Read Mizo Lushai LEHKHABU PAKHATNA LALTE 1 Bible Online

LEHKHABU PAKHATNA LALTE 1 - Mizo Lushai bible

LEHKHABU PAKHATNA LALTE 1

¹Davida chu a lo upain a lo tar ta hle a, puan an sintîr pawhin a mu lum zo ta lo va.

²A chhiahhlawhte chuan a hnênah, “Ka pu, i kianga awma enkawl tûr che nula kan zawng ang e. Ani chu i bulah a mu ang a, kan pu hi i mu lum thei dâwn nia,” an ti a.

³Tichuan, Israel ram pumah nula hmêlṭha an zawng ta a. Sunam mi, Abisagi an va hmu a, lal hnênah an rawn hruai a.

⁴Chu nula chu hmêlṭha tak a ni. Lal chu a enkawl a, a kiangah a awm reng a; mahse, lal chuan a pâwl lo.

⁵Hagiti laka Davida fapa Adonija chu lal fa la damte zînga upa ber a nih avângin lal tûrah a lo inngai a. Tawlailîr te, sakawr chungchuang mite leh amah vêngtu mi sawmnga a ruat diam a.

⁶A pa lah chuan, “Engati nge hetianga i khawsak le?” tiin a kamkhat ngai si lo va. Tlangvâl hmêlṭha tak Absaloma dawt chiah a ni.

⁷Adonija chuan Zeruii fapa Joaba leh puithiam Abiathara te chu a râwn a, anni chu a lamah an ṭang a, an pui ṭhîn a.

⁸Puithiam Zadoka te, Jehoiada fapa Benaia te, zâwlnei Nathana te, Simeia te, Reia te leh mi huaisen, Davida vêngtu te erawh chuan Adonija chu an zui ve lo.

⁹Adonija chuan En-rogel kianga Zebelet lungpui zâwlah chuan inthawi nân berâm te, bâwngpa te, ran châwm thau te a talh a. A unau lal fapa zawng zawng leh Judai rama lal khâwnbâwl zawng zawng a sâwm a.

¹⁰Zâwlnei Nathana te, Benaia te, mi huaisen lal vêngtu te leh a unau Solomona erawh chu a sâwm ve lo.

¹¹Nathana chuan Solomona nu Bathsebi hnênah, “Hagiti fapa Adonija hi kan pu Davida hriat lohvin a lal ta tih i hre na nge?

¹²Tûnah, i himna tûr leh i fapa Solomona himna tûr ka hrilh ang che.

¹³Lal Davida hnênah va lût la, a hnênah, ‘Aw lalber, ka pu, i chhiahhlawh hnênah hian, ‘Solomona hi ka aiawha lal tûr a ni, ka lalṭhutthlêng a luah ang’ tiin i tiam a ni lâwm ni? Engtizia nge Adonija hi a lal tâk mai le?’ va ti la,

¹⁴Lal chu i biak laiin ka lo lût ve ang a, i thu sawi chu ka rawn nemnghet dâwn nia,” tiin thu a râwn a.

¹⁵Bathsebi chu lal pindanah a va kal a, lal chu a tar hle tawh a, Sunam mi Abisagi chuan a lo awm a.

¹⁶Bathsebi chuan lal chu kûnin chibai a bûk a, Lal chuan, “Eng nge i duh le?” a lo ti a.

¹⁷Ani chuan, “Ka pu, i bawihnu hnênah hian LALPA, i Pathian hming chhâlin, ‘I fapa Solomona hi ka aiawhin a la lal ang a, ka lalṭhutthlêng a luah ang’ tiin i tiam a;

¹⁸mahse, hei, Adonija a lal ta reng mai. Ka pu lah hian i hre ve si lo.

¹⁹Bâwngpa te, ran châwm thau te a talh ṭeuh va, lal fapa te, puithiam Abiathara te, sipai hotu Joaba te a sâwm a, i chhiahhlawh Solomona erawh chu a sâwm ve lo.

²⁰Ka pu, Israel mi zawng zawng hian lalṭhutthlêngah tu nge i ṭhuttîr dâwn tih an thlîr reng a ni.

²¹Hei hi i tihfel loh chuan, ka pu hi, i thih hunah kei leh ka fapa Solomona chu phiarrutuah min puh dâwn a ni,” a ti a.

²²Chutia lal a biak lai tak chuan zâwlnei Nathana chu a lo lût a.

²³“Zâwlnei Nathana pawh a lo kal e,” tiin lal chu an hrilh a. Lal hnênah chuan a va kal a, a kûn a, bawkkhupin chibai a bûk a.

²⁴Nathana chuan, “Ka pu lalber hian ‘Adonija chu ka aiawhin a lal ang a, ka lalṭhutthlêng a luah ang,’ a ti em ni?

²⁵Vawiin hian a thawk chhuak a, bâwngpa tam tak te, ran châwm thau te, berâm te a talh a, lal fapa zawng zawng leh sipai hotu te, puithiam Abiathara te a sâwm a. Tûnah hian an eiin an in ho va, ‘Lal Adonija dam reng rawh se,’ tiin an au va.

²⁶Kei i chhiahhlawh hi puithiam Zadoka te, Jehoiada fapa Benaia te leh i chhiahhlawh Solomona te nên min sâwm ve lo.

²⁷Hei hi ka pu lalber thu-a tih a nih si chuan, ka pu hian a thih hnua a lalṭhutthlêng luahtu tûr a chhiahhlawhte a hrilh ve lo a ni maw?” a ti a.

