Read Mizo Lushai LEHKHABU PAHNIHNA SAMUELA 8 Bible Online

LEHKHABU PAHNIHNA SAMUELA 8 - Mizo Lushai bible

LEHKHABU PAHNIHNA SAMUELA 8

¹Chumi hnuah Davida chuan Filistia mite a hneh a, an tlâwm ta a. Metheg-ama chu Filistia mite a chhuhsak a.

²Moab mite a hneh bawk a, mi an mante chu leiah a muttîr a, hruiin a hlîng a, a chhiar vek a, pathuma pahnih chu a that a, a dang zawng chu a zuah a. Moab mite chu Davida thuhnuaiah an awm ta a, a hnênah chhiah an chawi a.

³Zoba lal Rehoba fapa Hadadezera chu Eufretis chhak lama a ram la lêt leh tûrin a kal a, Davida chuan a lo bei bawk a;

⁴Davida chuan sakawr chungchuang mi sângkhat leh zasarih leh sipai sînghnih a mansak a, tawlailîr za hnûktu atân sakawr za a zuah a, a dang zawng chu an tha a chhahsak a.

⁵Damaska khua aṭanga Zoba lal, lal Hadadezera chhan tûra Suria mi lo kalte chu sînghnih leh sânghnih a that a.

⁶Tin, Suria ram Damaska khuaah chuan a sipaite a dah a, Suria mite chu a thuhnuaiah an awm ta a, a hnênah chhiah an chawi ṭhîn a. LALPAN a ṭanpui avângin Davida chuan a râl do a hneh zêl a ni.

⁷Davida chuan Hadadezera hote chu an rangkachak phawte a lâksak a, Jerusalem-ah a hâwn a.

⁸Tin, Hadadezera awp khua Beta leh Berothai aṭangin lal Davida chuan dâr tam tak a hâwn bawk a.

⁹Hamath lal Toia chuan Hadadezera sipai zawng zawng Davidan a hneh tih a lo hria a.

¹⁰Toia chuan vawi tam tak a lo do ṭhin Hadadezera chu a hneh avângin lawmpuina chibai bûk tûrin a fapa Jorama chu a tîr a. Jorama chuan tangkarua leh rangkachak leh dâra siam hmanraw tam tak a pe a.

¹¹Chûng chu ram hrang hrang a hnehte hnên ata tangkarua leh rangkachak a lâkte nên lal Davida chuan LALPA a hlân a.

¹²A hneh rama mite chu, Edom mi te, Moab mi te, Amon mi te, Filistia mi te, Amalek-ho te an ni. Zoba lal Rehoba fapa Hadadezera laka a râllâk pawh a hlân bawk a.

¹³Davida chuan chi ruamah Edom mi sîngkhat leh sângriat lai a that a, chuta chin chu a hmingthang ta hle a.

¹⁴Edom ram hmun hrang hrangah sipai a dah a, Edom mite chu Davida khua leh tui an lo ni ta a. LALPA chuan Davida chu a kalna apiangah a hnehtîr zêl a.

¹⁵Davida chuan Israel ram pum puiah ro a rêl a, a mite chungah chuan dik tak leh ṭha takin ro a rêl a ni.

¹⁶Zeruii fapa Joaba chu sipai hotu a ni a, Ahiluda fapa Jehosafata chu chanchin ziaktu a ni.

¹⁷Ahituba fapa Zadoka leh Abiathara fapa Ahimeleka chu puithiam an ni a, Seraia chu ziaktu a ni.

¹⁸Jehoiada fapa Benaia chu Keret mi leh Pelet mite hotu a ni. Davida fapate chu khâwnbâwl an ni.