thah zawng i that êm lo vang u. Thisen zawng chhuah teh suh u.

²²Saw lai thlalêra khurah sâwn i thlâk mai ang u. Nangni meuh chuan kut thlâk lo hrâm teh u,” a ti a; an kut ata chhan chhuaha, an pa hnêna hawtîr a tum rilru a ni.

²³Josefa a lo thlen chuan a ute chuan a kawr hâk lai, a kawrfual mawi takte nên chuan an hlihsak a,

²⁴an man a, khurah an thlâk ta a. Khurah chuan eng mah a awm lo, tui tlêm pawh a awm hauh lo.

²⁵Tin, chaw an fâk lai chuan an han thlîr a, Ismael-ho, sanghâwngsei rual nên, Gilead aṭanga lo kal an hmu a, beraw te, thinghnai damdawi te, Mura te an phur a, Aigupta ramah an chhukpui dâwn a ni.

²⁶Juda chuan a unaute hnênah, “Kan nau hi i that lo vang u, kan thah a nih thu zêp bo thei pawh ni ila eng nge kan tân hlâwkna?

²⁷Ti rawh u, Ismael-ho hnênah i hralh mai ang u. Keimahni êm chuan kan nau, kan thisen zawmpui ngei chungah zawng kut i thlâk lo vang u,” a ti a. An unauza chuan an remti tlâng ta a.

²⁸Chutih chhûng chuan Midian sumdâwng rual an lo kal a. Khur aṭang chuan Josefa chu an khai chhuak a, Ismael mite hnênah tangka sawmhnihin an hralh a. Josefa chu Aigupta ramah an hruai thla ta a.

²⁹Reubena chu khurah chuan a va kal a, Josefa chu a lo awm tawh si lo va, a puan a pawtthlêr a,

³⁰a unaute hnênah chuan a lo kîr a, “Ka nau a bo ta, engtin nge kan tih tâk ang?” a ti a.

³¹Josefa kawrfual mawi chu an la a, kêltê an talh a, a kawr chu thisenah chuan an hnim a.

³²Kawrfual chu an pa hnênah an hâwn a, “Hei hi kan chhar ngawt a, i fapa kawr kha a ni nge ni lo en chiang teh,” an ti a.

³³A lo hre mai a, “Ka fapa kawr zu nia le! Ramsain a seh a ni phawt ang. Josefa hi ramsa kutah a thi ta a nih hi,” a ti a.

³⁴Jakoba chuan a puan a pawtthlêr a, saiip a vêng a, ni rei tak chhûng a fapa chu a sûn a.

³⁵A fapa leh a fanu zawng zawng chuan hnem an tum a; mahse, hnem rual a ni lo. “Hnem mi ka ni lo, lusûnin Seol-ah ka fa hnênah ka liam dâwn e,” a ti a. Chutiang chuan a pa chu amah ngaiin a ṭap ṭhîn a.

³⁶Chutih chhûng chuan Midian-ho khân Josefa chu Aigupta ramah an kalpui a, Farawa hmaa milian Potifara hnênah an hralh a. Ani chu vêngtu pâwla hotu ber a ni.