Read Mizo Lushai LEHKHABU PAKHATNA LALTE 11 Bible Online

LEHKHABU PAKHATNA LALTE 11 - Mizo Lushai bible

LEHKHABU PAKHATNA LALTE 11

¹Solomona chuan Farawa fanu chang lo pawh hnam dang nula a hmangaih a, nupui atân Moab mi te, Amon mi te, Edom mi te, Sidon mi te leh Hit mi te pawh a nei bawk a.

²LALPA chuan Israel-te hnênah, “Hnam dang nulate nupuiah nei suh u, an pathiante in zui palh ang e,” a ti chungin nupuiah a nei a.

³Solomona chuan lal fanu zasarih nupuiah a nei a, hmei zathum a nei bawk a; a nupuite chuan ani chu an hruai kawi ta a ni.

⁴A lo tar hnu chuan a nupuite chuan an pathian lamah an hruai ta a, a pa Davida ang khân LALPA, a Pathian lakah a rinawm ve ta lo va.

⁵Sidon mite pathiannu Astarte leh Amon mite pathian tenawm tak Milkoma te chu a zui ve ta a.

⁶Solomona chuan LALPA mit hmuhin thil sual a ti a, a pa Davida ang khân a rinawm ve ta lo va.

⁷Jerusalem chhak tlângah Moab mite pathian tenawm tak Khemosa biakna a siam a, Amon mite pathian tenawm tak Milkoma biakna a siam bawk a.

⁸Hnam dang mi nupuia a neihte tân an pathian hnêna rimtui hâlna leh inthawina hmunte a siamsak bawk a.

⁹ LALPA, Israel-te Pathian chu, a hnênah vawi hnih lai a inlâr a, hnam dang pathiante be lo tûra a tih pawhin,

¹⁰Solomona chuan LALPA thu a zâwm lo va, Pathian a hawisan ta a.

¹¹LALPA chu Solomona chungah a thin a ur ta hle a, a hnênah, “Nang nêna kan thuthlung i bawhchhe lui a, ka thupêk i zâwm loh avângin ram chu ka chhuhsak ang che a, i hote zînga mi pakhat ka pe ang tih ka hrilh a che.

¹²Amaherawhchu, i pa Davida avâng khân i dam chhûng ni lovin i fapa rorêl chhûngin chu thil chu ka ti ang.

¹³Ram pum pui chu ka chhuhsak lo vang a, ka chhiahhlawh Davida leh ka tâna ka din Jerusalem avângin hnam khat chu a la chang ang,” a ti a.

¹⁴ LALPA chuan Solomona do tûrin Edom lal thlah Hadada chu a chawk tho va.

¹⁵Tûn hmain Davida leh Edom mite an indo va, Davida sipai hotu Joaba chu an mi thahte phûm tûrin a han chho va.

¹⁶Joaba leh a sipaite chu Edom ramah thla ruk an awm a, chumi chhûng chuan mipa zawng zawng an that vek a.

¹⁷Hadada chu a pa chhiahhlawhte nên Aigupta ramah an tlânchhia a, ani chu naupang tê a la ni nghe nghe a.

¹⁸Midian ram an chhuahsan a, Paran-ah an kal a, mi ṭhenkhatin an zâwm a. Aigupta-ah an chhuk a, lal chuan chênna tûr ram te, in te leh ei tûr te a lo pe a.

¹⁹Hadada chuan lal rin a kai a, lalnu Tahpenesi laizâwn chu Aigupta lal chuan nupuiah a neihtîr a.

²⁰A nupui chuan fapa, Ganubata a hrinsak a, lal fapa dangte angin lalnu chuan a enkawl a.

²¹Davida thih thu leh a sipai hotu Joaba thih thu Hadadan Aigupta ram aṭang chuan a lo hria a, lal hnênah chuan, “Kan ramah min hâwntîr tawh rawh le,” a ti a.

²²Lal chuan, “Engah maw? Eng nge i tlâkchhama in rama hâwn i duh tâk mai le?” a ti a. Hadada chuan, “Eng mah tlâkchham ka nei lo; mahse, min hâwntîr mai teh,” a ti a. Edom lal Hadada chu Israel-te hmêlma tawh khirh ber a lo ni ta a.

