Read Mizo Lushai LEHKHABU PAHNIHNA SAMUELA 7 Bible Online

LEHKHABU PAHNIHNA SAMUELA 7 - Mizo Lushai bible

LEHKHABU PAHNIHNA SAMUELA 7

¹Lal chu a inah a awm a, LALPA chuan a hmêlma zawng zawng lakah râlmuang takin a awmtîr a.

²Lal chuan zâwlnei Nathana hnênah, “Kei chu Sidar thinga sak inah ka awm a, Pathian Bâwm erawh chu puan in maiah a awm si a,” a ti a.

³Nathana chuan lal hnênah, “Ṭha i tih ang chuan va ti rawh, LALPA chu i hnênah a awm alâwm,” a ti a.

⁴Chumi zan vek chuan LALPA chuan Nathana hnênah,

⁵“Ka chhiahhlawh Davida chu hetiang hian va hrilh rawh. LALPA chuan heti hian a ti: ‘Ka chên nân in mi saksak i tum em ni?

⁶Israel fate Aigupta ram ata ka hruai chhuah aṭangin tûn thlengin inah ka awm lo va, hmun hrang hrangah te awm sawnin puan inah te ka awm zâwk ṭhîn.

⁷Hmun hrang hranga ka vah kualpui Israel fate leh ka mi Israel-te enkawltu atâna ka ruat rorêltute hnenah, ‘Engati nge Sidar thing in min saksak loh?’ ka ti ngai em ni?

⁸Tûnah ka chhiahhlawh Davida chu hetiang hian hrilh rawh: Engkim LALPA chuan heti hian a ti: ‘I berâm vênna hmun ata, ka mi Israel-te chunga rorêl tûrin ka ko che a.

⁹I vahvêlna apiangah i hnênah ka awm ṭhîn a, i hmaa hmêlma awmte chu ka hnehsak ṭhîn che a; tûnah, leia mi ropuite angin i hming ka tiropui dâwn.

¹⁰Ka mi Israel-te chu an awm hlenna tûr ram ka pe ang a, tu ma tihbuai lohvin thlamuang takin an awm tawh ang. Tûn hma ang khân mi sualten an hnehchhiah tawh lo vang.

¹¹Ka mite chunga rorêltute ka ruat ṭhin lai ang khân an awm hek lo vang. In hmelmate lak ata thlamuang takin in awm tawh ang a; chu bâkah, kei LALPA hian i chhûngkua chu ka tungding ang tih ka hrilh a che.

¹²I ni a kina i pute hnêna i chawlh hunah nangmah thlâktu zînga mi, i rîla rah ngei chu, ka tungding ang a, a ram chu ka tinghet ang.

¹³Ani chuan ka tân in mi saksak ang a, a ram chu kumkhua atân ka tinghet ang.

¹⁴A pa ka ni ang a, ani chu ka fapa a ni ang. Thil a tihsual chuan pain an fate an tiang hmanga an thunun angin ka thunun ang.

¹⁵“I hma ata Saula ka la bo va, ka khawngaihna a hnên ata ka la kîr angin ani zawng ka khawngaihna chuan a kalsan lo vang.

¹⁶I chhûngkua leh i ram chu kumkhuain ka tinghet ang a, i lalṭhutthlêng chu nghet takin a awm reng ang,’ ” a ti a.

¹⁷Pathianin a hrilh zawng zawng chu Nathana chuan Davida chu a hrilh vek a.

¹⁸Lal Davida chu LALPA inah a lût a, a ṭhu a, hetiang hian a ṭawngṭai a. “Aw, LALPA Pathian, kei leh ka chhûngte hi eng nge maw kan niha, hetiang taka min ngaihnat le?

¹⁹Aw LALPA Pathian, chu chu tâwk ti lovin i chhiahhlawh thlahte leh zêl pawh din ngheh i la tum ta fo va. Aw LALPA Pathian, hei hi i mite i hruai dân a lo ni maw?

²⁰Davida chuan i hnênah eng nge a sawi leh chuan tâk ang? Aw LALPA Pathian, i chhiahhlawh hi i hre vek a.

²¹I thu leh i duh dân angin he thil ropui tak hi i ti a, i chhiahhlawh i hriattîr ta.

²²Aw LALPA Pathian, i va ropui tak êm! Nang ang hi tu mah an awm kan hre lo, nang lo chu Pathian dang an awm hek lo.

²³An saltânna ata i mi atâna i hruai chhuah Israel hnam ang hi khawvêlah an awm lo. An tân thil ropui leh mak tak tak i ti a, lei pum puiah i hming a lo thang ta. Aigupta ram ata i pual atân i hruai chhuahte hmaah chuan hnam dangte chu an pathiante chawpin i hnawt bo va.

²⁴I mi Israel-te chu kumkhuaa i ta ni tûrin i tinghet a; Aw LALPA, nang chu an Pathian i lo ni ta.

²⁵Tûnah, LALPA Pathian, i chhiahhlawh leh a chhûngte chungchânga thu i lo tiam tawh chu kumkhua atân hlen la, i lo sawi tawh ang chuan ti ang che.

²⁶Engkim LALPA chu Israel-te Pathian a ni, tiin i hming chawimawi kumkhua sela; tichuan, i chhiahhlawh Davida chhûngte chu i tân din nghet ang che.

²⁷Aw Engkim LALPA, Israel-te Pathian, i chhiahhlawh hnênah hian, ‘I chhûngkua chu ka tungding ang,’ tiin i lo hrilh tawh a, chuvâng alâwm ngênngâwl taka hei hi ka dîl che ni.

²⁸Aw LALPA Pathian, nang chu Pathian i ni a, i thute chu a rinawm a, i chhiahhlawh hnênah he thu hlu tak hi i tiam ta si a.

²⁹I chhiahhlawh chhûngte hian i duhsakna an dawn reng theih nân khawngaih takin malsâwm ang che. Aw LALPA Pathian, nangin i tiam tawh a, i chhiahhlawh chhûngte hi kumkhuain malsâwm ang che,” a ti a.