Read Mizo Lushai LEHKHABU PAHNIHNA SAMUELA 13 Bible Online

LEHKHABU PAHNIHNA SAMUELA 13 - Mizo Lushai bible

LEHKHABU PAHNIHNA SAMUELA 13

¹Davida fapa Absaloma chuan farnu hmêlṭha tak a nei a, a hming chu Tamari a ni. Davida fapa Amnona chuan ani chu a ngaizâwng ta hle a.

²A farnu Tamari a ngaihzâwn êm avângin Amnona chuan a âtchilh ta a. Tamari chu nula thianghlim a ni a, tihngaihna a hre lo va.

³Amnona chuan ṭhian a nei a, a hming chu Jonadaba a ni. Ani chu Davida u Sama fapa a ni. Jonadaba chu fing vervêk tak a ni.

⁴Amnona hnênah chuan, “Nang, lal fapa hi, engtizia nge a ni têla i chêr tulh tulh chu le? Eng vâng nge ni min hrilh teh,” a ti a. Amnona chuan a hnênah, “Ka unaupa Absaloma farnu Tamari hi ka ngaizâwng êm atin a ni,” a ti a.

⁵Jonadaba chuan a hnênah, “Na der la, khumah mu reng la, i pain a rawn en hunah che a hnênah, ‘Khawngaih takin ka farnu Tamarin min rawn kan sela, ei tûr min rawn pe teh se, ka mit hmuhah ei tûr mi siamsak sela, a siam ngei chu ka lo ei ang e,’ lo ti rawh,” a ti a.

⁶Tichuan, Amnona chu a mu a, a na der ta a. Tin, lal chuan a va kan a, Amnona chuan lal hnênah, “Khawngaih takin ka farnu Tamari lo kal sela, ka mit hmuhah chhang min siamsak sela, a siam ngei chu ka lo ei ang e,” a ti a.

⁷Lal chuan lal in chhûnga awm Tamari hnênah chuan, “I nuṭa Amnona inah kal la, ei tûr va siamsak teh,” tiin mi a tîr a.

⁸Tamari chu a nuṭa Amnona inah chuan a kal ta a, ani chu a lo mu reng a. Chhangphut a la a, a hmet a, chhangpêr a siam a, a hmuh lai chuan a ur hmin ta a.

⁹A urna thlêng ata a la chhuak a, chhang chu a hmaah a hlui a; mahse, a ei duh lo va. Amnona chuan, “Mi dang zawng zawng hi heta ta chhuahtîr vek rawh,” a ti a.

¹⁰Amnona chuan Tamari hnênah, “Ka mut pindanah hian chaw chu han la rawh le, i mi pêk ngei ka lo ei ang e,” a ti a. Tamari chuan a chhang siam chu a la a, a nuṭa Amnona chu a mut pindanah chuan a rawn pe a.

¹¹Ei tûr a pêk lai tak chuan Amnona chuan a lo man a, a hnênah, “Ka farnu, lo mu ve teh,” a ti a.

¹²Ani chuan a chhâng a, “Ni lo ve, ka nuṭapa, mi tilui suh, hetiang thil hi Israel-te zîngah tih tûr a ni lo, he thil sual tak hi ti lul suh khai.

¹³Ka tân mualphona tâwp a ni a, ka meng ngam dâwn em ni? Nang pawh Israel-te zînga mi sual tâwpa ngaih i ni dâwn asin. Khawngaih takin lal hnênah sawi zâwk la, kan inneih a hnial lo vang,” a ti a.

¹⁴Nimahsela, a thu sawi chu a ngaithla duh lo va, a aiin a chak si a, a mutpui lui ta a.

¹⁵Amnona chuan ngei tak têin a ngei leh ta si a, a hnênah, “Tho la, chhuak vat rawh,” a ti a.

¹⁶Tamari chuan a hnênah, “Chuti mai tûr chu a ni lo vang; min hnawh chhuah hi ka chunga i tih tâk ai mah khân a sual zâwk a ni,” a ti a. Nimahsela, a ngaithla duh chuang lo va.

¹⁷A tirhkah chhiahhlawh chu a ko va, a hnênah, “He hmeichhia hi heta ta hi hnawt chhuak la, kawng hi kalh tlat rawh,” a ti a.

¹⁸A chhiahhlawh chuan ani chu a hnawt chhuak a, kawng chu a kalh ta a. Tamari chuan kawrfual ze hrang hranga ṭial mawi a ha a, chutiang kawrfual chu lal fanu thianghlimten an ha ṭhîn a.

