Read Mizo Lushai LEHKHABU PAHNIHNA SAMUELA 17 Bible Online

LEHKHABU PAHNIHNA SAMUELA 17 - Mizo Lushai bible

LEHKHABU PAHNIHNA SAMUELA 17

¹Ahitofela chuan Absaloma hnênah, “Mi sîngkhat leh sânghnih ka thlang chhuak ang a, zâninah Davida ka va ûm teh ang.

²A chauh chhiat lai tak ka va nangchîng ang a, ka ṭhâwng thut ang a, a mite zawng zawngin an tlânchhiatsan ang a, amah chu ka va that mai ang.

³Tichuan, mite chu, mo, a pasal hnêna a lawi angin i hnênah ka rawn hruai kîr vek ang. Thah i tum mi pakhat bâk chu an him vek ang,” a ti a.

⁴Chu thurâwn chu Absaloma leh Israel upaho chuan ṭha an ti hle a.

⁵Absaloma chuan, “Ark mi Husaia han ko ula, eng nge sawi tûr a neih i lo ngaithla ve phawt teh ang,” a ti a.

⁶Husaia chu a lo kal a, Absaloma chuan a hnênah, “Ahitofela chuan hetiangin thu min râwn a, a sawi ang hian kan ti ang em? Ṭha i tih loh chuan i ngaih dân han sawi ve teh,” a ti a.

⁷Husaia chuan Absaloma hnênah, “Tûn ṭuma Ahitofela remruat hi a ṭha lo va ni.

⁸I pa mite chu i hria a, râl beih thiam, savawm a notê an lâksak ang maia kawlhsen an ni a. Chu bâkah, i pa hi râl rêl thiam a ni a, a sipaite zîngah a riak kher lo vang.

⁹Tûnah pawh pûkah emaw, hmun dangah emaw a biru daih ang. In inbei chauh tiha i mite an thih hlauh phei chuan a hria apiangin, ‘Absaloma sipaite an that chiam mai,’ an ti ang a.

¹⁰Sipai huaisen, sakeibaknei rilru pute pawh hlauvin an khûr ang a, Israel mi zawng zawngin i pa indo thiamzia, a hotute huaisenzia te an hre vek si a.

¹¹Hetiangin ti zâwk teh: Israel mi, Dan leh Beer-seba inkâra awm zawng zawng chu tuifinriat ṭiauvut zât ngawt ko khâwm la, nangmah ngeiin indonaah chuan hma hruai la;

¹²tichuan, kan hmuhna apiangah kan bei ang a, leia dai tla ang maiin ani chu kan bei tluar tluar ang a; a hote nên pakhat mah kan zuah lo vang.

¹³Khuaa a tlân luh chuan Israel mi zawng zawng hruizên nên kan thawk ang a, a khaw chawpin kawrah kan hnuk thla mai ang, lungtê pakhat pawh kan zuah lo vang,” a ti a.

¹⁴Absaloma leh Israel mite chuan “Ark mi Husaia remruat chu Ahitofela remruat aiin a ṭha zâwk,” an ti a. Absaloma chhiatna tûrin Ahitofela remruat ṭha tak chu LALPA chuan dâl a lo tum rêng a ni.

¹⁵Husaia chuan puithiam Zadoka leh Abiathara hnênah chuan Ahitofelan Absaloma leh Israel upate rem a ruatpui dân te, amah pawhin rem a ruatpui dânte a hrilh bawk a.

¹⁶“Zâninah thlalêr lui kaia riak tawh lovin lui chu kân ngei rawh se. Chutilo zawng, lal leh a hote chu an rawn man vek mai ang’ tiin Davida chu hrilh thuai rawh u,” a ti a.

¹⁷Jonathana leh Ahimaaza chu Jerusalem daifêm, En-Rogel-ah an awm a. Bawihnu pakhat hian anni chu thu thar a va hrilh ṭhîn a, annin Davida an hrilh chhâwng leh ṭhîn a ni. Khawpuia an lût chu tu man an hmu tûr a ni si lo va.

¹⁸Naupang pakhat hian a lo hmu hlauh va, Absaloma a hrilh a; tichuan, anni pahnih chu an tlân bo ta thuai a, Bahurim-a mi pakhat inah an tlân lût a. Ani chuan a tualah tuichhunchhuah a nei a, a chhûngah chuan an lût ta a.

¹⁹In neitupa nupui chuan a chhinnain tuichhunchhuah chu a chhîn a, a chungah buh a pho va; tu man an hmu lo va.

²⁰Absaloma chhiahhlawhte chu hmeichhe hnênah chuan an va kal a, a hnênah, “Ahimaaza leh Jonathana te kha khawiah nge an awm?” an ti a. Hmeichhia chuan, “Lui râl an kai daih tawh ang,” a ti a. Mite chuan an va zawng a; mahse an hmu lo va, Jerusalem-ah an kîr leh ta a.

²¹Chûng mite kal liam hnu chuan anni chu tuichhunchhuah ata chu an lo chhuak a, lal Davida chu an hrilh ta a, a hnênah, “Tho la, lui hi kân thuai rawh u, Ahitofela chuan in chhiatna a zawng rêng si a,” an ti a.

²²Davida leh a hote chu an chhuak a, Jordan lui chu varṭianah an kai vek a.

²³Ahitofelan a remruat an zâwm lo tih a hriatin a sabengtung a thuam a, a khaw lamah a hâwng ta daih a. A chhûngkaw awm dân tûr a rel fel a, a inâwkhlum ta a. A ruang chu a pa thlânah an phûm a.

²⁴Absaloma leh a hnêna Israel awm zawng zawngin Jordan lui an kai lai chuan Davida chuan Mahanaim a thleng a.

²⁵Absaloma chuan Joaba aiah Amasa chu sipai hotu-ah a dah a. Amasa chu Ismael mi Jethera fapa a ni a, Nahasa fanu Abigaili hrin a ni, Abigaili chu Joaba nu Zeruii laizâwn a ni.

²⁶Israel mite leh Absaloma chuan Gilead ramah ṭanhmun an khuar a.

²⁷Davida chuan Mahanaim khua a thlen chuan Amon mi, Raba khuaa Nahasa fapa Sobia te, Lo-debar khua aṭanga Amiela fapa Makira te, Rogelim aṭanga Gilead mi Barzilaia te chuan puanthuah te,

²⁸thleng te, eirêlna bungbêl te an rawn ken a, huit te, barli te, chhangphut te, vaikan te, bê te, thlaihnah te,

²⁹khawizu te, bâwnghnute dak te, berâm te, bâwnghnute um te, Davida leh a mite ei atân an rawn ken a, “Mite chu thlalêrah rilṭâm leh tuihâlin an chau hle tawh,” tih an lo hre si a.