Read Mizo Lushai LEHKHABU PAHNIHNA SAMUELA 6 Bible Online

LEHKHABU PAHNIHNA SAMUELA 6 - Mizo Lushai bible

LEHKHABU PAHNIHNA SAMUELA 6

¹Davida chuan Israel-te zîng aṭanga mi sîngthum a thlante chu a ko khâwm a.

²Davida leh a mite chu Judai rama Baala khuaa Pathian Bâwm, Engkim LALPA, cherub chunga chuang hming chuanna chu la tûrin an thawk chhuak a.

³Pathian Bâwm chu tawlailîr tharah an dah a, tlânga Abinadaba in ata chu an la chhuak a, Abinadaba fapa Uza leh Ahioa chuan tawlailîr thar chu an khalh a.

⁴Ahioa chu Pathian Bâwm hma lamah chuan a kal a.

⁵Davida leh Israel mi zawng zawng chuan ri thei chi hrang hrang: ṭingṭang te, perhkhuang te, khuangtê te, darbenthek te leh tawtawrâwt te nên nasa takin LALPA an fak a.

⁶Nakona hruihzâwl an thlen chuan bâwngpa chu a petek avângin Uza chuan a kut a phar chhuak a, Pathian Bâwm chu a va dawm a.

⁷LALPA chu, Uza chungah, a tih dik loh avâng chuan, a thinur ta thut a; chutah chuan Pathianin a tihlum a, Pathian Bâwm bulah chuan a thi ta a.

⁸LALPA thinur chu Uza chunga a tlâk avângin Davida chu a thinur hle a, chu hmun chu Perez-uza a vuah a, tûn thlengin a hmingah a la pu ta reng a ni.

⁹Chumi ni chuan LALPA chu a hlau hle a, “Engtin nge LALPA Bâwm chu ka hawn theih tâk ang le?” a ti a.

¹⁰Tichuan, Pathian Bâwm chu Davida khawpuiah chuan a hâwnpui duh ta lo va. Git mi Obed-edoma inah a dah ta zâwk a.

¹¹LALPA Bâwm chu Git mi, Obed-edoma inah chuan thla thum a awm a, Obed-edoma te chhûngkua chu LALPA chuan mal a sâwm a.

¹²“Pathian Bâwm avângin LALPAN Obed-edoma chhûngkua leh a in-leh-lo zawng zawng chu mal a sâwm a ni,” tiin Davida an hrilh a. Davida chuan Pathian Bâwm chu Obed-edoma in aṭangin Davida khawpuiah lâwm takin a la ta a.

¹³LALPA Bâwm zâwntuten bâwm chu pên ruk an han kalpui a, Davida chuan a dintîr rih a, bâwngpa leh ran chawm thau inthawina a hlân a.

¹⁴Davida chuan puan zai sîna siam puithiam kawr a inbel a, a theihtâwpa nasain LALPA hmaah chuan a lâm a.

¹⁵Davida leh Israel mite chuan hlim taka auva, tawtawrâwt hâm chung zêlin LALPA Bâwm chu an la chho ta a.

¹⁶LALPA Bâwm chu Davida khawpuia an luhpui lai chuan Saula fanu Mikali chuan tukverh aṭangin a lo thlîr a; LALPA hmaa Davida zuang leh lâm chu a hmusit rilru hle a.

¹⁷LALPA Bâwm chu an la lût a, a dahna tûra Davida zâr, puan in chhûngah chuan an dah a; Davida chuan Engkim LALPA hnênah hâlral thilhlan te, remna thilhlan te a hlân a.

¹⁸A hlan zawh chuan Engkim LALPA hmingin mipui tân malsâwmna a dîlsak a.

¹⁹Israel mipui zawng zawng, a hmei a pain, mi tin hnênah chhang hlawm khat leh sahrang khat leh grep rah pho ro hlawm khat a pe a. Tichuan, mahni in lamah an hâwng ta ṭheuh va.

²⁰A chhûngte tân malsâwmna dîlsak tûrin Davida chu a lo haw chuan Saula fanu Mikali chu amah hmuak tûrin a lo chhuak a, a hnênah, “Vawiin chu Israel lal a va han intiropui ve le! Zah nachâng hre lo mite ang maiin a chhiahhlawh nulate hmuhah saruaka a tal chiam le!” a lo ti a.

²¹Davida chuan Mikali hnênah, “I pa leh a chhûngte zawng zawng aia Israel-te chunga lala min thlangtu LALPA hmaah asin ka lâm; LALPA chu ka chawimawi zêl dâwn.

²²Tûn ai mah hian zahpuiawm min la ti ang; engah mah min ngai lo na ang a, hêng chhiahhlawh nula i sawite hian min ngaisâng ang,” a ti a.

²³Tichuan, Saula fanu Mikali chuan a thih thlengin fa a nei ta lo va.