Read Mizo Lushai LEHKHABU PAHNIHNA SAMUELA 23 Bible Online

LEHKHABU PAHNIHNA SAMUELA 23 - Mizo Lushai bible

LEHKHABU PAHNIHNA SAMUELA 23

¹Hei hi Davida thu sawi hnuhnûng ber chu a ni, Jesaia fapa Davida thu sawi chu:

²Sâng taka Pathian chawisân, Jakoba thlah Pathian hriakthih, Israel tâna hla mawi tak tak phuahtu thute chu. “LALPA thlarau chuan ka hnênah thu a sawi a, A thute chu ka kâah a dah ta.

³Israel-te Pathian, an lungpui chuan ka hnênah thu a sawi: ‘Mite chunga dik taka rorêla, Pathian ṭih chunga ro rêl ṭhîntu hnênah chuan.

⁴Chu mi chu khaw thiang ni chhuak mawi tak ang hi a ni, Ruahsûr bân khaw thianga thlai lo harh sêrh ang hi.’

⁵Chu chu Pathianin kan chhûngkua min din dân a ni lâwm ni? Kumkhua atân ka hnênah thu a thlung a, Tihdanglam leh tawh loh tûr chu. Min chhandamin duhthusâm min pe lo vang em ni?

⁶Mi suaksualte erawh chu hlîng anga paih bo an ni ang, Kut lâwnga khawih ngam an ni si lo va.

⁷Khawihtu tûr chuan thîr leh feingul hmang sela, Hâl ral vek tûr an ni.

⁸Hêng hi Davida sipai huaisente hming chu a ni: Takemon mi Joseb-basebeta chu ‘huaisen pathum’ zînga chhuanvâwr ber a ni, Ezni mi Adinoa tih a ni bawk. Ani chuan fei a lek a, an inbeihnaah ṭum khatan mi zariat a that a ni.

⁹A dawt chu Eleazara, Aho chi, Dodoa fapa a ni. Chumi chu Filistia mite indo tûra an pun khâwma Israel-te an tlân darh vek lai khân Davida nêna hmêlmate chotu, ‘sipai huaisen pathumte’ zînga mi kha a ni.

¹⁰A thawk lawk a, Filistia mite a that chiam a, a kut kham lutuk avângin a khandaih pawh a thlah thei lo hial a ni. Chumi ni chuan LALPAN ropui takin a hnehtîr a, Israel sipaite chu râllâk sum chuh tûr ngawtin an lo kîr leh a nih kha.

¹¹A dawt lehtu chu Sama, Harar mi, Agea fapa a ni. Filistia mite chu dailuah tamna hmun Lehi-ah an pung khâwm a, Israel-te chu hmêlma hmaah an tlânchhia a,

¹²ani erawh chu a ṭanhmunah a ding tlat a, Filistia mite chu a that a, LALPA chuan ropui takin a hnehtîr a.

¹³Buhseng ṭan tirh laiin mi huaisen sawmthum zînga pathumte chu Davida awmna Adulam pûkah an chhuk a. Filistia sipai pâwl khat chuan Refaim-ho hmunah ṭanhmun an khuar a.

¹⁴Chutih lai chuan Davida chu kulhbîngah a awm a, Filistia sipaiho erawh chu Bethlehem-ah an awm a.

¹⁵Davida chuan, “Aw, Bethlehem kulh kawngkhâr kianga tuichhunchhuah tui kha tuin emaw min va chawisak se ka va ti em!” a ti a.

¹⁶Sipai huaisen pathumte chuan Filistia-ho riahhmun chu an tâwn tlang a, kulh kawngkhâr kianga tui chu an va chawi a, Davida hnênah an rawn la a. Nimahsela, ani chuan a lo in duh ta lo va. LALPA tân a bun chhuak ta zâwk a.

¹⁷Heti hian a ti a, “Aw LALPA, hei hi ka in loh tûrzia mai chu. Thih huama kalte thisen chu ka in ang maw?” a ti a. Tichuan, a in duh ta lo va. Chûngte chu huaisen pathumte thiltih chu a ni.

¹⁸Zeruii fa Joaba u Abisaia chu ‘mi huaisen sawmthum’ zînga hotu ber a ni a. Mi zathum a feiin a that a, ‘huaisen sawmthumte’ zîngah chuan hmingṭhat a hlawh a.

¹⁹Mi huaisen sawmthum zînga chhuanawm ber a ni a, chuvângin, an hotu-ah an siam a; mahse, mi huaisen pathum an tihte zîngah a tel pha lo.

²⁰Jehoiada fapa Benaia, Kabzeel khaw mi pawh a huaisen hle, thil ropui tak a ti, Moab mi huaisen pahnih a that a. Tin, vûr tlâk laiin pûka tawm sakeibaknei a that bawk a.

²¹Aigupta mi, palian tak a that bawk. Aigupta mi chuan fei a keng a, Benaia chuan tiang nên a pan thla a, Aigupta mi fei chu a chhuhsak a, a fei ngei chuan a chhun hlum a.

²²Jehoiada fapa Benaia chuan chutiang thil chu a tih avângin ‘Sipai huaisen sawmthum’ zînga chhiar tel a ni.

²³‘Mi huaisen sawmthum’ zîngah chuan a hming a ṭha ber a; mahse, mihuaisen pathumte zîngah chuan a tel pha lo. Davida chuan amah vêngtu hotu-ah a dah a.

²⁴Joaba nau Asahela chu mi huaisen sawmthum zînga mi a ni a. Bethlehem khuaa mi Dodoa fapa Elhanana te,

²⁵Harod mi Sama te, Harod mi Elika te,

²⁶Pelet mi Heleza te, Tekoa mi Ikesa fapa Ira te,

²⁷Anathot mi Abiezera te, Husa mi Mebunaia te,

²⁸Aho mi Zalmona te, Netofa mi Maharaia te,

²⁹Netofa mi Baana fapa Heleba te, Benjamina thlah Gibea khaw mi Ribaia fapa Itaia te,

³⁰Pirathon mi Benaia te, Gaas luitêa mi Hidaia te,

³¹Arabat mi Abi-Albon-a te, Bahurim mi Azmaveta te,

³²Salbon mi Eliaba te, Jasena fapate zînga mi Jonathana te,

³³Harar mi Sama te, Harar mi bawk Sarara fapa Ahiama te,

³⁴Maaka mi Ahasbaia fapa Elifeleta te, Gilo mi Ahithofela fapa Eliama,

³⁵Karmel mi Hezroa te, Arba mi Paaraia te,

³⁶Zoba mi Nathana fapa Igala te, Gad mi Bania te,

³⁷Amon mi Zeleka te, Joaba râlthuam kengtu Beerot mi Naharaia te,

³⁸Jatir mi Ira leh Gareba te,

³⁹Hit mi Uria te an ni. An za chuan sawmthum leh pasarih an ni.