Read Mizo Lushai LEHKHABU PAHNIHNA SAMUELA 3 Bible Online

LEHKHABU PAHNIHNA SAMUELA 3 - Mizo Lushai bible

LEHKHABU PAHNIHNA SAMUELA 3

¹Saula chhûngte leh Davida chhûngte chu rei tak an indo va, Davida chu a chak tial tial a, Saula chhûngte chu an chak lo tial tial a.

²Davida chuan Hebron-a an awm laiin fapa paruk a nei a. A u ber chu Amnona, Jezreel mi Ahinoami laka mi a ni.

³A dawttu chu Kileaba, Karmel tlânga Nabala thihsan a nupui Abigaili laka mi a ni. A pathumna chu Absaloma, Gesur lal, Talmaia fanu Maaki laka mi a ni.

⁴A palina chu Adonija, Hagiti hrin a ni. A pangana chu Sefatia, Abitali hrin a ni.

⁵A parukna chu Ithreama, Davida nupui Ekli laka mi a ni; hêng hi Davida fa, Hebron-a piangte chu an ni.

⁶Saula chhûngte leh Davida chhûngte chu an indo zêl a, Saula chhûngte zîngah Abnera chuan thu a nei ta tial tial a.

⁷Saula chuan hmei a nei a, a hming chu Rizpii a ni a, Aii fanu a ni a. Isboseta chuan Abnera hnênah, “Engtizia nge ka pa hmei i mutpui le?” a ti a.

⁸Isboseta thu sawi avâng chuan Abnera chu a thinrim hle a, a hnênah, “Juda lamṭang uicho em ka nih, tûn thlengin i pa Saula chhûngte, a unaute leh a ṭhiante tân rinawm takin ka thawk a, nang pawh Davida kutah ka hlân lo che a; mahse, nang chuan he hmeichhe laka sualah min puh vei maw?

⁹LALPA thu lo thlun tawh,

¹⁰lalna chu Saula chhûngte hnên ata chhuhsaka Israel leh Judai ram, Dan aṭanga Beer-seba thlenga Davida lalṭhutthlêng tungding tûra ka tihhlawhtlin loh vaih chuan Pathianin Abnera chu na takin khawih sela, tihlum hial rawh se,” a ti a.

¹¹Isboseta chuan kamkhat pawhin a chhâng lo, Abnera chu a hlau hle si a.

¹²Tichuan, Abnera chuan Davida hnênah palai a tîr ta a, a hnênah, “He ram hi tu ta nge? Inremna siam ila, Israel mi zawng zawng i lama ṭang tûrin ka beihpui ang che,” a ti ta a.

¹³Davida chuan, “Aw le, nang nêna inremna kan siam dân tûr chu hetiang hi ni rawh se: mi hmu tûra i lo kal hunah Saula fanu Mikali rawn hruai ngei ngei ang che,” a ti a.

¹⁴Davida chuan Saula fapa Isboseta hnênah, “Ka nupui, Mikali, Filistia mi serh vun zaa ka lei kha min rawn pe rawh,” tiin mi a tîr bawk a

¹⁵Isboseta chuan, a pasal Paltiela, Laisa fapa hnên ata chu chhuhsak tûrin mi a tîr a.

¹⁶A pasal chuan ṭap chungin Bahurim thlengin a zui a, Abnera chuan a hnênah, “Kîrsan tawh rawh,” a ti a: tichuan, a kîr ta a.

¹⁷Abnera chuan Israel upaho chu a berâwn a, an hnênah, “Tûn hma khân Davida chu in lalah in duh ṭhîn a.

¹⁸Tûnah lalah nei tawh rawh u le, LALPA chuan Davida hnênah thu a thlung a, ‘Ka chhiahhlawh Davida chuan, ka mi Israel-te chu Filistia mite kut ata leh an hmêlmate kut ata a chhan chhuak ang,’ a tih kha,” a ti a.

¹⁹Abnera chuan Benjamina thlahte pawh a bia a. Tichuan, Israel mite leh Benjamin chhûngte chuan ṭha an tih thu hrilh tûrin Hebron khuaa Davida hnênah an va kal ta a.

²⁰Abnera chu mi sawmhnih hruaiin Hebrona Davida hnênah a kal ta a, Davida chuan ruai a lo ṭhehsak a.

