Read Mizo Lushai LEHKHABU PAHNIHNA SAMUELA 19 Bible Online

LEHKHABU PAHNIHNA SAMUELA 19 - Mizo Lushai bible

LEHKHABU PAHNIHNA SAMUELA 19

¹Joaba hnênah, “Lalin Absaloma a sûn a, a ṭap a ṭap mai” an ti a.

²Chu mi nia an hnehna chu sipai zawng zawng tân lungngaihna a ni ta zâwk a. Lal chu a fapa ngaiin a ṭap a ṭap mai tih an hre vek si a.

³Chumi ni chuan mite chu indonaa sipai tlânchhia ang maiin zak takin khuaah an lût nghiai nghiai a.

⁴Lal chuan a hmai a hup a, “Aw ka fapa Absalom, aw Absalom, ka fapa,” tiin a ṭap hawm hawm a.

⁵Joaba chu lal awmna inah chuan a lût a, a hnênah, “Vawiinah hian nang leh i fanu leh i fapate, i nupui leh i hmei te nunna chhanhimtute chu i tizak hle mai.

⁶Nang mah hawtute chu i hmangaih a, nangmah hmangaihtute i hua a, i hote leh sipaiho chu engmahlovah min ngai tih vawiinah hian i tilang chiang hle mai. Absaloma chu dam sela, keini zawng zawng hi thi vek zâwk ila, chu chu i duh dân niin ka hria.

⁷Tûnah kal chhuak la, i mite fuih harh rawh, LALPA chhâlin ka hrilh a che, i va chhuah loh zawngin naktûk zîngah chuan tu mah i hnênah an awm tawh lo vang. Chu chu i tleirâwl lai ata vawiin thlenga i chunga chhiatna lo thleng tawh zawng zawng ai daiha pawi thui zâwk a ni ang,” a ti a.

⁸Lal chu a ṭhu chhuak ta a, kulh kawngka bulah chuan a ṭhu a, “Lal chu kulh kawngka bulah a ṭhu e,” tiin mite chu an va hrilh a. Chu chu an hriatin a mite chu an lo pung khâwm ta a. Israel-te erawh chu mahni puan in ṭheuhvah an tlân hâwng a.

⁹Israel zawng zawng chuan, “Davida chuan kan hmêlmate lak ata min chhan chhuak a, amah ngeiin Filistia mite lak ata min humhim a; tûnah Absaloma râl hlauvin ram hi a chhuahsan a.

¹⁰Kan rorêltu atâna hriak kan thih Absaloma lah chu a thi ta si a. Engtizia nge lal chu hruai hâwn leh zai kan rêl loh?” an ti a, an inhnial mur mur a.

¹¹Lal Davida chuan Zadoka leh Abiathara hnênah mi a tîr a, “Juda upate hnênah heti hian va sawi rawh u, ‘Lal a in lama hruai hâwn thu-ah engtizia nge a muang bera in ṭan le? Israel miten lal hruai hâwn an rawt thu chuan lal beng a thleng tawh si a.

¹²Ka unaute u, ka thisen zawmpui in ni a, lal hruai hâwn thu-ah a zawiawi bera ṭang tûr em in nih?’ ti ula;

¹³Amasa hnênah pawh, ‘Ka thisen zawmpui i ni lo vem ni? Tûn aṭangin ka sipai hotu atân Joaba aiah ka dah loh che chuan Pathianin a tih tihin mi ti sela, na tak pawhin min sawisa mai rawh se, a ti e,’ va ti rawh u,” a ti a.

¹⁴Davida chuan Juda mi zawng zawng rilru chu aikhatah a luantîr ta dual a, lal hnênah chuan, “I mite zawng zawng nên lo haw leh rawh u,” tia hrilh tûrin mi an tîr ta a.

¹⁵Lal chu a lo hâwng a, Jordan lui thlengin a lo kal a, Jordan luia hruai kai tûrin Juda mite chu Gilgal an lo thleng a.

¹⁶Gera fapa Simeia, Benjamin hnam, Bahurim khuaa mi chu lal Davida hmuak tûrin Juda mite rualin hmanhmawh takin a lo chhuak ve a.

¹⁷A rual chuan Benjamin mi sângkhat leh Saula chhûngkaw enkawltu Ziba te, a fapa sâwm leh panga leh a chhiahhlawh sawmhnih lai lal thlen hmain Jordan an lo thleng a.

¹⁸Lal chhûngkuate hruai tûr leh ṭûl a tih a piang ti tûrin lui chu an kal kai a. Gera fapa Simeian Jordan lui a kai veleh lal hmaah a bawkkhup a,

¹⁹Lal hnênah chuan, “Ka pu, khawngaih takin min ngaidam rawh; ka pu, Jerusalem i chhuahsan nia i chhiahhlawhin i chunga ka tihsual chu min theihnghilhsak tûrin ka ngên a che.

²⁰Kei, i chhiahhlawh hian thil ka tisual tih ka hria; mahse, vawiinah ka pu lal lo hmuak tûrin Josefa chhûngte zînga he hmun rawn thleng hmasa ber hi ka ni,” a ti a.

²¹Zeruii fapa Abisaia chuan, “LALPA hriakthih ânchhia a lawh avângin Simeia hi tihhlum tûr a ni lâwm ni?” a ti a.

