Read Mizo Lushai LEHKHABU PAHNIHNA SAMUELA 20 Bible Online

LEHKHABU PAHNIHNA SAMUELA 20 - Mizo Lushai bible

LEHKHABU PAHNIHNA SAMUELA 20

¹Gilgal-ah chuan Benjamin hnam, Bikria fapa Seba, mi sual tak a lo awm kher a. Ani chuan tawtawrâwt a hâm a, “Davida hnênah chan kan nei lo va, Jesaia fapa hnênah eng mah chan tûr kan nei lo. Aw Israel mite u, inah haw vek rawh u,” a ti a.

²Chutichuan, Israel mi zawng zawngin Davida zui duh lovin Seba chu an zui ta a. Juda mite erawh chuan Jordan aṭangin Jerusalem thlengin an lal chu rinawm takin an zui tlat a.

³Davida chuan Jerusalem-a lal in chu a lo thleng a, a in nghâka a dah, a hmei sâwmte chu a hruai a, a vêng tlat a, a châwm a; mahse, an hnênah a lût lo. An damchhûngin a khung tlat a, hmeithai angin an awm a.

⁴Lal chuan Amasa hnênah, “Ni thum chhûngin Juda mite hi ko khâwm la; tah chuan, nang pawh lo awm ve ang che,” a ti a.

⁵Amasa chu Juda mi ko khâwm tûrin a chhuak a; mahse, hun ruat aiin a va thang rei a.

⁶Davida chuan Abisaia hnênah, “Bikria fapa Seba hian Absaloma ai mahin min tibuai dâwn alâwm le; i pu vêngtute hruai la, ûm rawh u; chutilo zawng, kulh nei khuaahte a lût ang a, kan hmuh phâk lovah a chhuak hlauh dah ang e,” a ti a.

⁷Joaba hote, Keret mi te, Pelet mi te leh an mi chak zawng zawng te chuan Abisaia chu an zui a, Jerusalem aṭang chuan Bikria fapa Seba ûm tûr chuan an chhuak ta a.

⁸Gibeon lungpui lian an va thleng a, Amasa chuan a lo hmuak a. Joaba chuan indo thuam a inbel a, a kâwnghrênah khandaih, a pâi chawpin a pai a. A kal zâwng chuan khandaih chu a dawk chhuak a.

⁹Joaba chuan Amasa hnênah, “Unaupa, i dam zêl alâwm maw?” a ti a. Joaba chuan Amasa chu fawh tum awm takin a khabehmul a kut ding lamin a chelhsak a,

¹⁰Amasa chuan Joaban khandaih a keng tih a hre lo va, Joaba chuan a pumah a vit a, a rîlte a tla ta nuai a, vih nawn ngai lovin Amasa chu a thi ta a. Joaba leh a unaupa Abisaia chuan Bikria fapa Seba chu an ûm zêl a.

¹¹Joaba mite zînga pakhat Amasa ruang bulah chuan a ding a, “Tu pawh Joaba leh Davida lama ṭang apiangin Joaba zui rawh se,” a ti a.

¹²Amasa ruang chu kawng laiah a awm a, thi-in a bual nasa hle mai a, lo kal apiang chuan an en a, an ding zêl a; chu mi chuan mi zawng zawngin an dinchilh zêl tih a hmuhin Amasa ruang chu kawng ata phûlah a hnûk thla a, puanin a khuh ta a.

¹³Kawng ata a lâk sawn hnu chuan Bikria fapa Seba ûm tûrin mi zawng zawng chuan Joaba chu an zui ta a.

¹⁴Seba chuan Israel hnam tin ram chu a fang chhuak a, Abel-beth-maaka khua a lo thleng a, Bikri mite chu an pung khâwm a, ani chu an pui ta a.

¹⁵Joaba mite chu an lo thleng a, Abel-beth-maaka chu an rawn hual a, kulh bang pâwnah chuan lei an chhûng pâwng a, a kulh bang tihchim tumin an chhu bur bur a.

¹⁶Hmeichhe fing tak hi kulh aṭang chuan a rawn au va, “Khaih, Joaba kha lo kal hnai sela, thu ka lo hrilh ang e, tih han hrilh teh u khai,” a ti a.

¹⁷Tichuan, hmeichhe hnênah chuan a va kal hnai a, hmeichhia chuan a hnênah, “Joaba i ni em?” a lo ti a. Ani chuan, “Ni e,” a ti a. Hmeichhia chuan a hnênah, “I bawihnu thu sawi hi ngaithla teh,” a ti a. Ani chuan, “Ka ngaithla e,” a ti a.

¹⁸“Hmânlai chuan ‘Abel’ khuaah thurâwn va dawng rawh,’ an ti ṭhîn a, chutiang chuan thu an titlu ṭhîn.

¹⁹Keini hi Israel zînga inremna duhtu leh rinawm taka awm ṭhîn kan ni a; mahse, nang chuan Israel ram khaw hlun, LALPA pual chu tihchhiat i tum a nih hi le,” a ti a.

²⁰Joaba chuan, “Chutiang a ni awzâwng lo, tihchhiat leh nuai bo ka tum hlei nêm.

²¹Chutiang lam a ni lo. Amaherawhchu, Efraim tlângram mi, Bikria fapa Seba kha lal Davida lakah a hel a, ani chu min pe ula, khua chu ka tawlh kîrsan ang e,” a ti a. Hmeichhia chuan Joaba hnênah, “Aw le, a lu chu kulh bang pâwnah ka rawn vawm chhuak ang e,” a ti a.

²²Hmeichhia chuan fing takin mipui chu a va hmin a, Bikria fapa Seba lu chu an tansak a, Joaba hnênah an rawn theh chhuak ta a. Tin, Joaba chuan tawtawrâwt a hâm a, khawpui chu an ṭînsan ta a. Mite chu mahni in lamah an haw ṭheuh va, Joaba pawh lal hnênah Jerusalem-ah a haw ta a.

²³Joaba chu Israel sipai zawng zawng hotu a ni a; Jehoiada fapa Benaia chu Keret mite leh Pelet mite hotu a ni a.

²⁴Adorama chu kuli hotu a ni a, Ahiluda fapa Jehosafata chu chanchin la khâwmtu a ni.

²⁵Seva chu ziaktu a ni a, Zadoka leh Abiathara te chu puithiam an ni.

²⁶Jair mi Ira pawh chu Davida puithiam a ni.