Read Mizo Lushai Genesis 42 Bible Online

Genesis 42 - Mizo Lushai bible

Genesis 42

¹Jakoba chuan Aigupta ramah buh a awm tih a hriatin a fate hnênah, “Engati nge in inen mai mai.

²Aigupta ramah buh lei tûr a awm tih ka hria a ni; chhuk thla ula, tlêm azâwng tal zu lei rawh u; tichuan, rilṭâma thi lovin ṭâm hi kan tuar chhuak thei dâwn nia,” a ti a.

³Tichuan, Josefa u sâwmte chu Aigupta rama pûr chaw tûr chuan an kal ta a.

⁴Josefa pianpui, Benjamina erawh chu a ûte zîngah a pa chuan a kaltîr ve lo, tawh sual a tâwk palh hlauh ang tih a hlau a ni.

⁵Kanan ramah ṭâm a tlâk avângin pûr châwk tum mi dangte rual chuan Israela fate chu an kal ta a.

⁶Chu ram hotu ber chu Josefa a ni a, mi zawng zawng hnênah buh lei phalsak theitu a ni. Josefa ute chu an lo kal a, lei si-a kûnin chibai an bûk a.

⁷Anni a hmuh chuan Josefa chuan an hmêl a lo hre mai a; mahse, hnam dang angin a intilang a, ram takin a bia a, “Khawi lam mi nge in nih?” a ti a. “Kanan ram aṭangin pûr chaw tûra lo kal kan ni,” an ti a.

⁸Josefa chuan a unaute chu a hria a; a unaute erawh chuan a hmêl an hre ve lo.

⁹Josefa chuan an chungchâng mumanga a hmuh kha a hre chhuak a. Tichuan, an hnênah, “Enthlatute in ni ang. Ram dinhmun en thlithlai tûra lo kal in ni phawt mai,” a ti a.

¹⁰“Ni suh e, ka pu, i chhiahhlawhte hi pûr chaw tûr maia lo kal kan ni.

¹¹Kan za hian mi pakhat fa kan ni a, mi hlauhawm kan ni lo, enthlatu kan ni awzâwng lo ve,” an ti a.

¹²“Ka awih lo, ram dinhmun en thlithlai tûra lo kal in nih hi maw,” a ti a.

¹³An ṭang hle a, “I chhiahhlawhte hi unau sâwm leh pahnih, mi pakhat hrin, Kanan ram mi kan ni. Kan tlum ber chu kan pa hnênah a awm a; pakhat erawh chu a awm tawh lo,” an ti a.

¹⁴Josefa chuan, “Ka sawi ang khân enthlatu zawng in nih ngei hi.

¹⁵Hetiang hian in thu a dik leh dik loh kan fiah ang. In tlum ber chu han hruai rawh u. In rawn hruai loh chuan, Farawa hming chhâlin ka sawi e, in haw leh tawh lo vang.

¹⁶In nau hruai tûrin in zînga pakhat intîr haw ula, mi dang chu tân inah ka khung ang che u. Chutiang chuan thu dik in sawi nge sawi lo fiah a ni ang. Chutilo chu, Farawa chhâlin ka sawi hi, enthlatu in lo ni ngei ang,” a ti a.

¹⁷Ni thum chhûng tân inah a tântîr a.

¹⁸A ni thum ni chuan Josefa chuan an hnênah, “Ka sawi ang khân ti ula, in him ang. Pathian ṭih mi tak ka nih hi.

¹⁹Thu dik sawi in nih chuan in zînga pakhat in zaa aiah hrên ni sela, mi dang chuan in chhûngte ei tûr nei lo tân, ei tûr phur haw ang che u.

²⁰In nau tlum ber chu in rawn hruai ngei ngei tûr a ni; tichuan, in thu chu finfiah a ni ang a, in thi lo vang,” a ti a. Rem an ti ta a.

