Read Mizo Lushai LEHKHABU PAHNIHNA SAMUELA 14 Bible Online

LEHKHABU PAHNIHNA SAMUELA 14 - Mizo Lushai bible

LEHKHABU PAHNIHNA SAMUELA 14

¹Zeruii fapa Joaba chuan Absaloma chu lalin a ngai hle tih a hria a.

²Joaba chuan Tekoa khuaa hmeichhe fel tak pakhat a kohtîr a. Hmeichhe hnênah chuan, “Lusûn angin awm la, lusûn thuam inbel bawk la, hriak pawh thih suh. Rei tak lusûn tawh angin awm rawh.

³Tin, lal hnênah va kal la, hetiangin thu va sawi ang che,” a ti a, sawi tûr nên lam a hrilh vek a.

⁴Tekoa khua hmeichhia chu lal hnênah a kal ta a, bawkkhupin chibai a bûk a, a hnênah, “Aw lalber, mi pui rawh,” a ti a.

⁵Lal chuan, “Engtizia nge ni ta?” a ti a. Ani chuan “Hmeithai rethei tak ka ni a, ka pasalin min thihsan a.

⁶I bawihnu hian fapa pahnih ka nei a, lovah an insual a; tu mah ṭhelhtu an awm si lo va, pakhat zâwk chuan a unaupa chu a that ta a.

⁷A thi-a chhûngte zawng zawng chuan i bawihnu hi min do rawn a, ‘A unaupa thattu kha, a unaupa a thah phuba laa kan thah ve theih nân min pe rawh; roluahtu nei lovin kan han siam teh ang,” an ti a. Chutianga ka innghahna awm chhun an thah leh zêl chuan ka pasal thlah a mang ang a, leiah hian a hming a dai mai dâwn a ni,” a ti a.

⁸Lal chuan hmeichhe hnênah, “Va hâwng ta la, i chungthu chu ka tihfelsak mai ang che,” a ti a.

⁹Tekoa khaw hmeichhia chuan lal hnênah, “Aw lalber, ka pu, eng pawh ti la, a mawh chu kei leh ka pa chhûngten kan phur ang, lal leh a ram chuan phur suh se,” a ti a.

¹⁰Lal chuan, “Mi tu pawhin an vau che chuan ka hnênah han hruai la, an tibuai leh tawh lo vang che,” a ti a.

¹¹Hmeichhia chuan, “Phuba lâk tumtuten ka fapa dam chhun hi an thaha, chhiatna nasa lehzual an thlentîr loh nân lal chuan, LALPA, i Pathian min ngensak rawh,” a ti a. Lal chuan, “LALPA mi nung hmingin ka tiam a che, i fapa chu engtin mah an tina lo vang,” a ti a.

¹²Hmeichhia chuan, “Khawngaih takin i bawihnu hian, ka pu, lal hnênah thu kam khat chauh ka sawi leh thei ang em?” a ti a. Ani chuan, “Sawi ta che,” a ti a.

¹³Hmeichhia chuan, “Engtizia nge Pathian mite chunga hetiang thil dik lo hi i tih? Lal chuan a fapa tlân bo chu a hruai hâwn leh duh loh chuan tûna a ṭawngka chhuak ngei khân thiam loh a chantîr a ni lâwm ni?

¹⁴Kan la thi ṭheuh dâwn, leia tuisik bua, ruh leh theih loh ang hi kan ni. Pathian pawhin mitthi tawh chu a nuntîr leh lo. Lal erawh hi chuan a hnên ata ram hla taka tlân bo chu hruai hâwn zai rêl teh se.

¹⁵Aw lalber, ka pu, miten min vau avângin he thu hi i hnênah ka rawn sawi ngam a ni. I bawihnu hian, ‘Lal hnênah ka thlen ang a, ka dîl hi min lo tihsak mahna,’ ka ti a ni.

¹⁶Lal chuan kei i bawihnu leh ka fapa hi Pathianin min pêk ram aṭanga min tihboral tumtute laka min chhanhim ka beisei a ni.

