Read Mizo Lushai LEHKHABU PAHNIHNA SAMUELA 1 Bible Online

LEHKHABU PAHNIHNA SAMUELA 1 - Mizo Lushai bible

LEHKHABU PAHNIHNA SAMUELA 1

¹Saula a thih hnuin Davida chuan Amalek-ho a va hneh a, a lo haw a, Ziklag khuaah ni hnih a châwl a.

²A ni thum ni chuan mi pakhat, Saula riahhmun aṭangin a lo kal a, a kawrte a thlêr vek a, a lu-ah lei a kai luam a. Davida hnên a lo thlen chuan leia bawkkhupin chibai a bûk a.

³Davida chuan, “Khawi aṭanga lo kal nge i nih?” a ti a. Ani chuan, “Israel-te riahhmun aṭangin ka lo tlân chhuak a ni,” a ti a.

⁴Davida chuan, “Eng thil nge lo thleng ta le, min hrilh teh,” a ti a. Ani chuan, “Indonaah mite chu an tlânchhia a, mi tam tak an that a; Saula leh a fapa Jonathana pawh an thi asin,” a ti a.

⁵Davida chuan chu thu rawn hrilhtu tlangvâl hnênah chuan, “Saula leh a fapa Jonathana engtin nge an thi tih i hriat?” a ti a.

⁶A hrilhtu tlangvâl chuan, “Gilboa tlângah ka va kal hlauh va, Saula chu a fei rinchhanin a ding a; chutih lai chuan tawlailîr leh sakawr chungchuang mite chuan an rawn nangchîng ṭêp a.

⁷Tichuan, a hawi vêl ruai a, mi hmu ta a, mi han au va, ‘Eng nge ni ta le?’ ka ti a.

⁸Ani chuan, ‘Tu nge i nih?’ min ti a. Keiin, ‘Amalek mi ka ni,’ tiin ka chhâng a.

⁹Ani chuan ka hnênah, ‘Lo kal la, mi han that mai teh; eng mah ka ni ta lo, ka dam zo dâwn lo ve,’ a ti a.

¹⁰Tichuan, ka va kal a, a dam zo dâwn lo tih ka hriat avângin ka that ta a. A lallukhum khum lai leh a bânbun lai chu ka la a, hei ka pu, i hnênah ka rawn thlen a nih hi,” a ti a.

¹¹Davida chuan a silhfênte a pawtthlêr a, a hnêna mi awm zawng zawngte pawh chuan an puan an pawtthlêr ve a.

¹²Saula leh a fapa Jonathana te leh LALPA mi, Israel-te chu khandaiha an thah avângin an sûn a, an ṭah a, tlai thlengin chaw an nghei a.

¹³Davida chuan chûng thu rawn hrilhtu tlangvâl hnênah chuan, “Khawi lam mi nge i nih?” a ti a. Ani chuan, “Ram dang mi, Amalek hnam ka ni,” a ti a.

¹⁴Davida chuan, “LALPA hriakthih tihlum tûra a chunga kutthlâk engtiziaa hlau lo nge i nih?” a ti a.

¹⁵Davida chuan a mite zînga mi pakhat a ko va, “Kal la, va that rawh,” a ti a. Tichuan, a va sât hlum ta a.

¹⁶Davida chuan a hnênah, “I thisen chhuah man chu nangmah ngeiin tuar ang che; nangmah ngeiin, ‘LALPA hriakthih chu ka that a ni’ tiin i sawi si a,” a ti a.

¹⁷Davida chuan Saula leh a fapa Jonathana chu heti hian a ṭah a.

¹⁸Chu ṭah hla chu Juda thlahte zirtîr tûrin a hrilh a, chu chu Jasar bu-ah ziak a ni.

¹⁹“Israel mi ropui chu tlângah an that a, mi chak, huaisente pawh an tlûk tâk hi!

²⁰Gath khuaah hril suh ula, Askelon kawtthlêrah puang hek suh u; Filistia nuho an lâwm ang a, Serh tan lohho fanute an hlim dah ang e.

²¹Gilboa tlângahte chuan ruah leh dai tla suh se, Loahte eng mah rah suh se, Tah chuan mi huaisen phaw mualpho takin an thehthal a, Saula phaw chu an tuaihnûm ta lo.

²²Jonathana thalah mi huaisen thau leh thisen A kai luai ṭhîn, Saula khandaih pawhin râl a hlah ngai hek lo.

²³Saula leh Jonathana chu an inhmangaih êm êm a, An thih pawhin, an dam pawhin an inṭhen lo, Mupui aiin an ṭuan a ṭha, Sakeibaknei aiin an chak zâwk bawk.

²⁴Nangni, Israel nute u, Saula hi ṭah teh u, Puan senduk mawi takin a tuam che u a, Rangkachaka cheimawi puan a sintîr che u kha.

²⁵Mi huaisente indonaah an thi ta e, Jonathana pawh tlângah chuan an that ta,

²⁶Aw, ka unaupa Jonathan, ka va han lainat tak che êm! Ka tân i hlu êm êm a, I mi hmangaihna chu a mak a, Nu hmangaihna pawhin a tluk lo.

²⁷Mi huaisente chu an tlu a, An râlthuamte pawh an thlah ta e,” tiin.