²¹“A va pawi êm! Kan nau avângin kan tuar ta a nih hi. Hrehawm a tih êm êm lai khân kan en mai mai a, khawngaih tûra min ngen ṭâwk ṭâwk lai khân kan ngaihsak hek lo. Chuvâng chu a nih hi he manganna hian mi a rawn tlâkbuak tâk ni,” an ti a.

²²Reubena chuan, “In nau chungah thil dik lo ti suh u, ka ti che u a, in ngaithla lo va, a thisen mawh chu in phur ta a nih hi,” a ti a.

²³Ṭawng lettute chu an inkâra an awm avângin Josefa chuan an thu sawi chu a lo hre reng tih an hre lo.

²⁴An hmuh loh tûrin a hawi a, a ṭap a. Fel taka a ṭawng leh theih hnu chuan an zîng ata Simeona chu a thlang chhuak a, an hmuh lai chuan a phuar a.

²⁵Josefa chuan an ipah buh dah khahsaka, an tangka pawh an ipa dah leh vek tûrin thu a pe a; kalkawnga an riah chaw tûr pawh a paitîr a. Chutiang chuan tih a ni ta a.

²⁶An buh lei chu an sabengtungte chu an phurhtîr a, an haw ta a.

²⁷An zînga pakhat chuan an zân riahnaah chuan sabengtung chaw pêk tumin a ip chu a han hawng a, a ip rawng bulah chuan a tangka chu a hmu a.

²⁸“Tu-in emaw ka tangka mi pe kîr leh a ni, hei ka ipa hi a awm reng mai,” tiin a unaute chu a hrilh a. An hlauthâwng rilru hle a, khûr chungin “Pathianin engtizia nge kan chungah hetia a tih tâk le?” an ti a.

²⁹Kanan rama an pa Jakoba hnên an thlen chuan an thil tawh zawng zawng chu an hrilh a.

³⁰“Ram hotupa ber chuan min lo be ram hle a, ram enthlatuah min puh a.

³¹‘Mi hlauhawm kan ni lo ve, enthlatu kan ni awzâwng lo,

³²unau sâwm leh pahnih, pa pakhat hrin kan ni a; pakhat chu a awm tawh lo va, kan naupang ber erawh chu kan pa hnênah Kanan ramah a awm,’ kan ti a.

³³Ram hotu ber chuan, ‘mi hlauhawm in ni lo tih heti hian kan hre thei ang; in zînga pakhat hnutchhiah ula, mi dang chuan in chhûng ei nei lote tân, eng emaw phur haw ang che u.

³⁴In tlum ber nên in lo kîr leh hunah enthlatu in ni lo va, mi hlauhawm lah in ni hek lo tih kan hre thei ang; tin, in unau kan hrên chu ka chhuah ang a, in duh duhin in awm thei ang,’ a ti a ni,” an ti a.

³⁵An ip an han phawrh chuan an tangka kha an ipah chuan a lo awm ṭheuh va. An tangka fûn an hmuh chuan an pa ho chuan an hlauthâwng hle mai a.

³⁶An pa chuan, “Nangni hian ka fa zawng zawng min sûntîr a nih hi. Josefa chu a awm tawh lo va, Simeona a awm ta lo bawk a. Benjamina pawh min lâksak in tum leh zêl em ni? Kei hi a tuartu ber ka nih hi,” a ti a.

³⁷Reubena chuan, “Ka rawn hruai kîr leh loh chuan ka fate pahnih hi i that mai dâwn nia. Ka kutah dah la, ka rawn hruai kîrsak leh ngei ang che,” a ti a.

³⁸“Ka fapa hi in rual chuan a kal ve tûr a ni lo; a u a thi tawh a, amah chauh hi la dam chu a ni. In kalna tûrah tawh sual a tawh hlauh chuan kei lu ṭuak bum tawh hi lungngaiin thlânah min liamtîr dâwn a nih hi,” a ti a.