Read Mizo Lushai Genesis 38 Bible Online

Genesis 38 - Mizo Lushai bible

Genesis 38

¹Chutih lai vêl chuan Juda chuan a unaute chu a kalsan a, mi pakhat, Adulam mi Hira chu a zu kawp a.

²Juda chuan Sua fanu nula chu a hmu a, nupuiah a nei ta a.

³Nau a pai a, fapa a hrinsak a, a hmingah Era a sa a.

⁴Nau a pai leh a, fapa a hring a, a nu chuan a hmingah Onana a sa a.

⁵Fa dang a hring leh a, a hmingah Sela a sa a; chu mi pian lai chuan Juda chu Khezib khuaah a awm a.

⁶Juda chuan a fa tîr Era chu nupui Tamari a neihsak a.

⁷Juda fa tîr Era chu LALPA hmuhin a sual hle a, LALPA chuan a tihlum ta a.

⁸Juda chuan Onana hnênah, “I u nupui hi pâwl teh, pasalte nau tih tûr chu tihsak la, i u tân chi thlahsak rawh,” a ti a.

⁹Onana chuan chi thlah tûr chu ama fa a ni dâwn lo tih a hria a; a u nupui a pâwl apiangin a u tân chi a thlahsak lohna tûrin a chi chu leiah a titla ṭhîn a.

¹⁰A thiltih chu LALPA ṭha tih loh zâwng tak a ni a, a tihlum ve ta mai a.

¹¹Juda chuan a monu Tamari hnênah, “Ka fapa Sela hi a puitlin hma chu in in lamah pasal nei lovin va awm tawh,” a ti a; Sela pawh chu a ûte angin a thi ve mai ang tih a hlau a ni. Tamari chu a pate in lamah chuan a haw ta a.

¹²Rei fe hnuah chuan Sua fanu, Juda nupui chu a thi a. Lusûn hun bi a ral hnu chuan a ṭhianpa Adulam mi Hira nên chuan Timna khuaah berâm hmul mêt tûrin an chho va.

¹³Miin Tamari chu, “I pasala pa chu berâm hmul mêt tûrin Timna khuaah a lo chho dâwn,” tiin an hrilh a.

¹⁴A lusûn thawmhnaw chu a hlîp a, a hmêl hriat theih loh tûrin hmai khuhnain a intuam tlat a, Timna khaw kawnga kulh kawngah chuan a lo ṭhu a; Sela chu a puitling tawh si a, a pa chuan nupuiah a neihtîr lo zo ta a ni tih a hria a ni.

¹⁵Juda chuan ani chu a hmu a, a hmai a khuh tlat avângin nawhchizuar emaw a ti a:

¹⁶kawng sîra a ṭhu chu a pan a, “Ti teh, i mu dûn ang,” a ti a, a monu kha a ni tih reng a hre lo. “Min mutpui manah eng nge min pêk ang?” a ti a.

¹⁷“Ka ran rual zînga kêl notê ka pe ang che,” a ti a. Ani chuan a chhâng a, “Min rawn pêk hmain eng emaw hrên tûr dahkham i nei tûr a ni,” a ti a.

¹⁸“Eng nge dahkham ka pêk ang che?” a ti a. Ani chuan, “I hming nemna awrh leh i tiang kha le,” a ti a. Chûng chu a pe a, a mutpui a, nau a pai ta a.

¹⁹Tin, a tho va, a inkhuhna puan chu a hlîp a, a lusûn thuamhnaw chu a inbel leh ta a.

²⁰Juda chuan a dahkham la kîr tûrin a ṭhian Adulam mi Hira chu kêltê kengin hmeichhe hnênah chuan a tîr a; a va hmu zo lo va.

²¹Chuta mite hnênah chuan, “Enaim kawng sîra hmeichhe inkhuh awm ṭhîn kha khaw nge a awm tâk?” a ti a. Anni chuan, “Chutiang hmeichhia hetah an awm ngai lo,” an ti a.

²²Juda hnênah chuan a lo kîr a, “Ka hmu zo hauh lo mai. Khuaa mite pawh ka zâwt a, ‘chutiang hmeichhe inkhuh ṭhîn an awm ngai lo,’ an ti asin,” a ti a.

²³Juda chuan, “Kan dahkham chu nei hlen mai rawh se; mi nuihzatbûr kan ni mai dâwn alâwm. Ka tiam angin kêltê chu kei chuan ka pe ngei a, ani chu i va hmu si lo va le,” a ti a.

²⁴Thla thum vêl hnuah chuan Juda chu, “I monu Tamari chuan tlangvâl a nei a, sâwn a pai asin,” tiin an hrilh a. “Kai chhuak ula, hâl hlum rawh u,” a ti khu khu a.

²⁵An kaih chhuah lai chuan a pasala pa hnênah Tamari chuan, “Hêng neitu fa hi a ni ka pai; hêng hming nemna awrh leh tiangte hi tu ta nge lo en teh se,” tiin mi a tîr a.

²⁶Juda chuan a lo hre mai a, “Kei aiin thil a tidik zâwk a ni; ka fapa Sela hi ka neihtîr ta si lo va,” a ti a. Ani chu a pâwl leh ngai tawh lo.

²⁷Nau hrin a lo hun chuan phîr a pai a lo ni a.

²⁸A han hrin dâwn chuan pakhat bân a lo lang a, nau chhartu chuan bân lo lang chu piang hmasa tih hriat nân la sen a buntîr a.

²⁹A bân chu a pil leh a, a pakhat zâwk chu a lo chhuak ta a. Nau chhartu chuan, “Nangma thuin i lo chhuak ta mai a ni maw,” a ti a, a hmingah Pereza a sa a.

³⁰La sen bun zâwk pawh chu a lo piang a, a hmingah Zera a sa a.