Read Mizo Lushai Genesis 9 Bible Online

Genesis 9 - Mizo Lushai bible

Genesis 9

¹Pathian chuan Nova leh a fate chu mal a sâwm a, “In chi ṭha sela, pung duah duah ula, lei hi luah khat ang che u.

²Leia ramsa zawng zawng leh tuipuia sangha zawng zawngin an ṭih ang che u a, an zah êm êm ang che u, in kutah ka dah a ni.

³In ei atân thlai hring tinrêng ka pe a che u, thil nung tinrêng, nunna nei zawng zawngte pawh in ei thei ang.

⁴Sa erawh chu a nunna thisen chawpin in ei tûr a ni lo.

⁵Tin, in nunna thisen chhuahtu chungah, ramsa an ni emaw, mihring an ni emaw, kut ka thlâk ang.

⁶Mihring nunna thisen chhuahtu chu, Mi dangin a thisen an chhuahsak ve ang. Mihring hi Pathian anga siam a ni si a;

⁷tichuan, in chi ṭha sela, Pung deuh deuh ula, Leilung dâp chhuak rawh u,” a ti a.

⁸Pathian chuan Nova leh a fate hnênah heti hian a ti bawk:

⁹“Ngai teh u, nangni leh in thlah zêlte tân thu ka thlung ta.

¹⁰Chu chu in hnêna awm, thil nung zawng zawng, sava te, ran te, ramsa te, lawng aṭanga lo chhuak, leia thil nung tinrêngte tân chuan a ni.

¹¹Ka thuthlung, ka vawn reng tûr chu hei hi a ni: Thil nung tinrêng tihlum tûrin tui ka tilêt ngai tawh lo vang a, lei tichhe tûrin a lêt ngai tawh lo vang.

¹²“Tin, ka kumkhaw thuthlung, nangni leh thil nung zawng zawng nêna kan inkâra ka thuthlung chhinchhiahna chu hei hi a ni:

¹³Chhûmah chhimbâl ka zâmtîr hi, khawvêl nêna kan inkâra thuthlung chhinchhiahna chu a ni.

¹⁴Lei chunga chhûm ka zîntîr hunah chhimbâl chu a lo lang ang a;

¹⁵nangni leh thil nung tinrêng nêna kan inkâra thuthlung ka thlun chu ka hre reng ṭhîn ang a, tui lo lêtin mi nung zawng zawng a tihlum tawh dâwn lo nia.

¹⁶Chhûm zînga chhimbâl a lo lanin ka hmu ang a, nangni leh leia thil nung tinrêng nêna ka thuthlung chu ka hre reng ṭhîn ang.

¹⁷Chu chu nang leh leia thil nung tinrêng nên kan inkâra ka thuthlung chhinchhiahna a ni zêl ang,” tiin.

¹⁸Lawng aṭanga lo chhuak, Nova fate chu Sema te, Hama te, Jafeta te an ni; Hama chu Kanan mite thlahtu a ni.

¹⁹Hêng mi pathum hi Nova fate chu an ni, an thlahte chuan lei pum pui hi an dâp ta a.

²⁰Nova chu lo nei mi a ni a, grep huan a siam a.

²¹Uain chu a in a, a rui a, a puan in chhûnga a mu chu a mu sual a.

²²Kanan mite thlahtu Hama chuan a pa mu sual chu a va hmu a, a unaute chu a rawn hrilh a.

²³Sema leh Jafeta chuan puan an la a, an kokia inzâwnin hnungtawlhin an kal a, an pa mu sual chu an va khuh a, an pa mu sual hmu lo tûrin lehlam an hawi tlat a ni.

²⁴Nova rui chu a lo harh a, a fapa naupang ber Hama thil tih dân chu a han hriat chuan:

²⁵Kanana chuan ânchhia dawng rawh se, A unaute zîngah chhiahhlawh tê ber ang ni rawh se.

²⁶Sema Pathian chu fakin awm sela, Kanana chu mi dang chhiahhlawh ni rawh se.

²⁷Pathianin Jafeta tân hmun zuah sela, Sema puan inahte pawh chêng sela, Kanana erawh chu an chhiahhlawh ni rawh se,” a ti a.

²⁸Nova chu tuilêt hnuah kum zathum leh sawmnga a dam a.

²⁹Nova chu kum zakua leh sawmnga chhûng a dam a ni, a thi ta a.