Read Mizo Lushai Genesis 41 Bible Online

Genesis 41 - Mizo Lushai bible

Genesis 41

¹Kum hnih hnuah chuan Faraw-an mumang a nei a. Nail lui kamah a lo ding a.

²Lui aṭang chuan bâwngpui pasarih, thau ṭha tak tak an lo chhuak a, lui kam rairuang hmunah chuan an tla ta a.

³An hnung maiah chuan bâwngpui pasarih chêr chhe êm êm an lo chhuak a, a hmasate bulah khân an lo ding a.

⁴Bâwng chêr chhe tak tak chuan bâwng thau tak tak chu an ei zo ta mai a. Farawa chu a ṭhangharh ta a.

⁵A han muhîl leh a, mang a nei zawm a: buh kûng khatah vui sarih, ṭha tak, bit deuh a lo awm a.

⁶A dawtah vui sarih, sîn tê tê, thli lum chhêm ro rim rem a lo awm bawk a.

⁷Buh vui pasarih, sîn tê tê chuan vui sarih, ṭha pui pui chu an ei zo ta mai a. Farawa chu a ṭhangharh a, a mumang a lo ni a.

⁸A tûk zîngah chuan Farawa chu a buai rilru hle a. Aigupta mi, arsi chhui thiam te leh mi fing zawng zawng chu a ko va. Farawa chuan a mang chu a hrilh a; mahse, tu man an hrilh fiah thei lo.

⁹No kengtu lu ber chuan Farawa chu a bia a, “Vawiin hian ka haihawtzia ka hriat chhuah chu.

¹⁰Vawi khat, Farawa chu a chhiahhlawh chungah a thinur a, vêngtu hotu ber awmnaah kei leh chhang siamtu kha min tântîr a.

¹¹Zan khat chu kan pahnihin mumang kan nei ve ve a, a awmzia erawh chu a inang lo.

¹²Hebrai saltâng tlangvâl pakhat, vêngtu chhiahhlawh chu a awm ve a; kan mumang chu kan hrilh a, min hrilh fiahsak a.

¹³Min hrilh ang chiahin thil a lo awm ta a. Kei chu ka hna ngaiah min dah leh a, chhang siamtu erawh chu thingah khai a nih tâk kha,” a ti a.

¹⁴Farawa chuan Josefa chu a kohtîr ta nghâl a. Rip chhûng aṭangin an la chhuak vat a; a inmêt fai a, a silhfên a inthlâk a, Farawa hmaah a va inlan ta a.

¹⁵Farawa chuan Josefa hnênah, “Tu ma hrilh fiah theih loh mumang ka nei a ni; mahse, nang chuan i hriat veleh i hrilh fiah thei an ti che a ni,” a ti a.

¹⁶Josefa chuan Farawa chu a chhâng a, “Kei chuan thei lo ve; Pathian erawh chuan Farawa mumang chu dik takin a hrilh fiahsak ang,” a ti a.

¹⁷Farawa chuan Josefa hnênah, “Ka mumangah chuan Nail lui kamah ka lo ding a.

¹⁸Lui aṭang chuan bâwngpui pasarih, thau mûm ṭha tak tak an lo chhuak a, a kam rairuang hmunah chuan an tla a.

¹⁹An hnu lawkah chuan bâwngpui pasarih, berh êm êm, chêr chhe tak tak, thêp thin then hi an lo chhuak ve a - Aigupta ram zawng zawngah chutiang êma bâwng chêr chhia ka la hmu ngai lo.

²⁰Bâwng chêr chhe êm êmte chuan bâwng thau tak lo chhuak hmasate chu an ei zo va.

²¹An ei zawh hnu pawh chuan a hma ang bawk khân an la thêp ta tho va: tu man a dangte kha an ei tih hriat tûr a ni lo. Tin, ka han harh ta a.

²²Mumang ka neih lehah chuan buh kûng khatah vui sarih, lian tak tak leh pum ṭha tak tak ka hmu a.

²³A dawtah buh vui pasarih, sîn tê tê, thli lum chhêm ro rim rem a lo chhuak leh a.

²⁴Buh vui chhe tê tê chuan vui ṭha pui pui chu a lem zo ta maiin ka hmu a. Tin, arsi chhût thiam te ka hrilh a; mahse, tu mah hrilh fiah thei an awm lo,” a ti a.

²⁵Josefa chuan Farawa hnênah, “Farawa mumang hi awmze thuhmun a ni. Pathianin a thil tih tûr Farawa hnênah a hrilh lâwk a nih hi.

²⁶Bâwng thau tak tak pasarih kha kum sarih entîrna a ni, buh vui ṭha tak tak pasarih pawh kum sarih entîrna bawk a ni; mumang awmze thuhmun a ni.

²⁷Bâwngpui chêr chhe tak tak rawn zuitu pawh chu kum sarih ṭâm tla tûr entîrna a ni. Chutiang bawkin buhvui sarih khawchhak thli chhêm ro, chhe tê tê kha kum sarih ṭâm tla tûr entîrna a ni.

²⁸Farawa ka hrilh ang chiah khân Pathian chuan a thiltih tum Farawa hnênah a hrilh lâwk a ni.

