Read Mizo Lushai LEHKHABU PAHNIHNA SAMUELA 4 Bible Online

LEHKHABU PAHNIHNA SAMUELA 4 - Mizo Lushai bible

LEHKHABU PAHNIHNA SAMUELA 4

¹Saula fapa Isboseta chuan Abnera chu Hebron-ah an that tih a lo hriat chuan a thlaphâng ta hle a. Israel mi zawng zawng pawh an mangang a.

²Saula fapa Isboseta chuan rammu pâwl hotu pahnih a nei a, an hming chu Baana leh Rekaba an ni. Chûng mite chu Benjamin thlah Beerot mi Rimona fapate an ni. Beerot chu Benjamin ram chhûnga ngaih a ni.

³Beerot khuaa awmte chu Gitaim-ah an tlân a, tûn thlengin chutah chuan an awm ta a.

⁴Saula fapa Jonathana chuan fapa a nei a, ani chu a ke a bai a. Saula leh Jonathana thih thu Jezreel aṭanga an hriat lai chuan ani chu kum nga mi a ni. A awmtunu chuan a pawm a, a tlânchhia a, a hmanhmawh lutukna lamah a thlauh a; tichuan, a ke a lo bai ta a ni. A hming chu Mefiboseta a ni.

⁵Beerot khaw mi Rimona fapa Rekaba leh Baana chu Isboseta in lam panin an chhuak a; chu chu ni sat vânglai tak a ni. Isboseta chu a chhûn chawlh lai a ni a.

⁶Kawngkhâr vêngtu hmeichhia chu a mut a chhuak hle a, a buhthlei lai chu a lo muthlu a; chutih lai chuan Rekaba leh a nau Baana chu an lût a.

⁷Pindanah an lût a, Isboseta chu a mut pindana tui taka a mu lai chu a dulah an vit a, an that ta a. A lu an tansak a, an la a, Araba lam kawngah zânkhuain an kalpui a.

⁸Isboseta lu chu Hebron khuaa Davida hnênah an rawn thlen a, lal hnênah chuan, “Hei, i hmêlma, thah tumtu che Saula fapa Isboseta lu kan rawn hâwn e. Ka pu, lal phuba chu, LALPA chuan vawiin hian Saula leh a thlahte chungah a la ta a ni,” an ti a.

⁹Davida chuan Berot khaw mi Rimona fapa Rekaba leh a nau Baana chu heti hian a chhâng a, “Ka manganna tinrêng laka min chhanchhuaktu LALPA, mi nung hmingin ka sawi e;

¹⁰thu lâwmawm rawn thlenah inngaiin, ‘Saula chu a thi ta’ tih thu rawn sawitu chu ka lo man a, Ziklag khuaah ka that a, chu chu a thu ‘Lâwmawm’ a rawn thlen mana ka pêk chu a ni.

¹¹Pawisawi lo, ama in chhûng lum, a khumlaizâwla mu lai ngei thattu, nangni mi sual lakah hian a thisen phuba chu ka va han la dâwn tehrêng êm! Tûnah hian leilung ata ka tiboral dâwn che u a ni,” a ti a.

¹²Davida chuan a sipaite chu thu a pe a, an kut leh kete an tan a, an ruang chu Hebron dîl kamah an khai a, Isboseta lu erawh chu an la a, Hebron khuaah, Abnera thlânah chuan an phûm ta a.