Read Mizo Lushai Genesis 44 Bible Online

Genesis 44 - Mizo Lushai bible

Genesis 44

¹Tin, Josefa chuan a in enkawltu hnênah, “Hêng mite ipah hian an phurh zawh tâwkin buh thun khat la, an pawisa pawh an ipah dahsak ṭheuh ang che,

²ka tangkaraw no kha, an naupang ber ipah, ama tangka nên dah bawk ang che,” a ti a. Josefa thupêk ang chuan a ti a.

³Khua a vâr veleh an rante nên an chhuahtîr a.

⁴Khua aṭanga thui an kal hmain Josefa chuan a in enkawltu hnênah, “Tho la, khâng mite kha va ûm rawh.

⁵I ûm phâk hunah, ‘Engtizia nge thil ṭha thil suala in rulh le, ka pu uain inna no, aien nâna a hman ṭhin asin in lâk kha; thil tenawm tak in ti a ni,’ va ti ang che,” a ti a.

⁶A va ûm phâk a, chutiang chuan a va ti a.

⁷Anni chuan, “Ka pu hian engtiziaa chutia rawn ti mai nge maw i nih le? I chhiahhlawhte hian chutiang chu kan ti teuh hlei nêm.

⁸Kan ipa tangka kan hmuh pawh kan ram aṭangin kan rawn keng vang vang a nih kha. I pu tangka emaw, rangkachak emaw han ru âwm kan ni nêm. I chhiahhlawhte zîngah chutiang lo titu kan awm a nih chuan tihhlum ni rawh se.

⁹Chu mai chu ni lovin, ka pu, i bawihah kan ṭang vek ang,” an ti a.

¹⁰“In thil sawi chu a âwm hle a; amaherawhchu, no latu chauh ka bawihah ṭang rawh se, mi dang chu in fihlîm vek ang,” a ti a.

¹¹Mahni ip ṭheuh an hlâng thla a, a ṭâwnna chu an phelh sawk sawk a,

¹²A upa ber ip aṭangin a han zawng ṭan a, a naupang ber ip chu a zawng hnuhnûng ber a; no chu Benjamina ipah chuan a lo awm a.

¹³Chu veleh an silhfênte an pawtthlêr a, mahni phur an siam sawk sawk a, khawpui lamah an kîr leh ta a.

¹⁴Juda leh a unauten khua an luh chuan Josefa chu inah a la awm a. A hmaah chuan an bawkkhup a.

¹⁵Josefa chuan, “Thil in va han ti mak ve! Keini ang hi chuan aien kan thiam ang tih in hre na nge?” a lo ti a.

¹⁶Juda chuan a chhâng a, “Kan pu hnênah eng nge kan sawi tâk ang? I chhiahhlawhte thil sual tih tilangtu hi Pathian a lo ni e. Hei, ka pu, i bawihte kan nih tâk hi, i no latu mai ni lovin kan vai hian,” a ti a.

¹⁷“Chuti êm chu ni lo ve, ipa no an hmuhna chauh ka bawihah ka nei ang; mi dang chu in pa hnênah haw vang vang rawh u,” a ti a.

¹⁸Chu veleh Juda chuan Josefa chu a hnaih a, “Ka pu, khawngaih takin i chhiahhlawh hian ka pu Farawa tluka lal hnênah thu min sawitîr la, lo ngaithla hrâm teh.

¹⁹I chhiahhlawh hi ka pu chuan, ‘Pa in la nei em, unau dang in la nei em?’ tiin min zâwt a nih kha.

²⁰Ka pu hnênah, ‘Upa tawh tak pa kan nei a, a upat lama a fapa, fa tlum ber pawh a la awm, a u erawh chu a thi tawh a; a nupui duat fa la dam chhun a nih avângin a ngai êm êm a ni,’ kan ti a.

²¹Nangin, ‘Han hruai thla rawh u, ka lo hmu duh e,’ i chhiahhlawhte hnênah i ti a.

²²Ka pu, i hnênah, ‘Naupang chuan a pa a kalsan thei lo vang, a kalsan chuan a pa chu a thi mai ang,’ kan ti a.

²³Mahse, nangin i chhiahhlawhte hnênah, ‘In nau tlum ber chu in rawn hruai loh chuan mi rawn hmu thei tawh lo vang,’ i ti miau si a.

²⁴I chhiahhlawh, kan pa hnêna kan han thlen chuan, ka pu, chûng thu chu kan hrilh a.

²⁵Nakin deuh hnuah kan pa chuan, ‘Kal ula, ei tûr zu lei leh rawh u,’ min ti a.

²⁶‘Kan kal a sâwt lo, kan tlum ber a tel ve erawh chuan kan kal mai ang; kan tlum ber tel lo chuan chu mi chu kan hmu thei dâwn lo a ni,’ kan ti a.

²⁷I chhiahhlawh, kan pa chuan, kan hnênah, ‘Ka nupui khân fapa pahnih min hrinsak a,

²⁸pakhat chu a awm ta lo va, ramsakawlhin an pawt sawm a ni ang ka ti ta a ni, vawiin thleng hian ka hmu leh tawh lo.

²⁹He mi leh zêl hi zawng mi hruai bosak teh suh u, tawhsualte a tawh hlauh chuan lungngaiin kei putar hi mitthi khuaah min liamtîr dâwn a ni,’ a ti a.

³⁰I chhiahhlawh, kan pa chuan, kan nau hi ngaih tak têin a ngai si a, a tel lova a hnêna kan kîr chuan,

³¹a tel ve lo tih a hriat veleh a thi mai ang, i chhiahhlawhte hian kan pa, i chhiahhlawh tar tawh tak chu lunglêngin mitthi khuaah kan liamtîr dâwn a ni.

³²Chu lovah pawh, kan nau kan rawn hruai theih dân hetiang hi a ni; ka pa hnênah, ‘I hnêna ka rawn hruai kîr loh chuan i lakah thiam loh ka chang kumkhua ang,’ tiin mawhphurtuah ka insiam a ni.

³³Chuvângin kei, i chhiahhlawh hi, kan nau aiah ka tâng mai zâwk ang e, ani chu a ute rualin haw rawh se.

³⁴Ka nau tel lo hi chuan kan pa hnêna kîr leh thei ka ni lo. Ka pa chunga chhiatna thleng tûr min hmuhtîr lul suh,” a ti a.