²⁹Kan hma kum sarih chhûng hian Aigupta ram zawng zawngah buh tawntawin a haw ang a;

³⁰mahse, chu chu ṭâmpui mitthiin a zui ang a, tawntawa buh a haw lai kha an theihnghilh vek ang, ṭâm chuan ram chu a tichhia ang.

³¹Ramah ṭâm a nasat dâwn êm avângin buh tam lai hnuhma rêng rêng kha hmuh tûr a awm lo vang.

³²Faraw-an awmze thuhmun mang a neih nawn hi Pathianin chu thil chu a nemnghet a, a rawn tithleng thuai dâwn tihna a ni.

³³“Farawa chuan mi remhria leh fing zawng sela, Aigupta ram enkawltu atân siam rawh se.

³⁴Farawa chuan hotute ruat sela, kum ṭhat kum, kum sarih chhûngin Aigupta ramah, buh chu hmun ngaa hmun khat chhûntîr sela.

³⁵Kan hma kum sarih, kum ṭha tak lo awm tûr chhûng hian buh chu khawn khâwm sela,

³⁶Farawa thupêkin buhte chu chhêk khâwm ni rawh se; khawpuia an la ei atân chhûn khâwm ni rawh se. Aigupta rama kum sarih ṭâm tla tûr atân chûng chu khêk ni rawh se, ṭam avânga ram pum a boral loh nân,” a ti a.

³⁷Chûng thu chu Farawa leh a khâwnbâwlte chuan ṭha an tih zâwng tak a ni.

³⁸Farawa chuan a hote hnênah, “Ani ang Pathian thlarau awmna hi kan hmu zo dâwn em ni?” a ti a.

³⁹Farawa vêk chuan Josefa hnênah, “Pathianin hêng thil thleng tûr hi a hriattîr che a, nang anga thil hre thûk leh fing tu mah an awm lo vang.

⁴⁰Ka ram enkawltu i ni ang a, ka mite chu i thu thuin an awm ang, thuneihnaa mi dawttu i ni ang,” a ti a.

⁴¹Farawa chuan Josefa hnênah heti hian a ti bawk: “Ngai teh, Aigupta ram zawng chunga hotu-ah ka siam tâk che hi,” a ti a.

⁴²Farawa chuan a hming nemna zungbun chu a phawi a, Josefa chu a buntîr a. Puan zai sîn a sintîr a, rangkachak khaidiat a awrhtîr bawk a.

⁴³A sakawrtawlailîr ṭha ber dawttuah a chuantîr a, a hmaah chuan, “Kiang ru,” tiin an au va. Chutiang chuan Aigupta ram chunga hotu-ah ruat a ni.

⁴⁴Farawa chuan Josefa hnênah, “Farawa ni mah ila, i thu lo chuan Aigupta ram pumah tu mahin an kut an ke an lek tûr a ni lo,” a ti a.

⁴⁵Farawa chuan a hmingah Zafenat-panea a vuah a, On khaw puithiam Potifara fanu Asenathi chu nupuiah a neihtîr a. Aigupta ram pumah Josefa chu an hre ta a.

⁴⁶Josefa chu kum sawmthum a nihin Farawa hnuaiah a thawk ṭan a, Farawa bul aṭang chuan a chhuak a, Aigupta ram chu a fang chhuak a.

⁴⁷Kum ṭhat kum sarih chhûng chuan buh tawntawin a haw a.

⁴⁸Kum ṭhat kum sarih chhûnga thlai thar chi tinrêng chu a chhûng khâwm a, khawpuiahte chuan a chhêk a; khawpui tinah, a vêl lova buh haw chu, a chhêk zêl a.

⁴⁹Josefa chuan buh tam tak, tuifinriat kama ṭiauvaivut anga tam a chhêk rui a, a tam êm avângin a zât pawh a chhiar sêng ta lo va.

⁵⁰Ṭâm a tlâk hmain On khaw puithiam Potifara fanu Asenathi chuan Josefa chu fapa pahnih a hrinsak a.

⁵¹A fa tîr chu a hmingah Manasea a sa a, “Pathianin ka vânduaina leh ka nu leh pa min theihnghilhtîr ta a ni,” a tihna a ni.

⁵²A fa pahnihna hmingah Efraima a sa a, “Ka hrehawm tuarna ramah Pathianin min tipung,” a tihna a ni.

⁵³Aigupta rama buh tawntawa a haw hun chhûng chu a tâwp ta a,

⁵⁴ṭam kum sarih chu Josefa sawi ang khân a inṭan ta a, ram tinah ṭâm a tla a, Aigupta ram zawng zawngah erawh chuan ei tûr a awm.

⁵⁵Aigupta ram pumah pawh chuan an ṭam ve ta a. Farawa hnênah an kal a, ei tûr an dîl a. Farawa chuan Aigupta mite chu, “Josefa hnênah kal rawh u, a sawi ang apiang chu ti ang che u,” a ti zêl a.

⁵⁶Ṭâm chu ram puma a tlâk tâk vek hnu chuan a buh chhêkna inte chu a hawng a, ṭâm chu Aigupta ramah chuan a nat êm avângin buh chu a leitîr a.

⁵⁷Khawvêl pum puiah pawh an ṭâm nasat êm avângin Josefa hnênah ram tina mi an lo kal a, pûr an rawn chaw ṭhîn a ni.