Read Mizo Lushai Genesis 48 Bible Online

Genesis 48 - Mizo Lushai bible

Genesis 48

¹Chûng hnu deuhvah chuan Josefa hnênah, “I pa a chau ta hle,” an rawn ti a. A fa pahnih, Manasea leh Efraima chu a hnênah a hruai a.

²Jakoba hnênah chuan, “I fapa Josefa a lo kal e,” an ti a. Israela chu a intiharh a, khumah chuan a ṭhu chhuak a.

³Jakoba chuan Josefa hnênah, “Kanan ram Luz khuaah El-Sadaia ka hnênah a rawn inlâr a, mal min sâwm a.

⁴‘I chi ka tiṭha ang a, ka tipung ang che, hnam tam tak pung khâwm tih thamah ka siam ang che; he ram hi kumkhuaa i thlahten an neih atân ka pe a ni,’ a rawn ti a.

⁵Aigupta rama ka rawn fin ve hma che-a Aigupta rama fa pahnih i hrinte kha ka ta an ni ang. Efraima leh Manasea chu Reubena leh Simona te ka ta an ni ang bawkin ka ta an ni ang.

⁶An pian hnua piangte leh i fate erawh chu i ta an ni ang, ro khâwm tûr chungchângah an ûte chan ai an chang ang.

⁷Padan aṭanga ka lo hawa, Kanan rama kan vahvaihna lamah i nu Rakili chuan Efratha bul lawkah min thihsan a; Efratha kawngah, Bethlehem-ah kan phûm ta a nih kha. I nu avângin chutiang chu ka remruat dân a ni,” a ti a.

⁸Josefa fate chu Jakoba chuan a han hmuh chuan, “Hêng hi tute nge an nih?” a ti a.

⁹Josefa chuan a pa hnênah, “He rama Pathianin min pêk ka fate chu an nih hi” a ti a. “Ka bulah han hruai hnai teh, mal ka lo sâwmsak teh ang,” a ti a.

¹⁰Israela chu a upat tawh avângin a mit a thim tawh a, khua a hmu thei tawh lo. Josefan a fate chu a rawn hruai hnai a, a lo fâwp a, a pawm a.

¹¹Israela chuan Josefa hnênah, “I hmêl hmuh leh rêng ka inbeisei lo va, i fate lam Pathianin min hmuhtîr tâk hi,” a ti a.

¹²Josefa chuan a fate chu Israela malchung ata chu a la sawn a, lei siin a kûn a.

¹³Josefa chuan a ding lamin Efraima a chelh a, Israela kut vei lamah a dintîr a; Manasea chu a vei lamin a chelh a, Israela kut ding lamah a dintîr a.

¹⁴Israela chuan a ban kawkalh a, a kut ding lam chu a naupang zâwk Efraima lu-ah a nghat a, a vei lam chu a upa zâwk Manasea lu-ah a nghat a.

¹⁵Hetiang hian anni chu mal a sâwmsak ta a: Ka pa Abrahama te, Isaka te zui ṭhin Pathian, Ka pian ni aṭanga tûn thlenga min vêngtu Pathian,

¹⁶Thil ṭha lo zawng zawng laka min humtu Vântirhkoh chuan Hêng naupangte hi malsâwm sela, Anni hi ka hming leh ka pa Abrahama leh Isaka hming pu zêltu ni sela. Leiah hian lo pungin tam tak ni rawh se,” a ti a.

¹⁷Josefa chuan a pain a fapa naupang zâwk Efraima chunga a kut ding lam a nghat chu a tihpalh a nih ringin Efraima lu aṭangin Manasea lu-ah a kut ding lam chu sawnsak a tum a.

¹⁸A pa hnênah, “Ka pa, khati chuan ti teh suh, a upa zâwk lu-ah i kut ding lam kha nghat teh,” a ti a.

¹⁹A pa chuan a duh lo va, “Ka hria e, ka fapa. Ani pawh hnam ropui tak a la ni ang. A naupang zâwk hian a la khûm dâwn a ni, a thlahte pawh hnam lian tak tak an ni ve tho vang,” a ti a.

²⁰Chumi ni chuan anni chu mal a sâwmsak a, “Israel mite chuan hetiang hian duhthu an insamsak tawn ang: ‘Efraima leh Manase angin Pathianin siam che rawh se,’ tiin. Efraim chu a dah pawimawh ta zâwk a ni.

²¹Israela chuan Josefa hnênah, “Ka thi mai dâwn ta, Pathianin a awmpui ang che u. I pate ramah a hruai kîr leh ang che.

²²Amor mite ram, ka khandaih leh ka thala ka lâksak Sekem ruam ṭha chu i ute nêna in chan bâkah i tân ka pe chuang a che,” a ti a.