Read Mizo Lushai Genesis 7 Bible Online

Genesis 7 - Mizo Lushai bible

Genesis 7

¹ LALPA chuan Nova hnênah, “Nang leh i chhûngte nên lawngah lût vek rawh u; tûnlai mite zîngah nang chauh hi mi dik tak ka hmuh chhun i ni.

²Leia chi thlaha nung zêl tûrin sa thiang zînga mi tuak sarih zêl, a nu leh a pa; sa thiang lo zînga mi tuak khat zêl, a nu leh a pa;

³chunglêng sava zînga mi tuak sarih, a nu leh a pa, hruai lût bawk ang che.

⁴Tûn aṭanga ni sarih ralah ni sawmli chhûng chhûn leh zân ruah ka sûrtîr dâwn a ni. Thil nung ka siam tinrêngte chu lei ata ka timang vek dâwn,” a ti a.

⁵Nova chuan Pathian thupêk ang chuan a ti a,

⁶Lei chunga tui a lo lêt khân Nova chu kum zaruka upa a ni.

⁷Tui a lêt dâwn avângin Nova leh a nupui chu, an fate leh an nupuite nên lawngah chuan an lût a.

⁸Sa thiang leh thiang lo, chunglêng savate leh leia tleng ṭhîn chi tinrêngte chu,

⁹Pathianin Nova hnêna thu a pêk angin pahnih zêl, a nu leh a pa, Nova lawng chhûngah chuan an lût ta a.

¹⁰Ni sarih a ral hnu chuan lei chungah tui a lo lêt ta a.

¹¹Nova kum zaruk a nih kum, thla hnihna, ni sâwm leh pasarih ni tak chuan tuithûkpui tuite chu a lo sah a, vân tukverhte chu a inhawng a.

¹²Ni sawmli leh zan sawmli chhûng ruahpuivânâwn a sûr ta chiam a.

¹³Chumi ni chuan Nova leh a fa pathum, Sema te, Hama te, Jafeta te, Nova nupuite leh a mo pathumte chu lawngah an lût a,

¹⁴chumi ni ngei chuan ramsa tinrêng, ran tinrêng, thil nung tinrêng - leia tleng te, sava chi tinrêng, thlâwk thei tinrêng te chu lawngah an lût ve a.

¹⁵Nunna thaw nei, tisa pu zawng zawng chu an lût kim a ni.

¹⁶Nova hnêna Pathianin thu a pêk angin nupa kawp zêlin an lût a. LALPA chuan lawng chu a khârsak ta a.

¹⁷Leiah ni sawmli chhûng zawng tui a lo lêt ta a; tuiin a chîm ang zêlin lawng chu a lâng zêl a.

¹⁸Lei chungah tui chu a lo pung a, a chîm sâng tial tial a, lawng pawh chu a lâng zêl a.

¹⁹Lei chungah tui chu a tam tulh tulh a, a lei chîm chin pawh a sâng tial tial a, tlâng sâng berte pawh a chîm pil ta a.

²⁰Tlâng sâng ber chhîp pawh chu tawng sâwm leh panga laia thûkin a pil a ni.

²¹Tisa pu, leia che thei awm zawng zawng, sava te, ran te, ramsa te, a ruala tla chi te, mihring te a chîm hlum zo ta a.

²²Thaw thei tawh phawt, khawmuala chêng zawng zawng chu an thi zo ta a.

²³Khawvêla awm zawng zawng, mihring te, ran te, leia tleng chi te, chunglêng sava te an boral ta vek a. Nova leh lawng chhûnga awmte chauh chu zuah an ni.

²⁴Tui chuan lei chu ni za leh sawmnga chhûng a chîm ta pûng a.