Read Mizo Lushai Genesis 4 Bible Online

Genesis 4 - Mizo Lushai bible

Genesis 4

¹Adama chuan a nupui Evi chu a pâwl a, nau a pai a; Kaina a hring a, “LALPA zârah fapa ka nei ta,” a ti a.

²A nau Abela chu a hring leh a. Abela chuan berâm a vulh a, Kaina chuan lo a nei a.

³Eng emawti hnuah chuan Kaina chuan a lova thlai thar chu LALPA hnêna thilhlan atân a rawn la a.

⁴Abela pawh chuan a berâmno piang hmasa zînga mi a rawn la a, a sa ṭha lai ber chu a hlan a. LALPA chuan Abela leh a thilhlan chu a lo lâwm a.

⁵Kaina chungah leh a thilhlanah chuan a lâwm lo. Kaina chu a thin a ur a, a hmêl a dur ta khup a.

⁶LALPA chuan Kaina hnênah, “Engati nge i thin a ura, i hmêl a dur tâk le?

⁷Thil ṭha ti la, i hmêl pawh a hlim ang chu. Thil ṭha i tih loh avângin sual chuan kawngkaah nghâkhlel takin a châng reng che a ni; mahse, i hneh tûr a ni asin,” a ti a.

⁸Kaina chuan a nau Abela hnênah, “I feh ang hmiang,” a ti a. Lo an thlen chuan Kaina chuan a nau Abela chu a bei a, a that ta mai a.

⁹ LALPA chuan Kaina hnênah, “I nau Abela kha khawiah nge a awm tâk?” a ti a. Ani chuan, “Ka hre nâng, ka nau vêngtu ka ni em ni?” a ti a.

¹⁰Ani chuan, “Engtizia nge hetiang thil hi i tih le? I nau thisen aw chuan lei aṭangin min au asin.

¹¹Chuvângin, nangma thah ngei i nau thisen lo dawngtu lei chungah hian i hmuingîl dâwn tawh lo a ni.

¹²Lo i neih pawhin a rah seng tûr i nei lo vang; leiah hian chanhai takin i vâkvai tawh ang,” a ti a.

¹³Kaina chuan LALPA hnênah, “Min hrem na êm a, tuar zawh rual em ni?

¹⁴Vawiinah he ram ata hi min hnawt chhuak a, i hmuh loh tûrin ka awm dâwn ta a ni si a; leiah hian chanhai takin ka vâkvai dâwn ta a ni. Chuvângin, min hmu apiangin min that mai ang asin,” a ti a.

¹⁵ LALPA chuan a hnênah, “That lo ve, Kaina that chu a lêt sariha phuba lâk a ni ang,” a ti a. A hmu apiangin an thah mai loh nân Kaina chu chhinchhiahna a siamsak a.

¹⁶LALPA hma ata Kaina chu a chhuak a, khawchhak lam Nod ramah chuan a awm ta a.

¹⁷Kaina chuan a nupui a pâwl a, nau a nei a. Enoka a hring a. Khua a siam a, a fapa hming chawiin ‘Enok’ a vuah a.

¹⁸Enoka chuan Irada fapa a nei a; Irada chuan fapa Mehujaela a nei a, Mehujaela chuan fapa Methusaela a nei a, Methusaela chuan fapa Lameka a nei a.

¹⁹Lameka chuan nupui pahnih a nei a, pakhat hming chu Adaii a ni a, pakhat hming chu Zillaii a ni.

²⁰Adaii chuan Jabala a hring a, ani chu berâm vulha puan ina chêngho thlahtu a ni.

²¹Chu mi nau chu Jubala a ni a, ṭingṭang leh phênglâwng tum mite thlahtu a ni.

²²Zillaii pawh chuan Tubal-kaina a hring a, ani chu dâr leh thîr hmanraw tinrêng chhertu a ni. Tubal-kaina chuan farnu Naamaii a nei.

²³Lameka chuan a nupuite hnênah: “Adai, Zillai, ka thu hi ngaithla ula, Lameka nupuite u, ka sawi hi bengkhawn rawh u: Min tipemtu chu ka that a, min vawtu tlangvâl chu ka that bawk a ni.

²⁴Kaina phuba laa mi pasarih an thih chuan, Lameka phuba lâk nân mi sawmsarih leh pasarih an that ang,” a ti a.

²⁵Adama chuan a nupui chu a pâwl leh a, fapa a hring a, a hmingah Setha a sa a. “Kainan Abela min thahsak tâk avângin a aiah Pathianin fapa min pe leh ta a nih hi,” a ti a ni.

²⁶Setha pawh chuan fapa a nei a, a hmingah Enosa a sa a. Chutih lai chuan a ni, miten LALPA hming an lam ṭan tâk ni.