¹⁹Tamari chuan a lu-ah vaivut a phul a, kawrfual ze mawi tak a hâk lai chu a pawtthlêr a, a chhîpah a kut a suih a, ring taka ṭap chungin a kal ta a.

²⁰A nuṭa Absaloma chuan, a hnênah, “I nuṭa Amnona chuan a khawih che a ni maw? Ka farnu, ngawi hrâm hrâm rawh, i nuṭa a ni alâwm. I rilru tina duh suh,” a ti a. Tichuan, Tamari chu a nuṭa Absaloma inah khawhar takin a inkhung ta a.

²¹Chûng thu chu Davidan a lo hriatin a thin a ur hle a.

²²Absaloma chuan Amnona chu biak pawh a be ṭha duh ta lo va, a farnu Tamari a tihmualpho avângin Amnona chu a haw ta hle a.

²³Kum hnih a ral hnu chuan Efraim khaw kianga Baal-hazar-ah Absaloma chuan berâm hmul a mêt a, Absaloma chuan lal fapa zawng zawng chutah chuan a sâwm a.

²⁴Absaloma chu lal hnênah a kal a, a hnênah, “Ngai teh, i chhiahhlawhin berâm hmul ka mêt a, lal leh a ṭhuihruaite chu i chhiahhlawh hnênah hian kal ve teh se,” a ti a.

²⁵Lal chuan Absaloma hnênah, “Ni lo ve, ka fapa, kan za chuan kal lo ve, kan tihautak lutuk dah ang che,” a ti a. Absaloma chuan a sâwm lui a; mahse, a kal duh chuang lo va, mal a sâwmsak ta zâwk a.

²⁶Absaloma chuan, “A nih loh leh ka unaupa Amnona tal ka hnênah kal ve rawh se,” a ti a. Lal chuan a hnênah, “Engah nge a kal bîk ang?” a ti a.

²⁷Nimahsela, Absaloma chuan a ngên luih tlat avângin Amnona leh lal fapa dang zawng zawng chu a kaltîr ta a.

²⁸Absaloma chuan a chhiahhlawhte hnênah, “Amnonan uain a ruih thatho lai takin, ‘Amnona that rawh u’ ka ti ang a; tichuan, in that dâwn nia. Hlau rêng rêng suh u, hei hi in hnêna ka thupêk a ni, ngaihṭha takin awm ula, thlaphâng suh u” tiin a lo hrilh diam a.

²⁹Absaloma mite chuan an pu thupêk ang chuan Amnona chu an that ta a, lal fapa dang zawng zawng chu an sakawr chungah an zuangkai a, an tlânchhe ta vek a.

³⁰Kawng laka an la awm lai chuan, “Absaloman lal fapa zawng zawng chu pakhat mah zuah lovin a that vek mai,” tiin Davida chu an rawn hrilh a.

³¹Lal chu a tho va, a silhfênte a pawtthlêr a, leiah a mu a, a kianga a chhiahhlawh awm zawng zawng pawhin an silhfênte chu an pawtthlêr ve a.

³²Davida u Sama fapa Jonadaba chuan, “Ka pu chuan lal fapa tlangvâl zawng zawng chu an thah vek ring suh se, Amnona chauh a ni thi ni. A farnu Tamari a tihhmingchhiat avâng hian hetianga tih hi Absaloma chuan a tum rêng a ni.

³³Chuvângin, ka pu, LALPA chu lal fapa zawng zawng an thi emaw tiin lungngai duh suh se, Amnona chauh a ni thi ni,” a ti a.

³⁴Absaloma erawh chu a tlân bo ta a. Râlvêngtu tlangvâl chu a han hawi vêl a, a hnung lam tlângah chuan mi tam tak lo kal a hmu a.

³⁵Jonadaba chuan, lal hnênah chuan, “Ngai teh, lal fapate chu an lo hâwng a, i chhiahhlawhin a sawi ang chiah kha a ni e,” a ti a.

³⁶Chu thu a sawi zawh chuan lal fate chu an lo thleng a, an ṭap hawm hawm a, lal leh a chhiahhlawhte pawh chu lungchhe takin an ṭap a.

³⁷Absaloma chu a tlân bo va, Gesur lal Amihuda fapa Talmaia hnênah a kal a. Lal chuan Amnona chu rei tak a sûn a.

³⁸Absaloma chu a tlân bo va, Gesur ramah a kal a, chutah chuan kum thum a awm a.

³⁹Lalin Amnona a ngaih chu a reh ta a, Absaloma erawh chu a ngai êm êm a.