Read Mizo Lushai Genesis 43 Bible Online

Genesis 43 - Mizo Lushai bible

Genesis 43

¹Chumi ramah chuan ṭâm chu a na ta hle a.

²Aigupta ram aṭanga an buh zu phurh an ei zawh chuan an pa chuan, “Kal leh ta ula, buh zu lei leh rawh u,” a ti a.

³Juda chuan, “Mi chuan, ‘in nau in rawn hruai loh chuan ka hmaah lo lang tawh suh u,’ min ti a ni.

⁴Kan nau hi a kal ve i phal chuan kan zu kal ang a, buh chu kan rawn leisak mai ang che.

⁵I phal loh erawh chuan kan kal leh ngam lo va ni. Mi chuan, ‘in nau in rawn hruai loh chuan ka hmaah lo lang tawh suh u,’ min ti tlat a ni,” a ti a.

⁶“Engati nge min tihrehawm tûr rêng rênga ‘nau pakhat kan la nei,’ tia chu mi chu in hrilh kher kher le aw,” a ti a.

⁷“Kan chanchin leh kan chhûng chanchin min zâwt si a, chhân loh theih ni hek lo, ‘in nau chu han hruai ngei rawh u,’ a ti ang tih engtin nge kan hriat ang?” a ti a.

⁸Juda chuan a pa Israela hnênah, “Ka kutah naupang chu dah la; tu mah, nang emaw, keini emaw, i tute emaw thi lova kan dam khawchhuah theih nân kan zu kal leh mai ang e.

⁹A chungchângah a bul tumtu ka ni ang a, a mawh ka phur ang e, ka rawn hruai kîr lohva, i hmaa ka rawh thlen loh chuan min thiam lo kumkhua ang che.

¹⁰Kan muangchâng mai mai a ni, kal ta ila, vawi hnih lai kan vei hman tawh ang,” a ti a.

¹¹An pa Israela chuan, “Chuti a nih si chuan heti hian ti rawh u: Chu mi hnêna pêk tûr chuan he rama thil ṭha ṭha hi in ipah khung ula, thinghnai damdawi te, khawizu tlêm te, beraw te, Mura te, khawkherh te leh theitê te kensak rawh u.

¹²Tangka pawh in ken lêt hnih keng ula, in ipa an dah kha in pe kîr tûr a ni, an tihsual palh a ni ang.

¹³In nau pawh chu hruai ula, chu mi hnênah chuan zu kal rawh u.

¹⁴El-Sadaian chu mi chu khawngaihtîr che u sela, in unaupa leh Benjamina pawh an lo haw phaltîr teh se. Ka fate chu ka chân a nih pawhin ka chân poh a ni ang chu,” a ti a.

¹⁵Tichuan, thilpêk tûrte chu an keng a, tangka pawh a lêt hnih an keng bawk a, Benjamina pawh an hruai a. Aigupta ramah chuan an chhuk a. Josefa hmaah chuan an va inlan a.

¹⁶Benjamina hruaia an lo kal a hmuh chuan, “Hêng mite hi ka inah hruai rawh, ran talh ula, chawchhûn ka eipui dâwn nia,” a in enkawltu hnênah chuan a ti a.

¹⁷Ani chuan a sawi ang chuan a ti a, anni chu a inah a hruai a.

¹⁸Josefa in lama an hruai ta chu an hlauthâwng hle a, “Kan kal hmasaka kan tangka ipa min dahsak leh vâng kha a ni phawt ang; min mana bawih atân kan rante nên min manna remchâng an zawng a ni ang,” an ti a.

¹⁹Josefa in enkawltu chu in luh dâwnah chuan an bia a,

²⁰“Ka pu, buh lei tûrin vawi khat kan lo kal tawh a:

²¹kan zân riahna hmunah kan ip kan han hawng a, kan ip rawng bulah kan tangka kha a lo awm ṭheuh mai. Kan buh leina zât chiah vek kha a ni. Hei, chu chu kan rawn la kîr leh a.

²²Buh leina tûr pawh tangka dang kan rawn keng asin. Kan ipah tu nge kan tangka kha dah kan hre lo a ni,” an ti a.

²³“Chûng thil chu a fel vek alâwm, thlaphâng suh u. In Pathian, in pa Pathian chuan ro hlu a dahsak che u a nih chu. In buh leina chu ka dawng vek alâwm,” a ti a. Simeona pawh chu a rawn hruai chhuak nghâl a.

²⁴Chu mi chuan Josefa inah a hruai lût a, an ke silna tûr tui a pe a, an ran ei tûr chaw a pe bawk a.

²⁵Chhûna Josefa lo haw nghâkin thilpêk an kente chu inah an la lût a, chaw an ei ho dâwn tih an hre tawh a ni.

²⁶Josefa a lo haw chuan thilpêk tûr an kente chu an pe a, lei siin chibai an bûk a.

²⁷An chanchin a zâwt a, “In pa, tar tawh tak in sawi kha engtin nge a awm, a la ṭha zêl maw?” a ti a.

²⁸“I chhiahhlawhte pa chu a dam a, la hrisêl tak a ni,” an ti a, zah takin a hmaah an kûn a.

²⁹A nu fapa, a nau Benjamina chu a han hmuh chuan, “Hei hi em ni in tlum ber in sawi kha?” a ti a. “Mama, Pathianin khawngaih che rawh se,” a ti bawk a.

³⁰Josefa chu a nau a han hmuh chuan a lung a chhia a, a ṭah a chhuak a, a tlân chhuak a, pindan dangah a kal a, a va ṭap a.

³¹A hmai a phih a, a lo chhuak leh chu a insûm thei tawh a ni. “Chaw ei siam rawh u,” a ti a.

³²Ani chu a hrangin an eitîr a, anniho chu a hrangin an ei ho va, Aigupta mi, a ina chaw ei ṭhînte pawh chu a hrangin an ṭhu a. Aigupta mite chuan Hebrai mite nên chaw an ei ho thei lo a ni; Hebrai mite chu tenawm an ti êm êm a ni.

³³A hmaah chûng mite chuan anniho chu a upat dân indawtin a naupang ber thlengin an ṭhuttîr thliah a; an inen a, mak an ti êm êm a.

³⁴Dawhkân aṭang chuan ei tûr an rawn suahsak a, Benjamina chan chu mi dang chan lêt nga lai a ni. Josefa ho chuan ruai an ṭheh a, duh tâwkin uain an in ta a.