Read Mizo Lushai LEHKHABU PAHNIHNA SAMUELA 22 Bible Online

LEHKHABU PAHNIHNA SAMUELA 22 - Mizo Lushai bible

LEHKHABU PAHNIHNA SAMUELA 22

¹Davida chuan LALPAN a hmêlmate kut ata leh Saula kut ata a chhan chhuah ni chuan LALPA fak nân he hla hi a sa a.

²“LALPA chu ka lungpui leh ka kulhbîng, Min chhandamtu a ni.

³Ka Pathian chu min humhimtu, ka hahchawlhna a ni, Ka phaw leh ka himna ber, ka kulhbîng sâng, Ka tlûkluhna tûr a ni. Min beitu laka chhantu chu i ni.

⁴Fak tlâk LALPA chu ka ko vang a, Ka hmêlmate lakah ka him ang.

⁵Thihna tuifâwnte chuan min chîm a, Chhiatna tuifâwnte chuan min khuh zo ta.

⁶Seol hrualhruite chuan mi phuar a, Thihna chuan thangin min hual vêl.

⁷Mangang takin LALPA chu ka au va, Ka Pathian chu ka ko va, Ani chuan a Tempul aṭangin ka aw a lo hria a, Ka au thâwm chu a lo ngaithla.

⁸A thinur avângin lei hi a nghîng a, A che hlawk hlawk a, Vân innghahna chu a nghîng a, a khûr dur dur a.

⁹A hnâr aṭangin meikhu a lo chhuak ngut ngut a, A kâ aṭanga lo chhuak mei chu a alh hluah hluah a, A ṭêk chuai chuai mai.

¹⁰Ani chuan vânte chu a tihawng a, a lo chhuk a, A ke hnuaiah thim chhah mup a awm.

¹¹Cherub chunga chuangin a thlâwk a, Thli chuan a thlawhpui.

¹²Thim chhah mupin a hual vêl a, Chhûm chhah tak ruah pai chhûm chuan a hual a.

¹³A hmaa êng awmah chuan, Meilingte chu a alh hluah hluah.

¹⁴ LALPA chuan vânah khawpui a tiri dur dur a, Chungnungbera chu a au va.

¹⁵Hmêlmate chu thalin a kâp a, ṭêk a dentîr a, a ûm darh zo ta.

¹⁶ LALPA chuan a hau va, A hnâra thawin a chhêm vak a, Tuipui mawngte leh leilung nghahchhante chu A lang zo ta.

¹⁷Chung lam aṭangin mi rawn ban a, mi chelh a, Tui thûk tak ata min hnûk chhuak a.

¹⁸Ka hneh loh, ka hmêlma hlauhawm tak tak, Mi hawtute laka ta chu mi chhan chhuak a.

¹⁹Anni chuan ka mangan laiin min bei a, LALPA chuan mi hum a.

²⁰Ani chuan hmun râlmuangah min dah a, Ka chunga a lâwm avângin mi chhanhim ta.

²¹ LALPA chuan dik taka ka tih avângin mal min sâwm a, Pawi ka khawih loh avângin mi zuah ta.

²² LALPA kawngte chu ka zawh a, Ka Pathian chu ka sual bosan ngai lo.

²³Awm dân tûra a tih zawng zawng ka pawisa a, A thuruatte chu ka zâwm lo ngai lo.

²⁴A hmaah chuan sawisêlbovin ka awm a, Sual lakah ka invêng ṭhîn.

²⁵ LALPA chuan dik taka ka tih avângin mal min sâwm a, Pawi ka khawih lo, A hmu reng a ni.

²⁶Mi ngilneite chungah ngil i nei a, Sawisêlbote lakah sawisêlbo i ni.

²⁷Mi thianghlimte tân i thianghlim a, Mi luhlulte lakah i luhlul a.

²⁸Mi tlâwmte chu i chhan a, Mi chapote chu i titlâwm ta.

²⁹Aw LALPA, nang hi ka êng i ni a, LALPA chuan ka nun thimte a tiêng ta.

³⁰A ni, râl bei tûrin min tichak a, Ka Pathian ṭanpuinain an kulh bangte ka ṭhiat.

³¹Pathian hi zawng a dik famkim a, LALPA thute chu innghahna tlâk a ni. Amah pantute tân ani chu phaw a ni.

³² LALPA lo chu tu nge Pathian dang awm, Kan Pathian lo chu tu nge lungpui dang awm?

³³He Pathian hi ka tlûkluhna kulh nghet, Ka kawng tihimtu chu a ni.

³⁴Ka kete chu zukpui anga chakin a siam a, Tlâng sângah te him takin mi awmtîr a.

³⁵Ka kutte hi râl do a zirtîr a, Ka bânte hian dâr thalngul a kuai zo ta hial a.

³⁶Min hmu a, i phawin min khuh ta; Min ṭanpui avângin ka ropui ta.

³⁷Ka ke pên i tisau va, Min man phâk ta lo.

³⁸Ka hmêlmate ka ûm a, ka hneh a, Ka tihboral vek hma chu ka kîrsan lo.

³⁹Ka thehthlu a, ka thehthal rum a, An tho leh tawh ngai lo, Ka rapbet ta a ni.

⁴⁰Indo tûrin min tichak a, Ka hmêlmate chu min tihtlâwmsak ta.

⁴¹Ka hmêlmate ka ûm a, Min hawtute chu ka tiboral ta.

⁴²An hawi vêl a; mahse, chhantu an nei si lo, LALPA an au va; mahse, a chhâng duh lo.

⁴³Leia vaivut angin ka vaw dip a, Kawtthlêra chirh angin ka rap pherh a.

⁴⁴Nangin ka laka helhote kut ata min chhan chhuak a, Israel-te hotu atân mi humhim a, Ka hriat ngai lohte pawh ka khualehtui an lo ni ta.

⁴⁵Ram dang mite chuan min rawn tlawn a, Ka sawi apiang an awih.

⁴⁶Hnam dangte chu an zâm a, An kulhbîng ata khûr chungin an lo chhuak ta.

⁴⁷ LALPA mi nung, ka lungpui chu fakin awm rawh se, Ka inhumhimna lungpui, Pathian chu chawimawiin awm rawh se.

⁴⁸Ani chu phuba mi lâksaktu Pathian a ni, Hnamte chu ka ke hnuaiah a dah.

⁴⁹Ka hmêlmate lak ata min chhan chhuak a, A ni, mi dotute chungah mi dah ta, Mi nunrâwngte lakah chuan min chhan ta.

⁵⁰Chuvângin, aw LALPA, hnam tin zîngah ka fak ang chia, I hming fakin ka zai ang.

⁵¹A lal thlan chu ropui takin a hnehtîr a, A hriakthih Davida chungah leh a thlahte chungah, Kumkhuain a ngilneihzia a lantîr ang,” a ti a.