Read Mizo Lushai LEHKHABU PAHNIHNA SAMUELA 24 Bible Online

LEHKHABU PAHNIHNA SAMUELA 24 - Mizo Lushai bible

LEHKHABU PAHNIHNA SAMUELA 24

¹Israel-te chungah chuan LALPA chu a thin a ur ta a. Davida chu an chunga buaina thlen tûrin a chawk tho va, a hnênah, “Kal la, Israel-te leh Juda-te chhiar rawh,” tiin.

²Lal chuan a sipai hotu Joaba hnênah, “I sipai hotute nên Israel mite awmna hmun tin, Dan aṭanga Beer-seba thlengin fang chhuak ula, mi eng zât nge an nih hre tûrin chhiar vek rawh u,” a ti a.

³Joaba chuan lal hnênah, “LALPA, i Pathian chuan i mite chu a lêt za aia tamin tipung sela, i mit ngeiin chu chu hmuhtîr che rawh se; amaherawhchu, eng atân nge chu chu ka pu lal hian hriat i duh kher le?” a ti a.

⁴Nimahsela, Joaba leh a sipai hotute chuan lal thu chu an hnial ngam si lo va, Joaba leh sipai hotute chu Israel-te chhiar tûr chuan lal hnên ata chu an chhuak ta a.

⁵Jordan lui an kân a, Gad mite lui ruama Aroer khaw chhim lamah awmhmun an khuar a, hmâr lam panin Jazer-ah an kal a.

⁶Gilead-ah te, Hit-ho ram Kades-ah te an kal a, Dan an pan a, khawthlang lama inherin Sidon an thleng a,

⁷chhim lam an pan a, Tura kulh an tlawh a, Hiv leh Kanan-ho khua an tlawh vek a, Judai ram chhim lam Beer-seba an thleng a.

⁸Ram an fan chhuah hnu, thla kua leh ni sawmhnih hnu chuan Jerusalem-ah an lo kîr a.

⁹Joaba chuan mihring an chhiar chhuah zât chu lal a hrilh a, Israel ramah chuan khandaih keng mi, mi huaisen nuai riat an awm a, Juda mi chu nuai nga an awm tih a hrilh a.

¹⁰Chhiarpui an zawh hnu chuan Davida chu a inthiam lo ta hle a. Davida chuan LALPA hnênah, “Thil ka lo tisual nasa hle mai; mahse, tûnah hian, Aw LALPA, i chhiahhlawh khawlohna hi la bo tûrin ka ngên a che, thil âtthlâk takin ka lo ti a ni,” a ti a.

¹¹Zînga Davida a lo thawh chuan LALPA thu chu Davida zâwlnei Gada hnênah a lo thleng a.

¹²“Thil chi thum thlan tûr ka ruatsak a; kal la, a chunga ka tih tûr ber pakhat thlang tûrin Davida chu hrilh rawh,” a ti a.

¹³Gada chu Davida hnênah a kal a, chûng thu chu a hrilh a, a hnênah, “A eng ber chu nge i thlan dâwn inngaihtuah rawh le: I rama kum thum chhûng ṭâm tuar nge, i hmêlmaten thla thum chhûng an ûm che nge, i rama ni thum chhûng hripui lêntîr? Mi tîrtu engtin nge ka chhân ang min hrilh rawh,” a ti a.

¹⁴Davida chuan Gada hnênah, “Thlan ngaihna ka va hre lo ve. LALPA kutah tlulût phawt mai ila, a lainatna a nasa a, mihring kutah chuan min tlûkluhtîr lul suh ang che,” a ti a.

¹⁵LALPA chuan Israel-te chungah ni thum chhûng hripui a lêntîr ta a, Dan aṭanga Beer-seba thlengin mi sîngsarih an thi a.

¹⁶Vântirhkohvin tichhe tûra Jerusalem lama a kut a han lek chuan LALPAN chu thil ṭha lo tak tih a tum chu a sût a, mite tiboraltu Vântirhkoh hnênah chuan, “A tâwk tawh e, i kut lek tawh suh,” a ti a. LALPA tirh Vântirhkoh chu Jebus mi Arauna hruih bulah a awm a.

¹⁷Davidan mite tiboraltu Vântirhkoh chu a hmuhin LALPA hnênah, “Ngai teh, ka lo sual a ni, dik lo takin ka lo ti ta a; mahse, hêng berâmte hian eng nge an tihsual? Kei leh ka chhûngte hi min hrem zâwk tûrin ka ngên a che,” a ti a.

¹⁸Chumi ni chuan Gada chu Davida hnênah a lo kal a, a hnênah, “Chho la, Jebus mi Arauna hruihzâwlah LALPA tân maichâm siam rawh,” a ti a.

¹⁹LALPA thupêk, Gadan a hrilh ang chuan Davida chu a chho ta a.

²⁰Arauna chu a han hawi a, lal leh a chhiahhlawhte a lam pana an lo kal chu a hmu a, Arauna chuan a pan a, bawkkhupin lal chu chibai a bûk a.

²¹Arauna chuan, “Engtiziaa LALPA, ka pu chu, a chhiahhlawh hnênah lo kal nge a nih le?” a ti a. Davida chuan, “Mipui zînga hri lêng a kian theih nân LALPA maichâm siamna tûrin i hruihzâwl rawn lei ka tum a ni” a ti a.

²²Arauna chuan Davida hnênah, “Ka pu, lal chuan ṭûl i tih chu hmang la, i duh apiang chu hlân rawh. Hei hâlral thilhlan atân bâwngpa te, thingtuah atân hruih hmanrua te leh bâwng nghâwngkawl te a awm a.

²³Hêng zawng zawng hi, aw lalber, ka pe vek a che,” a ti a. Arauna chuan lal hnênah, “LALPA i Pathian chuan i thilhlan chu lo pawm rawh se,” a ti bawk a.

²⁴Lal chuan Arauna hnênah, “Chutiang zawng ni lo ve, a leiin ka lei zâwk ang e; eng mah insêng lovin LALPA ka Pathian hnênah hâlral thilhlan ka hlân tawp lo vang,” a ti a. Tichuan, Davida chuan hruihzâwl leh bâwngpate chu tangka tlang sawmngain a lei ta a.

²⁵Davida chuan chutah chuan LALPA tân maichâm a siam a, hâlral thilhlan leh remna thilhlan a hlân a, LALPA chuan ram tâna a dîlna chu a chhâng a, Israel rama hri lêng chu a reh ta a.