²³Pathianin Eliada fapa Rezona chu Solomona a huattîr bawk a. Rezona chu a pa Hadadezera, Zoba lal hnên aṭangin a tlân bo va,

²⁴helho hruaitu a lo ni ta a. Hei hi Davidan Hadadezera a hneh a, a hmêlma Suria-ho a thah chiam hnua thil thleng a ni. Rezona leh a mite chu an chhuak a, Damaska khuaah an awm a, a zuitute chuan Suria ram lal atân an ruat ta a.

²⁵Solomona dam chhûng zawng Israel-te hmêlma a lo ni ta a ni.

²⁶Solomona dotu dang pakhat chu a ṭhuihruai zînga mi, Jeroboama, Nebata fapa, Efraim ram Israel khuaa mi a ni. A nu chu Zeruii, hmeithai a ni.

²⁷A hel dân chu hetiang hi a ni. Solomonan Jerusalem chhak lam ruam a chhûng khat a, kulhte a siam ṭha a.

²⁸Jeroboama chu tlangvâl fel tak leh taima tak a ni tih hriain Manasea bial leh Efraim bial chunga hna thawktu chhawr luihte enkawltu atân a ruat a.

²⁹Ni khat chu Jerusalem aṭangin Jeroboama chu a lo kal a, Silo khua aṭanga lo kal zâwlnei Ahija nên ramhnuaiah an intâwk a.

³⁰Ahija chuan a kawrfual thar hâk chu a hlîp a, phel sâwm leh pahnihah a pawtthlêr a.

³¹Jeroboama hnênah, “Phel sâwm hi nei rawh; LALPA, Israel-te Pathian chuan heti hian a ti: Ngai teh, Solomona ram hi ka chhuhsak ang a, hnam sâwm hi ka pe ang che.

³²Ka chhiahhlawh Davida avâng leh Israel ram puma ka puala ka thlan Jerusalem avângin hnam khat chu a chang ve ang chu.

³³Ani chuan Sidon mite pathiannu Astarte te, Moab mite pathian Khemosa te, Amon mite pathian Milkoma te min zuisan a, a pa Davida angin ka dân leh thupêk a pawisa lo va, ka kawng a zawh lo va, ka mite hmuha thil dik a tih hek loh avângin.

³⁴Mahse, Solomona chu ram pum pui ka chhuhsak lo vang. Ka chhiahhlawh Davida, ka thlan leh ka dân leh thupêkte zâwmtu avângin a dam chhûng chuan ka laltîr ang.

³⁵A fapa kut ata ram chu ka chhuhsak ang a, hnam sâwm ka pe ang che.

³⁶Hnam khat erawh chu a fapa ka pe ang a, min biakna hmun atâna ka thlan Jerusalem khuaah Davida thlahte chuan ro an rêl ang.

³⁷Nang erawh chu ram zau tak chungah ro i rêl ang a, Israel-te lalah i awm ang.

³⁸Ka chhiahhlawh Davida anga ka thu zâwma, ka dân pawisaa, ka mithmuha ṭha taka i awm chuan i hnênah ka awm reng ang. Israel-te lalah ka siam ang che a, Davida hnêna ka tiam angin i thlahten i hnuah pawh ro an rêl zêl ang.

³⁹Solomona sualna avângin Davida thlahte chu ka hrem dâwn, kumkhua erawh chuan ka hrem lo vang,” a ti a.

⁴⁰Solomona chuan Jeroboama chu thah a tum ta a, Jeroboama chu Aigupta lal Sisaka hnênah a tlân a, Solomona thih hma chuan a awm ta reng a.

⁴¹Solomona chanchin dang, a thiltihte leh a finna thute chu Solomona chanchin ziakna bu-ah a chuang a.

⁴²Israel ram pum puiah kum sawmli chhûng Jerusalem-ah ro a rêl a.

⁴³Solomona chu a thi a, a pa Davida khawpuiah an phûm a, a fapa Rehoboama chu a hmunah a lal ta a.