²⁸Lal Davida chuan, “Bathsebi han ko teh u,” a ti a. Ani chu lal hnênah chuan a va kal a, a hmaah a ding a.

²⁹Lal chuan heti hian a sawi a, “Manganna tinrêng laka min humhimtu LALPA hming chhâlin ka tiam a che, Israel te Pathian LALPA hming chhâla i hnêna ka tiam tawh chu tûnah ka hlen ngei ngei dâwn.

³⁰I fapa Solomona chu ka aiawhin a lal ang a, ka lalṭhutthlêng hi a luah ang,” a ti a.

³¹Bathsebi chuan bawkkhupin lal chu chibai a bûk a, “Ka pu, lal Davida chu dam reng rawh se,” a ti a.

³²Lal Davida chuan, “Puithiam Zadoka te, zâwlnei Nathana te, Jehoiada fapa Benaia te han ko teh u,” a ti a.

³³Lal hnênah chuan an lo kal a, Lal chuan an hnênah, “Mi lianho hruai ula, ka fapa Solomona chu ka sabengtung chungah chuantîr ula, Gihon-ah hruai thla rawh u.

³⁴Chutah chuan Puithiam Zadoka leh zâwlnei Nathana chuan Israel lal atân hriak thih rawh se. Tawtawrâwt hâm ula, ‘Lal Solomona chu dam reng rawh se,’ tiin au rawh u.

³⁵Ani chu in rawn zui ang a, ka lalṭhutthlêngah ṭhu sela, ka aiah a lal ang. Ani hi Israel leh Judai ram chunga rorêltu atân ka ruat a ni,” a ti a.

³⁶Jehoiada fapa Benaia chuan, “Amen, ka pu, i Pathian, LALPA chuan nemnghet rawh se.

³⁷LALPA chu, ka pu lalber hnêna a awm ṭhîn angin Solomona hnênah pawh awm sela; ka pu lal Davida lalṭhutthlêng aiin a lalṭhutthlêng chu tinghet zâwk rawh se,” a ti a.

³⁸Puithiam Zadoka te, zâwlnei Nathana te, Jehoiada fapa Benaia, Keret mite leh Pelet mite chu an kal a, Solomona chu Davida sabengtung chungah an chuantîr a, Gihon-ah chuan an hruai thla a.

³⁹Puithiam Zadoka chuan Hmun Thianghlima hriak dahna ki chu a la a, Solomona chu a thih a. Tawtawrâwt an hâm a, mi zawng zawng chuan, “Lal Solomona dam reng rawh se,” an ti a.

⁴⁰Mi zawng zawngin ani chu an zui chho va, phênglâwngte an tum a, an hlim êm êm a, an thâwm chuan lei a nghawr dur dur a.

⁴¹Adonija leh a mi sâwm, a hnêna awm zawng zawngin ruai an ṭheh zawh chuan thâwm chu an hria a. Tawtawrâwt ri an hriatin Joaba chuan, “Khawpui chhûnga thâwm ri dur dur chu engtizia nge ni ta le?” a ti a.

⁴²Chu thu a sawi lai mêk chuan puithiam Abiathara fapa Jonathana a lo thleng a. Adonija chuan, “Lo kal teh khai, nang zawng tlangvâl fel tak i ni a, chanchin lâwmawm i rawn thlen châwk ang chu maw?” a lo ti a.

⁴³Jonathana chuan, “Thlen awzâwng lo, kan pu lal Davida chuan Solomona chu lalah a siam ta.

⁴⁴Lal chuan puithiam Zadoka te, zâwlnei Nathana te, Jehoiada fapa Benaia te, Keret mi te, Pelet mi te chu vêng tûrin a tîr a. Ani chu lal sabengtung chungah an chuantîr a.

⁴⁵Puithiam Zadoka leh zâwlnei Nathana chuan Gihon-ah lal atân hriak an thih ta. Chuta ṭang chuan hlim takin an lo chho va, an thâwm chu khawpui a khat a, chu chu in hriat hi a ni e.

⁴⁶Solomona chuan lalṭhutthlêng a luah ta a ni.

⁴⁷Milianho pawh an lo kal a, kan pu lal Davida hnênah, “I Pathian chuan Solomona chu nang aiin tiropui sela, a lalṭhutthlêng pawh i lalṭhutthlêng aiin tiropui rawh se,” tiin an rawn lawmpui a.

⁴⁸Lal pawhin a khumlaizâwl aṭangin chibai a bûk a, ‘LALPA, Israel-te Pathian, vawiina ka lalṭhutthlênga ka aiawhtu tûr ka mit ngeia min hmuhtîrtu chu fakin awm rawh se,’ tiin a sawi a ni,” a ti a.

⁴⁹Chu veleh Adonija mi sâwmho chuan an hlau va, an tlân darh ta vek a.

⁵⁰Adonija chuan Solomona chu a hlau ta hle a, a tho va, maichâm ki a vuan ta a.

⁵¹Solomona hnênah chuan, “Adonija chuan lal Solomona a hlauh êm avângin maichâm ki a vuan reng mai. ‘Lal Solomonan a chhiahhlawh hi khandaiha that lo tûrin chhia chham teh se,’ a ti,” tiin Solomona chu an va hrilh a.

⁵²Ani chuan, “Rinawm taka a awm phawt chuan a samzai pakhat pawh ka khawih lo vang. A sualna hmuh a nih erawh chuan a thi ang,” a ti a.

⁵³Lal Solomona chuan mi a tîr a, maichâm ata an va hruai chhuak a, Adonija chu a lo kal a, Lal Solomona chu kûnin chibai a bûk a, ani chuan, “In lamah va haw tawh,” a ti a.