¹⁷Lalber, ka pu, ka ngên a che, i bawihnu hi min thlamuan la, lalber ka pu chu Pathian tirhkohte anga engkim hre vektu i ni si a, LALPA, i Pathian chu i hnênah awm zêl rawh se,” a ti a.

¹⁸Lal chuan hmeichhe hnênah, “Ka zawh apiang eng mah zêp lovin min chhâng teh aw,” a ti a. Hmeichhia chuan, “Ka pu lalber chuan sawi ang hmiang,” a ti a.

¹⁹Lal chuan, “Hêng hi Joaba tihtîr che em ni?” a ti a. Hmeichhia chuan, “LALPA ka pu, i hmaah ka puang e, i thu zawh chu dik taka chhân loh theih a ni lo. Ni e, i chhiahhlawh Joaba chuan i bawihnu hi hêng thu zawng zawng hrilh tûr chein min tîr a ni.

²⁰I chhiahhlawh Joaba chuan thil siam ṭhat a tum a ni. Ka pu chu Pathian tirhkohte angin a fing a, ram chhûng thil thleng tinrêng a hre vek si a,” a ti a.

²¹Tichuan, lalin Joaba hnênah, “I remruat chu a ṭha e; kal la, tlangvâl Absaloma chu va hruai hâwng rawh,” a ti a.

²²Joaba chuan bawkkhupin zah takin chibai a bûk a, lal chu a fak a. Joaban, “Lal chuan a chhiahhlawh ngenna a hlawhtlintîr avângin i chhiahhlawh hian lalber, ka pu mit ka tlung tih vawiinah hian ka hre ta,” a ti a.

²³Joaba chu Gesur-ah a kal a, Absaloma chu Jerusalem-ah a rawn hruai hâwng a.

²⁴Lal chuan, “A in lamah kal sela, ka hmêl rawn hmu suh se,” a ti a.

²⁵Israel-te zîngah Absaloma anga hmêlṭha chungchuang an awm lo va, a ke phah aṭanga a chhîp thlengin sawisêl tûr rêng a awm lo.

²⁶A sam a ṭha êm êm a, a sei a, a buk lutuk châng apiangin a mêt ṭhîn a. A sam rih zâwng chu kg. hnih lai a ni ṭhîn.

²⁷Absaloma chuan fapa pathum leh fanu pakhat a nei a, a fanu hming chu Tamari a ni a, a hmêl pawh ṭha tak a ni.

²⁸Absaloma chu kum hnih lai lal hmêl hmu lovin Jerusalem-ah a awm a.

²⁹Lal hnêna tirh atân Absaloma chuan Joaba chu a chah a; mahse, a lo kal duh lo va. A chah nawn leh pawhin a lo kal duh chuang lo va.

³⁰A tâwpah a chhiahhlawhte hnênah, “Ka lo kiang kha Joaba lo a ni a, barli a chîng a, kal ula, va hâl rawh u,” a ti a. Absaloma chhiahhlawhte chuan lo chu an va hâl ta a.

³¹Joaba chu Absaloma inah a kal a, a hnênah, “Engtizia nge i chhiahhlawhten ka lo an hâl mai le?” a ti a.

³²Absaloma chuan Joaba chu a chhâng a, “Ka hnêna lo kala, lal hnênah, “Eng atân nge Gesur ata ka lo hâwn? Chutah chuan awm reng ila, ka tân a ṭha zâwk tûr,’ tia sawi tûrin ka chah che a ni lâwm ni? Tûnah, lal hnênah min hruai la, thil ka tisual a nih chuan min that mai rawh se,” a ti a.

³³Tichuan, Joaba chu lal hnênah a kal a, chûng thu chu a hrilh a. Lal chuan Absaloma chu a ko va, ani chu a lo kal a, bawkkhupin lal chu chibai a bûk a. Lal chuan Absaloma chu a lo fâwp a.