Read Mizo Lushai Genesis 8 Bible Online

Genesis 8 - Mizo Lushai bible

Genesis 8

¹Pathian chuan Nova te, a awmpui ramsa te leh ran tinrêng chu a hre reng a. Pathian chuan lei chungah thli a tlehtîr a, tui chu a kâm ṭan ta a.

²Tuithûkpui sah leh vân tukverh inhawng chu a inkhâr a, vân aṭanga ruahpuivânâwn sûr chu a hân ta a.

³Zawi zawiin tui chu a kâm hret hret a, ni za leh sawmnga a ral hnu,

⁴a thla sarihna, ni sâwm leh pasarih ni chuan lawng chu Ararat tlângah a innghat ta a.

⁵A thla sâwmna thleng chuan tui chu a kâm zêl a, a thla sâwmna ni khat ni chuan tlâng chhîpte chu a lang thei ta a.

⁶Ni sawmli a ral hnu chuan lawng tukverh a siam chu Nova chuan a hawng a.

⁷Choak a chhuah a, leia tui a kâm fel nghâkin a thlâwk a thlâwk a.

⁸Tui a kâm zo tawh emaw hriat nân ṭhuro a chhuah leh a;

⁹ṭhuro chuan fûkna tûr leichâr a hmu lo va, lawngah chuan a lo kîr leh a, tui chuan lei chu a la chîm vek a ni. Tichuan, a kut a zen chhuak a, a man a, lawng chhûngah chuan a la lût a.

¹⁰Ni sarih dang a nghah hnuah lawng aṭang chuan ṭhuro a chhuah leh a.

¹¹Tlai lamah chuan ṭhuro chu a lo kîr a, oliv hnah bal thar a rawn pu a. Nova chuan leia tui chu a kâm zo ta tih a hria a.

¹²Ni sarih dang a nghah leh hnu chuan ṭhuro chu a chhuah leh a, a lo kîr ta lo va.

¹³Nova kum zaruk leh pakhat kum, thla hmasa ber ni khat ni chuan lei ata tui chu a kang zo ta a. Nova chuan lawng chhîn chu a hawng a, lei chu a châr ta tih a hmu a.

¹⁴A thla hnihna, ni sawmhnih leh pasarih ni chuan lei chu a ro ta vek a.

¹⁵Pathian chuan Nova hnênah,

¹⁶“I nupuite, i fate leh an nupuite nên lawng ata hi chhuak rawh u.

¹⁷Savate leh rante pawh hi hruai chhuak ula, an inthlah ang a, leiah an awm darh dâwn nia,” a ti a.

¹⁸Tichuan, Nova chu a fa te, a nupui te leh a mo te nên an lo chhuak a.

¹⁹Rannung zawng zawng, leia tleng chi te, chunglêng sava te, leia tla ṭhînte chu a chi chiin an lo chhuak ve a.

²⁰Nova chuan LALPA tân maichâm a siam a, sa thiang leh sava thiang zînga mi a thlang ṭheuh va, maichâmah chuan hâlralah a hlân a.

²¹LALPA chuan hâl ral rim chu tui a ti hle a; “Mihring avângin khawvêl pum pui hi ka sawisa leh tawh lo vang; mihring thinlung hi a naupan lai aṭangin suala khat a ni si a; thil nung dang pawh tûn ang chuan ka tihlum tawh lo vang.

²²Lei hi a awm chhûng chu buh tuh hun te, a seng hun te, khaw vâwt leh khaw lum te, nipui leh thlasik te, chhûn leh zân te a tâwp lo vang,” a ti rilru a.