Read Mizo Lushai Genesis 45 Bible Online

Genesis 45 - Mizo Lushai bible

Genesis 45

¹Josefa chu a ina awmte hmaah chuan a insûm zo ta ngang lo va, mi zawng zawng chu a chhuahtîr a. A unaute hnêna Josefa a insawi lai chuan tu mah an awm ve lo.

²A ṭap ta rawih a, Aigupta mite chuan an hre pha a, Farawa inah pawh an lo hria a.

³Josefa chuan a unaute hnênah, “Josefa kha ka ni alâwm. Ka pa a la dam maw,” a ti a. Mak an ti lutuk a, a unaute chuan chhân pawh an chhâng thei lo.

⁴Josefa chuan, “Lo hnai deuh teh u!” a ti a. An va hnaih deuh hnu chuan, In nau Josefa kha ka ni. Aigupta mite hnêna in hralh kha.

⁵In rilru mangang suh se, hetia min hralh avâng hian inthiam lo rilru hek suh u. Kan zavaia tân himna tûrin in hmaah Pathianin min tîr hmasa a lo nih hi.

⁶Ram pumah kum hnih chhûng kan ṭam tawh a, kum nga dang lei an let lo vang a, buh seng tûr a awm hek lo vang.

⁷Chuvângin, mak taka chhan tûr che uin Pathianin min lo tîr hmasa a ni; nangni leh in thlahte in mang lohna tûrin.

⁸Hetia min kaltîrtu hi nangni ni lovin Pathian a lo ni. Farawa tân pa angin min siam a, a chhûngkaw hotu ber Aigupta ram rorêltuah min siam a nih hi.

⁹“Ka pa hnênah chuan han kîr leh thuai ula, a hnênah, ‘I fapa Josefa chuan, Aigupta rama hotu-ah Pathianin mi dah hi, i tute leh i berâm te, i ran rual leh i neih zawng zawng nên ka bul hnaiah,

¹⁰Gosen ramah i awm dâwn nia.

¹¹Ṭâm hian kum nga a la awh dâwn a, nang leh i chhûngte leh i ṭhuihruaiten eng mah tlâkchham an neih loh nân ka lo enkawl ang che u a ti,’ han ti rawh u.

¹²Nangmahni ngeiin min hmu a, ka nau Benjamin, hei min hmu a, in hnêna thusawitu, kei hi, Josefa ngei kha ka nih hi.

¹³Aigupta ramah dinhmun sâng takah ka din thu te, in thil hmuh te hi ka pa chu han hrilh ang che u. Kal thuai ula, ka pa chu hetah han hruai rawh u,” a ti a.

¹⁴Chutia a sawi zawh chuan a nau Benjamina chu a pawm a, a ṭap a, Benjamina pawh a ṭap a.

¹⁵A ute pawh a fâwp ṭheuh va, a ṭah khum zêl a. Chutia a tih zawh chuan thu an sawi tlâng thei ta a.

¹⁶Josefa unaute lo kal thu chu Farawa inah pawh an hre ta a. Farawa leh a upate chu an lâwm hle a.

¹⁷Farawa chuan Josefa hnênah, “I unaute chu hrilh rawh. Hetiang hian ti rawh se. An ran phurte chu siam sela, muangchâng lovin Kanan ramah kîr vat rawh se.

¹⁸In pa chu a chhûngte nên rawn hruai rawh se, hetah lo kîr leh sela, Aigupta rama ram ṭha ber laiah ka dah ang e, ram hausakna chu an tlân dâwn nia.

¹⁹Heti hian tihsak rawh: an fate, an nupuite leh in pa chuanna tûr Aigupta rama tawlailîrte hâwn sela, lo kîr leh rawh se.

²⁰An thil neih dangte chu engto tehchiam suh se, Aigupta rama thil ṭha tinrêng an nei dâwn alâwm,” a ti a.

²¹Israela fate chuan chutiang chuan an ti a. Josefa chuan Farawa thupêk angin tawlailîr te, kalkawnga an riah chaw tûr te a pe a.

²²An za chuan kawr thar a pe bawk a, Benjamina phei chu tangka sekel zathum leh inthlâkna tûr kawr panga a pe a.

²³A pa tân Aigupta rama thil siam ṭha ber chi sabengtung phur sâwm leh buh te, chhang te leh ei tûr dang kalkawnga an riah chaw tûr sabengtungpui phur sâwm a thawn bawk a.

²⁴Tichuan, a unaute chu a tîr haw a, “Kawngah va inmawhchhiat suh ang che u,” a ti a.

²⁵Aigupta ram an chhuahsan a, an awmna Kanan ram chu an thleng a.

²⁶“Josefa chu a la dam a, Aigupta ram pum puia rorêltu a ni,” tih an pa an han hrilh chuan a mit sulh a, a awih thei lo va.

²⁷Josefa thu zawng zawng kha an han hrilh a, Josefan a chuanna tûr tawlailîr a rawn thawn te a han hmuh chuan a lo harh leh ta a.

²⁸Israela chuan, “Ka fapa Josefa a la dam chu a tâwk e, ka thih hmain a hmêl hmu tûrin ka kal ngei tûr a ni,” a ti a.