Read Mizo Lushai Genesis 40 Bible Online

Genesis 40 - Mizo Lushai bible

Genesis 40

¹Chûng thil hnuah chuan Aigupta lal no kengtu leh chhang siamtu chuan an pu Aigupta lal hmaah thil tih fel loh an nei a.

²Farawa chu a chhiahhlawh pahnih, no kengtu leh chhang siamtu chungah chuan a thin a ur hle a.

³Josefa tânna hmun, tâng vêngtu hotu awmnaah chuan anni chu an rawn tântîr a.

⁴Tâng vêngtu hotu chuan chûng mi pahnihte tirhkah atân Josefa chu a ruat a.

⁵Rei fe an tân hnu chuan Aigupta lal no kengtu leh chhang siamtute pahnih chuan zan khatah mumang awmze hrang nei an mang ve ve a.

⁶A tûk zînga Josefa a lo kal chuan an hmêl a lo ngui hle mai a.

⁷A pu, tâng vêngtu hotu ina tâng ve, Farawa miliante chu, “Engtizia nge vawiin chu in va ngui ve?” a ti a.

⁸“Mumang kan nei a, tu man min hrilh fiahsak thei lo va ni,” an ti a. Ani chuan, “Mumang hrilh fiahnate chu Pathian pêk alâwm, mi han hrilh teh u,” a ti a.

⁹No kengtu lu ber chuan Josefa hnênah, “Ka mumangah chuan grep hrui zâm hi ka hmu a.

¹⁰Pêng pathum a nei a, a kuhmûm chauh tih chuan a pâr parh a, a rah ta mai a, a rah bâwr chu a hmin a.

¹¹Farawa no ka lo keng a, grep rah chu ka lo va, Farawa novah chuan ka sâwr a, Farawa kutah no chu lo zu pe ia,” a ti a.

¹²Josefa chuan, “A awmzia chu hetiang hi a ni.

¹³Pêng thum chu ni thum tihna a ni, ni thumah Farawa chuan i lu a chawikâng ang a, i hna ngai a thawhtîr leh ang che, a no kengtu i nih laia i tih ṭhin angin no chu Farawa i hlân dâwn a nih chu.

¹⁴I chan a ṭhat hunah chuan heta ka awm dân hi hre reng la, Farawa hnênah hemi aṭanga mi chhuah tûrin kamkhat talin mi han sawisak ang che.

¹⁵Hebrai mite ram aṭanga rûk bo ka ni a, tân ina dahna khawp thil sual eng mah tih ka nei bawk si lo,” a ti a.

¹⁶Chhang siamtu chuan ṭha takin mang chu a hrilh fiah tih a hria a, Josefa hnênah, “Ka mang ve chu, bâwm pathum ka lo chhîpchhuan a,

¹⁷a chung berah chuan Farawa ei tûr chhang tuihnai chi tinrêng a awm a. Ka chhîpchhuan lai chu savaten an rawn chu noh noh mai zu nia!” a ti a.

¹⁸Josefa chuan a chhâng a, “Hei hi a awmzia chu a ni: bâwm thum chu ni thum tihna a ni.

¹⁹Ni thum a nihin Farawa chuan i lu a tan ang a, i taksa chu thingah a khai ang a, savate chuan i sa chu an rawn tlân noh noh dâwn a nih chu,” a ti a.

²⁰A ni thum ni chuan Farawa chuan a pian champha lâwmin a chhiahhlawh zawng zawng tân ruai a ṭheh a. A no kengtu leh chhang siamtu chu a hre chhuak a.

²¹No kengtu chu a no kengtuah a dah leh a, Farawa no a keng leh ta a.

²²Chhang siamtu lal ber erawh chu Josefa sawi ang khân thingah a khai ta a.

²³No kengtu lu ber chuan Josefa chu a ngaihsak ta awzâwng lo va, a theihnghilh hmin dêr a.