Read Mizo Lushai Genesis 50 Bible Online

Genesis 50 - Mizo Lushai bible

Genesis 50

¹Josefa chuan a pa ruang chu a bawh a, a ṭah a, a fâwp a.

²Josefa chuan a hnuaia thawk damdawi thiamte ṭawih thei lo tûrin a pa ruang chu a siamtîr a.

³Chutianga ruang siam chuan ni sawmli a awh ṭhîn; Aigupta mite chuan ni sawmsarih chhûng an ṭah a.

⁴A sûn hun chhûng a ral hnuin Josefa chuan Farawa miliante hnênah, “Min khawngaih ula, Farawa hnênah hei hi min dîlsak teh u.

⁵Ka pa khân ‘Kanan rama ka thlân buatsaihah min phûm ngei ang che,’ a ti a; chhia min chhamtîr a.

⁶Chuvângin, tûnah ka pa chu han phûm tûrin ka chho thei dâwn lâwm ni? Ka lo kîr leh mai ang,” a ti a. Farawa chuan, “Chhia a chhamtîr che ang chuan kal la, i pa chu han phûm rawh,” a ti a.

⁷Josefa chu a pa phûm tûr chuan a chhuak a, a rual chuan Farawa sawrkâr hotu rual leh Aigupta ram milian zawng zawng pawh an chho ve a.

⁸Josefa chhûngte pawh, a unaute, a pa chhûngte nên, an kal ve vek a ni; an fanaute leh an ran rualte erawh chu Gosen ramah an hnutchhiah a.

⁹Tawlailîrte, sakawr chungchuang mite pawh a rual chuan an kal ve a, an kawi duah mai.

¹⁰Jordan ral hlîng hmun hruihzâwl an han thlen chuan urhsûn takin an sûn a, Josefa chuan a pa chu ni sarih chhûng a ṭah a.

¹¹Kanan mite chuan chu hmuna an lusûn an hmuh chuan, “Aigupta mite lusûn dân a nih hi,” an ti a. Chuvângin, chu hmun hmingah chuan Abel-mizraim, ‘Aigupta mite lusûn mual’ an vuah a, Jordan râla awm a ni.

¹²Jakoba fate chuan an pa sawi angin an ti a.

¹³A fate chuan Kanan ramah an zâwn lût a Makpela hmuna pûk, Mamre zâwn, Hit mi Efrona hnên aṭanga Abrahaman thlân atân a leiah chuan an phûm ta a.

¹⁴A pa a phûm zawh chuan Josefa chu Aigupta ramah a haw leh a. A unaute leh a ruala a pa phûm tûra chho zawng zawng pawh an haw vek a.

¹⁵Josefa unaute chuan an pa a thih tâk hnu chuan, “Josefa hian min la haw rilru rengin a chunga thil dik lo kan tih ang khân kan chungah a ti ve mai ang a!” an ti a.

¹⁶Tichuan, Josefa hnênah thu an chah a, “A thih hma khân i pa chuan hetiangin thu min chah a ni.

¹⁷Josefa hnênah, ‘i ûte thil sual tih leh thil ṭha lo tak an tih ngaidam tûrin ka ngên a che, tiin in sawi tûr a ni,’ min ti a. Chuvâng chuan, i pa Pathian chhiahhlawhte thil sual tih kha khawngaih takin ngaidam ang che,” an ti a. An thu a lo hriat chuan Josefa chu a ṭap a.

¹⁸A ute chu anmahni ngei a hnênah chuan an va kal a, a hmaah an bawkkhup a, “I chhiahhlawhah kan ṭang mai ang e,” an ti a.

¹⁹Josefa erawh chuan, “Hlauthâwng suh u, Pathian tlukah ka insiam ngam hlei nêm.

²⁰Min tihboral zawng in tum ngei a, Pathianin hmanraw ṭhaah a hmang ta hlauh zâwk a ni.

²¹Chuvângin, tûnah hlauthâwng rêng rêng suh u, nangni leh in fate ei tûr zawng ka tum zêl ang,” a ti a. An hnêna ngilnei taka thu a sawi chuan an thla a timuang ta a.

²²Josefa chu a pa chhûngte nên chuan Aigupta ramah an awm ta reng a.

²³Josefa chu kum za leh sâwm a dam a, Efraima fa, khûp thum thlengin a hmu a, Manasea fa Makira fa pawh a malchungah a chawi hman a ni.

²⁴A tâwpah, Josefa chuan a unaute hnênah, “Ka thih a hnai ta, Pathianin a hre reng ang che u a, he ram aṭang hian Abrahama te, Isaka te, Jakoba te hnêna pêk a tiam ramah chuan a hruai chho vang che u,” a ti a.

²⁵Josefa chuan Israel fate chu chhia a chhamtîr a, “Pathianin a rawn kan hunah che u ka ruhte hi heta ta la chhuak ngei ang che u,” a ti a.

²⁶Josefa chu kum za leh sâwm mi a nihin a thi ta a. A ruang chu ṭawih thei lo tûrin an siam a, Aigupta ramah chuan kuangah an zalh a.