Read Mizo Lushai LEHKHABU PAHNIHNA SAMUELA 2 Bible Online

LEHKHABU PAHNIHNA SAMUELA 2 - Mizo Lushai bible

LEHKHABU PAHNIHNA SAMUELA 2

¹Chumi hnu chuan Davidan LALPA hnênah, “Judai ram khaw puiahte chuan ka han chho ang em?” tiin a zâwt a. LALPA chuan, “Chho ta che,” a ti a. Davida chuan “Khawiah nge ka han kal ang?” a ti a. Ani chuan, “Hebron-ah” a ti a.

²Tichuan, Davida chu a nupui pahnih, Jezreel mi Ahinoami leh Karmel tlânga Nabala nupui thihsan Abigaili hruaiin chutah chuan a han chho va.

³Davida chuan a mi, a ṭhuihruaite chu, an chhûngte ṭheuh nên a hruai bawk a; Hebron leh a chhehvêl khuaahte chuan an awm ta a.

⁴Judai ram mite chu an lo kal a, Davida chu Judai ram lal atân hriak an thih ta a. Jabes-gilead mite chuan Saula an phûm tih Davida chu an hrilh a.

⁵Ani chuan Jabes-gilead mite hnênah mi a tîr a, “In pu, Saula chungah in rinawm hle a, ani chu in lo phûm tâk avângin Pathianin malsâwm che u rawh se.

⁶LALPA chuan khawngaih che uin a rinawmzia in chungah lantîr zêl sela, he thil in lo tih avâng hian kei pawhin in chungah ṭhat ka chhuah ve ang.

⁷Tûnah ngaihngam takin awm ula, zâm rêng rêng suh u. In pu Saula chu thi tawh mah se, kei hi Juda mite chuan an lal atân hriak min thih ta a ni,” a ti a.

⁸Chutih lai chuan Nera fapa Abnera, Saula sipai hotu chuan Isboseta chu Jordan ral Mahanaim hmunah a rawn hruai a.

⁹Gilead-ah te, Aser-ah te, Jezreel-ah te, Efraim-ah te, Benjamin ramah te leh Israel ram zawng zawng chunga lal atân a siam a.

¹⁰Saula fapa Isboseta chu Israel lal a nih tirh chuan kum sawmlina upa a ni; kum hnih chhûng a lal a. Juda mite erawh chuan Davida chu lalah an pawm a.

¹¹Davida chu Hebron khuaah kum sarih leh thla ruk lai Juda mite chungah a lal ta a.

¹²Nera fapa Abnera chu Saula fapa Isboseta mite nên Mahanaim aṭangin Gibeon-ah an lo kal a.

¹³Zeruii fapa Joaba leh Davida mite pawh an lo kal a, Gibeon dîl kamah an intâwk a. Ho khat dîl râl lehlamah an ṭhu a, a ho dang râl lehlamah an ṭhu bawk a.

¹⁴Abnera chuan Joaba hnênah, “Tlangvâlte chu zât leh zâtin thlang chhuak ila, kan hmaah han inbei teh se,” a ti a.

¹⁵Tichuan, Benjamin lamṭangte chu mi sâwm leh pahnih an lo chhuak a, chutiang bawkin Davida lamṭangte pawh an lo chhuak bawk a.

¹⁶Mahni khingpui ṭheuh lu-ah an ṭhâm a, an bitum ṭheuhte nên chuan an invit a, an thi za ta vek a. Chuvâng chuan, chu hmun chu Helkat-Hazurim an ti ta a, chu chu Gibeon-a awm a ni.

¹⁷Chumi ni chuan nasa takin an inbei ta a, Davida mite chuan Abnera leh Israel mite chu an hneh a.

¹⁸Chu inbeihnaah chuan Zeruii fapa pathum Joaba te, Abisaia te, Asahela te an tel a, Asahela chu zukpui ang maia ngalchak a ni.

¹⁹Asahela chuan ding lamah emaw, vei lamah emaw pawh pêng lovin Abnera chu a ûm ngat ngat a.

²⁰Abnera chu a han lehhawi a, “Nang i ni maw, Asahel,” a ti a. Ani chuan, “Ni e,” tiin a chhâng a.

²¹“Ding lamah emaw, vei lamah emaw min pênsan la, tlangvâl pakhat kha man mai la, a râlthuam hlihsak rawh,” a ti a. Asahela chuan a ûm chu a bânsan duh lo.

²²Abnera chuan Asahela hnênah, “Min ûm tawh suh, ka that palh ang che, i u Joaba hmêl ka hmu ngam dâwn em ni?” a ti leh a.

²³Mahse, Asahela chuan a ûm lui zêl a; Abnera chuan a fei hmâwr zum lo lamin a pumah a lo chhun a, fei chu a hnungah a tlang a, chumi hmunah chuan a tlu tawp a, a thi ta a. Asahela a tlûka, a thihna hmun lo thleng apiang chu an ding chawt zêl a.

²⁴Joaba leh Abisaia chuan Abnera chu an la ûm zêl a, Gibeon thlalêr panna Gia chhak lama Ama tlâng an thlenin ni a tla a.

²⁵Benjamin thlahte chu Abnera bulah chuan an pung khâwm a, pâwl khata insiamin tlângchhîpah ṭanhmun an khuar a.

²⁶Abnera chuan Joaba chu a au va, “Kan inbei reng dâwn em ni? Hei hian a tâwpa inhuatna mai lo chu eng mah sâwtna a awm lo tih i ngaihtuah na nge? Engtikah nge mite chu an unaute ûm tawh lo tûra i hrilh dâwn?” a ti a.

²⁷Joaba chuan, “Pathian nung chhâlin ka sawi e, eng mah sawi lo la chu, mite chuan naktûk zîng thlengin an unaute an la ûm dâwn asin le’” a ti a.

²⁸Tichuan, Joaba chuan tawtawrâwt a han hâm a, a mite chu an ding ṭhup a, Israel-te chu an ûm ta lo va, an bei leh ta hek lo.

²⁹Abnera leh a mite chu zankhuain an kal a, Araba an kal tlang a, Jordan lui an kân a, nilêngin an kal leh a, Mahanaim chu an thleng ta a.

³⁰Joaba chuan Abnera a ûm chu a kîrsan a, a mite chu a ko khâwm vek a, Asahela bâkah Davida mite sâwm leh pakua lai an kim lo tih a hre ta a.

³¹Davida hote erawh chuan Benjamin hnam Abnera hote chu mi zathum leh sawmruk lai an that a.

³²Asahela ruang chu an la a, Bethlehem-a a pa thlânah an phûm a, Joaba leh a mite chu zankhuain an kal a, a tûk khawvârah chuan Hebron an thleng ta a.