Read Mizo Lushai Genesis 47 Bible Online

Genesis 47 - Mizo Lushai bible

Genesis 47

¹Josefa chu a kal a, Farawa hnênah, “Ka pa leh ka unaute chu Kanan ram aṭangin an lo chhuk a, an berâm te, an ran rual te leh an neih zawng zawng nên Gosen ram an lo thleng ta,” tiin a hrilh a.

²A unaute panga a thlang chhuak a, Farawa hmaah chuan a hruai a.

³Farawa chuan, “Eng hnathawk ṭhîn nge in nih?” tiin a unaute chu a lo zâwt ta ngei a. Anni chuan, “I chhiahhlawhte hi berâm vêngtu kan ni ṭhîn, kan pate pawh chutiang mi chu an ni ṭhîn,” tiin Farawa chu an chhâng a.

⁴Farawa hnênah chuan hetiang hian an ti bawk a: “He ramah hian lo pêm kan duh a ni; ṭâm a nat êm avâng hian i chhiahhlawhte hian Kanan ramah kan ran peh tûr hnimhring kan hmu zo tawh lo va ni. Gosen ram vêlah hian kan lo awm min phalsak tûrin kan ngên a che,” an ti a.

⁵Farawa chuan Josefa hnênah, “I pa leh i unaute chuan an rawn pan che a.

⁶Aigupta ram chu a awm duai alâwm, ram ṭha berah i pa leh i unaute chu awmtîr rawh; Gosen bialah awm rawh se. An zînga fel fâl bîk i hriat chuan ka ran enkawltuah te dah ang che,” a ti a.

⁷Josefa chuan a pa Jakoba chu Farawa hnênah a hruai a, a hmaah chuan a dintîr a. Jakoba chuan Farawa chu chibai a bûk a.

⁸Farawa chuan, “Kum eng zât nge i nih tawh le?” tiin Jakoba chu a zâwt a.

⁹Jakoba chuan, Farawa chu a chhâng a, “Khualzin ka nih chhûng kum chu kum za leh sawmthum zawng a ni ve ta. Ka pate dam chhûng nêna teh chuan ka dam chhûng nite chu a la tlêm hle a; mahse, a hahthlâk hle a ni,” a ti a.

¹⁰Jakoba chuan Farawa chu chibai a bûk leh a, a chhuahsan ta a.

¹¹Josefa chuan a pa leh a unaute chu Farawa thu ang chuan Ramases bialah, ram ṭha berah, ram a pe a, a awmtîr ta a.

¹²Josefa chuan a pa leh a unaute, a pa chhûngte chu a naupang ber thlengin an mamawh ang zêlin ei tûr a tumsak ta a.

¹³Ṭâm chu a nasa ta hle a, ram tinah ei tûr a awm ta lo va. Aigupta leh Kanan ram chu ṭâm tuarin an chau zo ta a.

¹⁴Aigupta leh Kanan rama pawisa awm zawng zawng chu an buh dawn manah a lâksak a, Farawa tangka inah a dah zêl a.

¹⁵Aigupta leh Kanan rama pawisa awm zawng zawng an hman zawh chuan Aigupta mite chu Josefa hnênah an lo kal a, “Buh min pe rawh, i hmuhah kan thih mai dâwn hi, pawisa lah kan nei tawh si lo,” an rawn ti a.

¹⁶Josefa chuan, “Pawisa in neih tawh si loh chuan buh manah in rante han pe ta che u, buh ka lo pe ang che u,” a ti a.

¹⁷Tichuan, Josefa hnênah an rante chu an rawn pe a. Sakawr te, berâm te, bâwng te leh sabengtungte chuan buh an lei ta a. Chumi kum chhûng tla chu an ran chuan an lei thei a.

¹⁸Chumi kum chu a ral a, kum tharah chuan Josefa hnênah an lo kal leh a, “Ka pu, kan pawisa leh rante chu buh manah kan pe zo tawh a. Ka pu, keimahni leh kan lo tih loh chu eng mah pêk tûr che kan nei ta lo tih hi zêp thei kan ni ta lo.

¹⁹Engah nge i mit hmuha kan thih anga, kan lote pawh a chhiat vek ang? Buh manah keimahni leh kan lote hi la mai la, kan ram nên Farawa bawihah kan ṭang mai ang. Buh chi tûr min pe la, boral lovin kan dam khawchhuak thei hlauh mahna, kan lote pawh a chhe hlen dâwn lo nia,” an ti a.

²⁰Tichuan, Josefa chuan Farawa tân Aigupta rama lo zawng zawng chu a neihsak ta a. Ṭâm chu a nat tâk êm avângin Aigupta mi zawng zawngin an ram chu an hralh a.

²¹Aigupta ram dung leh vânga mi zawng zawng chu Farawa bawihah a siam ta a.

²²Puithiamho ram erawh chu a lâksak ve lo; Farawa chuan buh pêk tâwk a ruat a, Farawa pêk ang chu an ei tâwk a ni; chuvângin, an ram chu hralh ve a ngai lo va ni.

²³Josefa chuan mipui hnênah, “Farawa tân nangmahni leh in lote ka lei ta a; hei le, in tuh tûr buh chi ka pêk che u hi.

²⁴Buh in seng hunah hmun ngaa ṭhena hmun khat chu Farawa hnênah in pe tûr a ni, a bâng hmun li chu a chi-ah te, in chhûngte nêna in eiah te, in fanaute châwm nân te hmang ang che u,” a ti a.

²⁵“Kan nun i chhandam a, min khawngaih a, Farawa bawihah min siam hi, ka pu, i chungah kan lâwm êm êm a ni,” an ti a.

²⁶Josefa chuan buh thar hmun ngaa hmun khat chu Farawa chanvo atân Aigupta ram dânah a siam ta a; tûn thlengin chu chu an la hmang ta zêl a ni; puithiamho ram chauh Farawa ta a ni lo.

²⁷Aigupta rama Gosen bialah chuan Israela te chuan awmhmun an khuar ta a. Ramte an nei nghet a, an chi a ṭha a, an pung chak ta hle a.

²⁸Jakoba chu Aigupta ramah kum sâwm leh pasarih a dam a, Jakoba dam chhûng chu kum za leh sawmli leh pasarih a ni.

²⁹A thih hun a lo thlen hnaih chuan Israela chuan a fapa Josefa chu a ko va, a hnênah, “Min duhsak takzet a nih chuan ka thu angin i ti ang tih i tiam nân i kut ka malpui kârah dah la, Aigupta ramah min phûm lo tûrin tiam rawh.

³⁰“Ka pate hnêna ka mut ve hunah Aigupta ram aṭangin min la chhuak la, an inphûmnaah min phûm ve ang che,” a ti a. “I sawi ang chuan ka ti ang e,” a ti a.

³¹Chhechhama tiam tûra a phût ang chuan a tiam ta a. Tichuan, Israela chu khum lu siin a kûn ta a.