²¹Abnera chuan Davida hnênah, “Ka va chhuak ang a, ka pu, lal tân hian Israel mi zawng zawng ka va ko khâwm ang a; tichuan, anni nên chuan inremna in siam ang a, a ṭha i tih ang takin an chungah ro i rêl dâwn nia,” a ti a. Davida chuan Abnera chu ngaihṭha takin a kal chhuahtîr ta a.

²²Chumi hnu chuan Joaba leh Davida sipai ṭhenkhat, an rammu an lo hâwng a, râllâk sum tam tak an rawn hâwn a. Abnera chu Hebron khuaah Davida hnênah a lo awm tawh lo va; ani chu Davida chuan a chhuahtîr a, ngaihngam takin a kal chhuak a.

²³Joaba leh a sipaite an lo thlen chuan, “Nera fapa Abnera chu lal hmaah a lo kal a, lal chuan a chhuahtîr a, ngaihngam takin a kal ta,” tih an lo hrilh a.

²⁴Joaba chu lal hnênah a kal a, “I thil lo tih hi engtizia nge ni le? Ngai teh Abnera chu i hmaah a lo kal a, engtizia nge i chhuahtîr leh mai? Hei, a bo leh daih tawh hi.

²⁵Nera fapa Abnera hi tu nge a nih i hria a, nangmah bum tumin, i chettlat dân leh i thiltih zawng zawng hriat tumin a lo kal a nih hi,” a ti a.

²⁶Davida hnên ata a chhuah hnu chuan Joaba chuan Abnera ûm tûrin mi a tîr a; Sira tuichhunchhuah aṭangin ani chu an rawn hruai kîr a. Davida chuan chu chu a hre lo.

²⁷Abneran Hebron a lo thlen chuan Joaba chuan kulh kawngkhâr bulah a fâla biak tum ni âwm takin a hruai a; tichuan, a unau Asahela a lo thah phuba chu a la ta a, Joaba chuan a dulah a vit a, a thi ta a.

²⁸Davidan chu thu chu a lo hriat chuan, “Nera fapa Abnera thah thu-ah kei leh ka ram chu LALPA mit hmuhin kan thiang kumkhua ang.

²⁹A thisen mawh chu Joaba leh a pa chhûngte chungah tla rawh se, Joaba chhûngte zîngah panchhe vei te, phâr te, ramtuileilo te, khandaiha thi te, ṭâm tuarte awm reng rawh se,” a ti a.

³⁰Joaba leh a u Abisaia chuan Gibeon indonaah an nau Asahela chu Abneran a thah avângin an that ve a ni.

³¹Davida chuan Joaba leh a hnêna sipai zawng zawng hnênah, “In puante pawtthlêr ula, saiip puan sinin Abnera vui tûrin a hmaah kal rawh u,” a ti a. Lal Davida pawhin hlâng chu a zui a.

³²Abnera chu Hebron-ah an phûm a; a thlânah lal chu ring takin a ṭap a, mipui zawng zawng an ṭap bawk a.

³³Lal chuan Abnera chu hetiangin a ṭah a: “Engtizia nge Abnera chu mi â thiha a thih tâk le?

³⁴I kut phuar a ni lo, i ke hlin a ni hek lo, mi sualte kut tuar ang maiin i thih tâk le?” a ti a; tichuan, mi zawng zawng chuan an ṭah leh a.

³⁵Chhûnah chuan Davida chu eng emaw tal ei tûrin an ngên a; mahse, hetiangin thu a lo tiam tawh a, “Ni tlâk hma chu chaw pawh, thil dang pawh, eng mah ka ei lo vang, ka ei chuan Pathianin a tih tihin min ti rawh se, na tak pawhin ka chungah ti rawh se,” tiin.

³⁶Mi zawng zawngin chutianga a tih chu an hria a, an lâwm a, lal thiltih dân chuan mipui a tilâwm hle a.

³⁷Chumi ni chuan mipui leh Israel mi zawng zawngin Nera fapa Abnera thah chungchângah lalin inhnamhnawihna a nei lo tih an hre chiang ta a.

³⁸Lal chuan a mite hnênah, “Vawiin hian Israel milian, mi ropui tak a thi tih in hre na nge?

³⁹Lal atân hriak min thih hlim a ni a, ka la chak lo va, Zeruii fate hi an huangtau lutuk ta deuh a ni. LALPA chuan thil sual titute chu an thiltihin a phu ang ngeiin hrem rawh se,” a ti a.