Read Mizo Lushai LEHKHABU PAHNIHNA SAMUELA 9 Bible Online

LEHKHABU PAHNIHNA SAMUELA 9 - Mizo Lushai bible

LEHKHABU PAHNIHNA SAMUELA 9

¹Davida chuan, “Saula chhûngte zîngah dam an la awm em aw? Jonathana avângin ka khawngaih dâwn a ni,” a ti a.

²Saula chhûngkuate chhiahhlawh, a hming Ziba a awm a, Davida hnêna kal tûrin an ko va, lal chuan a hnênah, “Ziba i ni em?” a ti a. Ani chuan, “Ni e,” a ti a.

³Lal chuan, “Pathian khawngaihna a chunga ka lantîr theih nân, Saula chhûngte zîngah dam an la awm em? a ti a. Ziba chuan lal hnênah, “Jonathana fapa pakhat a awm, a ke a bai nghe nghe asin,” a ti a.

⁴Lal chuan a hnênah, “Khawiah nge a awm?” a ti a. Ziba chuan lal hnênah, “Amiela fapa Makira in Lo-debar khuaah a awm,” a ti a.

⁵Lal Davida chuan Amiela fapa Makira in Lo-debar khua ata chu hruai tûrin mi a tîr a.

⁶Saula fa Jonathana fapa Mefiboseta chu Davida hnênah chuan a lo kal a, kûnin chibai a bûk a, Davida chuan, “Mefiboset,” a ti a. Ani chuan “Eng nge ka pu?” a ti a.

⁷Davida chuan a hnênah, “Hlau suh aw, i pa Jonathana avângin i chungah ṭhat chhuah ka duh a ni. I pu Saula ram zawng zawng chu ka pe ang chia, ka hnênah i eiin i in bawk ang,” a ti a.

⁸Mefiboseta chuan chibai a bûk leh a “Kei, ui thisâwn ang lek, i chhiahhlawh hi eng emaw ka niha, heti taka mi i ngaihsak le?” a ti a.

⁹Lal chuan Saula chhiahhlawh Ziba chu a ko va, a hnênah, “I pu Saula ram zawng zawng leh an chhûngkaw thil neih zawng zawng hi a tupa hnênah hian ka pe a ni.

¹⁰Nang leh i fate leh i chhiahhlawhte chuan ram chu in enkawlsak ang a, thlai thar chu i pu tupa chhûngte tân in rawn la ang a, Mefiboseta erawh chuan ka hnênah a eiin a in ve ang,” a ti a. Ziba chuan fapa sâwm leh panga leh chhiahhlawh sawmhnih a nei a.

¹¹Ziba chuan lal hnênah, “I chhiahhlawh hian, ka pu, nang lalin tih tûr min ruatsak apiang chu ka ti zêl ang,” a ti a. Mefiboseta erawh chu lal fate ang bawkin Davida inah chuan a eiin a in ve ta a.

¹²Mefiboseta chuan fapa la naupang tak a nei a, a hming chu Mika a ni. Ziba ina awm zawng zawng chu Mefiboseta chhiahhlawh an ni.

¹³Mefiboseta chu Jerusalem-ah a awm ve ta a, lal inah chuan a eiin a in ṭhîn a, a ke khinghnih a ṭha lo a ni.