Read Mizo Lushai LEHKHABU PAKHATNA LALTE 10 Bible Online

LEHKHABU PAKHATNA LALTE 10 - Mizo Lushai bible

LEHKHABU PAKHATNA LALTE 10

¹Seba lalnuin Solomona hming thanzia a lo hriatin thu har tak tak zâwta fiah tûrin Jerusalem-ah a lo kal a.

²Ṭhuihruai tam tak a nei a, sanghâwngsei tam tak a hruai a; mosola te, lungmantam te, rangkachak te a keng ṭeuh bawk a. Solomona nên an inhmuh chuan zawh tûr a neih zawng zawng chu a zâwt vek a.

³A zawh apiang Solomona chuan a chhâng thei zêl a, chhân harsa tih rêng a nei lo.

⁴Seba lalnu chuan Solomona finzia chu a hria a, a in sak ropuizia te a hmu a;

⁵Solomona ei tûr an rawn hlui te, a chhiahhlawhho awmna in te, lal hna thawktu hna insem dân te, an thawmhnaw hâk mawizia te, a viltute inchei mawizia te, Tempula hâlral thilhlan a hlan hnemzia te a han hmuh chuan mak a ti a, awm ngaihna rêng a hre ta lo va.

⁶Lalnu chuan Solomona hnênah, “I thil tihte leh i finzia te kan rama ka lo hriat kha a lo dik ngei a nih hi.

⁷Ka lo kal a, keimah ngeiin ka rawn hmuh hma chuan an sawi chu ka lo awih ṭhîn lo va; mahse, i finzia leh i hausakzia hi a zâtve pawh an lo sawi hlei nêm, an sawi ai daihin a ropui a ni.

⁸I nupuite chu an va nihlawh êm! I chhiahhlawh, ni tin i bula awma i finzia ngaithla ṭhînte pawh hi an va nihlawh êm!

⁹I Pathian, LALPA chu fakin awm rawh se. Ani chu i chungah a lâwm a, Israel-te lalah a siam che a nih hi. I Pathian chuan Israel-te a hmangaih a, dik taka an chunga rorêltu atân lalah a duh che a nih hi,” a ti a.

¹⁰Thilpêk tûr a ken chu a pe a, rangkachak kg. sângli chuang, mosola tam tak, lungmantam pawh tam tak a pe a ni. Mosola thil rimtui chutiang zât chu tûn hma zawng zawngin a la dawng ngai lo.

¹¹Hirama lawng rual, Ofir ram aṭanga rangkachak rawn phurte chuan almug thing leh lungmantam an rawn phur ṭeuh bawk a.

¹²Lal chuan chûng thing chu LALPA Tempul leh lal in hung nân a hmang a, zaipâwl ṭingṭangte leh perhkhuang siam nân a hmang bawk a. Chutianga tam almug thing chu Israel ramah lâkluh a la ni ngai lo, hmuh pawh an hmu leh tawh ngai hek lo.

¹³Lal Solomona chuan Seba lalnu chu a dîl leh a duh apiang a pe a; chu bâkah, a thil rawn kensak do lêt nân thil tam tak a lo pe ve a. Tichuan, a ṭhuihruaite nên an ram lamah an haw leh ta a.

¹⁴Solomona chuan kum tin rangkachak kg. sîngthum bûk lai a dawng ṭhîn a.

¹⁵Sumdâwngtute leh dâwrkaiten chhiah an pe a, Arabia lalte leh Israel ram bial tina ram awptuten rangkachak leh tangka an pe bawk a.

¹⁶Solomona chuan phaw lian pui pui, rangkachak den phêk zahnih a siam a, phaw pakhatah rangkachak kg. sarih zêl a hmang.

¹⁷Phaw tê deuh, rangkachak kg. hnih vêl zêla luan zathum lai a siam bawk a, phâwte chu ‘Lebanon ngawpui In’ an tih pindanah chuan a dah a.

¹⁸Lalṭhutthlêng ropui, sainghovin a siam a, rangkachak hlîr hlakin a luan a.

¹⁹Lalṭhutthlêng lâwn chhohna kailâwn, rahka paruk nei a siam a, vawnbân a nei a.

²⁰Rahka sîr tawnah chuan sakeibaknei lem a dintîr a, a vaiin sâwm leh pahnih a nih chu. Lalṭhutthlêng hnung lamah chuan bâwngpa lu lem a awm a, a sîr tuakah chuan sakeibaknei lem a awm bawk a. Chutiang khawpa lalṭhutthlêng ropui chu khawii ramah mah a awm lo.

²¹Solomona no chu rangkachak vek a ni. ‘Lebanon ngawpui In’ an tih pindan chhûnga an thil eina bungbêlte phei chu rangkachak hlîr hlaka siam a ni. Solomona hun lai chuan tangkaruate hi an ngaihlu vak lo va, engah mah an hmang lo.

²²Lawng rual a nei bawk a, Lal Hirama lawng rualte nên a inkawp a, Tarsis-ah te kalin kum thum danah an lo haw a, rangkachak te, tangkarua te, saingho te, zâwng te, ârâwn te an rawn hâwn ṭhîn.

²³Lal Solomona chu khawvêl lal dang zawng zawng aiin a hausa a, a fing zâwk bawk a.

²⁴Pathianin a hnêna finna a pêk chu zir tûrin khawvêl ram tin aṭangin mi an lo kal huai huai a.

²⁵A hnêna lo kal apiangte chuan tangkarua leh rangkachaka thil siam te, puan te, râlthuam te, mosola te, sakawr te, sakawr puakphur chi te an rawn pe zut zut a. Hetiang hian kum tin an rawn pe ṭhîn.

²⁶Solomona chuan sakawrtawlailîr sângkhat leh zali leh sakawr chungchuang mi sîngkhat leh sânghnih lai a nei a. A ṭhen Jerusalem-ah a dah a, a dang chu khawpui hmun hrang hrangah a dah a.

²⁷A lal chhûng chuan tangkarua chu lungtê ang maiin Jerusalem-ah chuan a tam a, sidar thing pawh tlâng bulṭhut khawthlang lama theipui thing ang maiin a tam bawk.

²⁸Lal mi rawihte chuan Musri leh Kue aṭangin sakawr an tawlh chhuak a.

²⁹Aigupta rama sakawr-tawlailîr an tawlh chhuak bawk. Hit mite leh Suria lalte hnênah sakawr-tawlailîr pakhat tangkaraw tlang zaruk leh sakawr pakhat tangkaraw za leh sawmnga zêlin an hralh ṭhîn.