Read Mizo Lushai LEHKHABU PAHNIHNA SAMUELA 5 Bible Online

LEHKHABU PAHNIHNA SAMUELA 5 - Mizo Lushai bible

LEHKHABU PAHNIHNA SAMUELA 5

¹Israel hnam zawng zawng chu Davida hnênah Hebron-ah chuan an lo kal a, a hnênah, “I thisen zawmpuite kan ni a.

²Tûn hmaa Saula kan chunga a lal lai khân Israel-te chu an rammutnaah i hruai ṭhîn a. LALPA chuan i hnênah, ‘Ka mi Israel-te hi i kaihruai ang a, an chungah i lal ang,’ a tih che kha,” an ti a.

³Tichuan, Israel upa zawng zawng chu Hebron khuaah lal hnênah an lo kal a, lal chuan anni chu Hebron khuaah chuan thu a lo thlunpui a, Davida chu Israel lal atân hriak an thih ta a.

⁴Davida chu lal a lo nih khân kum sawmthuma upa a ni, kum sawmli chhûng ro a rêl a.

⁵Hebron-ah Juda-te chungah kum sarih leh thla ruk a lal a, Jerusalem-ah Israel leh Juda-te chungah kum sawmthum leh pathum a lal bawk a.

⁶Lal leh a mite chu, chu lai hmuna chêng Jebus-ho bei tûrin Jerusalem an pan ta a. Davida chu a luh theih loh ringin a hnênah, “Hetah hian i lo lût tawp lo vang, mitdel leh kebaite pawhin an lo dang thei ang che,” an lo ti a.

⁷Mahse, Davida chuan Zion kulh chu a la ta mai a, chu chu Davida khawpui a ni.

⁸Chumi ni chuan Davidan a hote hnênah, “Tu pawh Jebus-hote ka huat anga huaa thah duh chu anmahni bei tûrin tuiluankawr lamah chho sela, ka hmêlma, mitdel leh kebaite chu bei rawh se,” a ti a. Chuvâng chuan alâwm, ‘mitdel leh kebaite chu’ LALPA inah an lût ve thei lo vang,” an tih tâk ni.

⁹Davida chu kulhah chuan a awm a, “Davida khawpui” tih a lo ni ta a. Davida chuan a vêlin kulh a siam a, Milo aṭangin lal in thlengin a siam ṭha a.

¹⁰Davida chu a lo ropui deuh deuh va, Engkim LALPA chu a hnênah a awm reng a.

¹¹Tura lal Hirama chuan Davida hnênah mi a tîr a, Sidar thing te, kut themthiam te, lungchher thiamte a thawn a, Davida in chu an saksak a.

¹²Davida chuan amah chu Israel-te lal atân LALPAN a tinghet a, a mi Israel-te avângin ram chu a chawimawi a ni tih a hre ta a.

¹³Hebron a chhuahsan hnu chuan Davida chuan hmei leh nupui, Jerusalem-ah a neih belh a, fanu fapa a nei ta ṭeuh va.

¹⁴Hêng hi Jerusalem-a a fa neihte chu an ni: Samua te, Sobaba te, Nathana te, Solomona te,

¹⁵Ibhara te, Elisua te, Nefega te, Jafia te,

¹⁶Elisama te, Eliada te, Elifeleta te an ni.

¹⁷Israel miten Davida chu lal atân hriak an thih tih an hriatin Filistia mi zawng zawng chu Davida bei tûrin an lo thawk a, chu chu Davidan a lo hria a, kulhbîngah a chhuk a.

¹⁸Filistia mite chu Refaim ruamah an inzâr a.

¹⁹Davida chuan LALPA hnênah, “Filistia mite chu ka zu bei ang em, ka kutah anni chu mi pe dâwn em?” tiin a zâwt a. LALPA chuan, “Kal rawh, Filistia-ho chu i kutah ka pe ngei dâwn,” a ti a.

²⁰Tichuan, Davida chu Baal-perazim-ah a kal a, chutah chuan Filistia-ho chu a hneh a, “Tuikhuah sah ang maiin LALPA chuan ka hmêlmate min tihdarhsak ta,” a ti a, chu hmun chu Baal-perazim a vuah ta a.

²¹Filistia mite chuan an pathian lemte an tlânchhiatsan a, Davida leh a mite chuan an la a.

²²Filistia mite chu an lo chho leh a, Refaim ruamah an inzâr leh a.

²³Davida chuan LALPA chu a râwn leh a, ani chuan, “Va pan mai suh, an hnung lamah hual la, thingtheihmu hmun aṭangin anni chu bei ang che.

²⁴Tin, thingtheihmu lêr aṭanga kal ri ṭhup ṭhup ang thâwm i hriat veleh bei thut rawh, chu chu Filistia-ho bei tûrin LALPA chu i hmaah a kal tihna a ni ang,” a ti a.

²⁵Davida chuan LALPA thupêk ang chuan a ti a, Filistia mite chu Geba aṭanga Gezer thlengin a ûm ta a.