²²Davida chuan, “Zeruii fate u, min rêlpui tûr eng nge awm? Min hnial min hnial mai a. Vawiinah, Israel mi rêng rêng, tu mah tihhlum tûr a ni lo; kei hi Israel-te lal ka ni lo vem ni?” a ti a.

²³Lal chuan Simeia hnênah, “I thi lo vang,” tiin a tiam a.

²⁴Saula tupa Mefiboseta chu lal hmuak tûrin a lo chhuak a. Lalin Jerusalem a chhuahsan aṭanga dam taka a lo hâwn leh thlengin ani chuan a kete a sil lo va, a khabehmul a mêt lo va, a puante a su hek lo.

²⁵Lal hmuak tûrin Jerusalem aṭang chuan a lo kal a, lal chuan a hnênah, “Mefiboset, engati nge ka hnênah i lo kal ve loh?” a ti a.

²⁶Ani chuan, “LALPA, ka pu, ka chhiahhlawhin min bum atin a ni, a hnênah, ‘lal hnêna ka kalna tûr sabengtung buatsaih rawh,’ ka ti a, kei lah hi ka ke a zeng si a.

²⁷Ani chuan, ka pu lal hnênah chuan min hêk a; mahse, LALPA, ka pu chu Pathian vântirhkohte ang a ni a, ṭha i tih ang angin ti ang che.

²⁸Ka pa chhûngte zawng zawng chu, LALPA, ka pu chuan tihlum vek âwm rêng a ni; mahse, i chhiahhlawh hi i chaw kîlpuiah min siam a. Chuvângin, lal hnênah hian eng dang han dîl ngam tûr ka ni em ni?” a ti a.

²⁹Lal chuan a hnênah, “In chungchâng thu hi engah nge i sawi leh ṭhin? Nang leh Ziba chuan Saula ram chu insem rawh u ka tih tawh kha,” a ti a.

³⁰Mefiboseta chuan lal hnênah, “Ziba chuan ram chu nei vek rawh se, ka pu lal chu ama in ngeiah râlmuang takin a lo thleng tawh si a,” a ti a.

³¹Gilead mi Barzilaia chu Rogelim aṭangin Jordan luia lal hruai kai tûrin lal rualin a lo chhuk ve a.

³²Barzilaia chu upa tak, kum sawmriat mi lai a ni a. Mi awm thei tak a nih avângin Mahanaim-a lal Davida a chawlh chhûng zawng zawng khân ei tûr a tumsak a.

³³Lal chuan Barzilaia hnênah, “Jerusalem-ah lo kal ve la, ka bulah awm ang che,” a ti a.

³⁴Barzilaia chuan lal hnênah, “Ka dam rei tawh awm si lo va, eng vângin nge Jerusalem-ah lal hnêna ka han chhoh ve kher ang?

³⁵Kum sawmriat lai ka ni tawh a, eng mah hi ka tâna nuam a awm tak tak tawh lo va, i chhiahhlawh hian a tui leh tui lo pawh ka hre tawh lo va, nula tlangvâl zai ri lah ka hre thei tawh si lo. Engah nge i chhiahhlawh hian, ka pu lal ka tihhautak ang che?

³⁶I chhiahhlawh hian, lal hi, Jordan lui kaipui che ka tum mai a ni. Engah nge lal chuan chutianga lâwmman min pêk i tum le?

³⁷Khawngaih takin i chhiahhlawh hi min hâwntîr mai la, ka nu leh pa thlân bul, kan khuaah ka thi ang e. Amaherawhchu, hei, i chhiahhlawh, ka fapa Chimhama hi hruai la; ka pu lalin ṭha i tih angin i chhawr atân awm rawh se,” a ti a.

³⁸Lal chuan a chhâng a, “Chimhama chuan min zui sela, ṭha i tih apiang ka tihsak ang a, eng pawh i dîl apiang ka lo pe zêl ang che,” a ti a.

³⁹Mi zawng zawngin Jordan lui an kal kai a, lal pawhin a kai ve a; lal chuan Barzilaia chu a fâwp a, mal a sâwmsak a; tichuan, a in lamah a haw leh ta a.

⁴⁰Lal chuan Gilgal a lo thleng a, Chimhama pawh a hruai a, Juda mi zawng zawng leh Israel hnam zâtve laiin lal chu an vêng ta a.

⁴¹Israel mi zawng chuan lal hnênah, “Engati nge kan unau Juda-te hian nang leh i chhûngte chu i hote nên Jordan lui a rûka an lo hruai kai bîk mai che le?” an ti a.

⁴²Juda mi zawng zawng chuan, “Lal hi kan lamhnai a nih avâng chauhva hruai kai kan ni a; engtiziaa thinur mai nge in nih le? Lal neih kan eiin lâwmman kan dawng a ni bîk hlei nêm,” an ti a.

⁴³Israel-te chuan Juda-te chu an chhâng a, “Davida lala siam thu-ah in lamhnai ni mah se, a lêt sâwmin thu kan nei asin. Lala hruai kîr leh rawt hmasatu kan nih kha hre ta rêng che u,” an ti a. Mahse, Juda mite thu chu Israel mite thu ai chuan a rum ta zâwk mah a.