Read Mizo Lushai LEHKHABU PAKHATNA LALTE 12 Bible Online

LEHKHABU PAKHATNA LALTE 12 - Mizo Lushai bible

LEHKHABU PAKHATNA LALTE 12

¹Rehoboama chu Sekem khuaah a kal a, chutah chuan lala siam tûrin Israel-ho hmâr lama awmte chu an lo pung khâwm a.

²Nebata fapa Jeroboama chu Solomona hlauvin Aigupta ramah a tlân bo va, a thih thu a hriatin a lo haw leh ta a.

³Hmâr lama Israel-te chuan an va pun a, Rehoboama hnênah chuan an kal ho ta a, a hnênah,

⁴“I pa khân min chhawr nasa hle a, kan phur a tirit êm êm a, nang chuan min chhawr nêpin kan phur min tihzânsak deuh la, i khua leh tuiah kan awm ang e,” an ti a.

⁵Rehoboama chuan, “Ni thum hnuah lo kal leh ang che u,” a ti a. Mite chu an ṭîn ta a.

⁶Lal Rehoboama chuan a pa Solomona dam laia a bula awm ṭhîn upate chu a râwn a, “Hêng mite hi engtia chhân tûr nge ni le?” a ti a.

⁷Anni chuan, “Hêng mite hi ṭha taka enkawl i duh chuan an dîl hi ṭha takin chhâng la; tichuan, i lakah an rinawm kumkhua ang,” tiin an chhâng a.

⁸Upaho thurâwn chu a pawm duh lo va, tlangvâl, ama rualpui, a kawm ṭhînte chu a râwn a.

⁹“Hêng mi, kan phur min tihzânsak deuh rawh titute hi engtin nge ka chhân ang?” a ti a.

¹⁰A rualpui tlangvâlho chuan, “Hêngho, ‘I pain kan phur a tirit êm a, min tihzânsak rawh,’ titute hi heti hian chhâng mai rawh: ‘ka kutzungtê pawh hi ka pa kâwng ai chuan a khauh vang.

¹¹Ka pain in phur a tirit hle a nih chuan kei chuan ka belhchhah ang. Tiangin a vua che u a, kei chuan khawmualkaikuangin ka hrem ang che u,’ ti ang che,” an ti a.

¹²Ni thum hnuah chuan Jeroboama leh Israel mite chu Rehoboama sawi ang khân an lo kal a.

¹³Lal chuan upaho thurâwn kha a zâwm duh lo va, mite chu ram takin a lo bia a.

¹⁴Tlangvâlte thurâwn ang khân mite hnênah chuan, “Ka pa khân in phur a tirit hle maw? Kei chuan ka belhchhah ang. Tiangin a vua che u a, kei chuan khawmualkaikuangin ka hrem ang che u,” a ti a.

¹⁵Silo khuaa zâwlnei Ahijan Nebata fapa Jeroboama hnêna a sawi a thlen theih nân LALPA chuan a tihtîr a ni. Hei vâng hian lal chuan mipuite chu a lo chhâwn ṭha duh lo va.

¹⁶Israel mite chuan lalin an thu a ngaihsak lo tih an hriatin lal chu an chhâng a, “Davida ramah chan eng nge kan neih ve le? Jesaia thlahte zîngah chanvo eng nge kan neih? Davida thlahte chu an awm awmin awm rawh se,” an ti a. Israel mi zawng zawng chu in lamah an haw ta a.

¹⁷Judai rama awm Israel mite chungah chauh chuan Rehoboama chu a lal ta a.

¹⁸Lal Rehoboama chuan hna thawka chhawr luih pâwl hotu Adonirama chu Israel-ho ko tûrin a tîr a. Ani chu lungin an lo dêng hlum a. Chu veleh Rehoboama chu a tawlailîrah a chuang sawk sawk a, Jerusalem-ah a tlân haw ta a.

¹⁹Chutichuan, hmâr lam rama awm Israel mite chu Davida thlahte lakah tûn thlengin an hel ta a ni.

²⁰Israel miten Jeroboama chu Aigupta ram aṭangin a lo haw tih an hriat chuan an pun khâwmnaah an sâwm a, ani chu Israel lalah an siam ta a. Juda hnam chauh chu Davida thlahte lamah an ṭang ta a.

²¹Lal Rehoboaman Jerusalem a thlen chuan Benjamin mi leh Juda mi zînga sipai ṭha ṭha nuaikhat leh sîngriat a khâwm a, hmâr lama awm Israel-te chu a thuhnuaia dah leh tûrin beih a tum ta a.

²²Mahse, Pathian mi, Simeia hnênah LALPA thu a lo thleng a.

²³Juda lal Solomona fapa Rehoboama hnênah te, Juda hnam pum pui leh Benjamin hnam hnênah te leh mi dang awm vete hnênah,

²⁴“LALPA chuan heti hian a ti, ‘in unau, Israel-te chu han bei suh u, in vaiin haw vek rawh u, an thil tih hi keima tih a ni e,’ tiin a sawi,” a ti a. Tichuan, LALPA thupêk chu pawmin mahni inah an hâwng ta vek a.

²⁵Israel lal Jeroboama chuan Efraim tlângrama Sekem khua chu kulhin a hung a, chutah chuan rei lo tê a awm a. A chhuak leh a, Penuel khua chu kulhin a hung leh a.

²⁶Jeroboama chuan, “Ram hi Davida chhûngten an chang leh mai ang a!” a ti rilru a ni.

²⁷“Mite chu Jerusalem-ah LALPA hnêna inthawi tûra an chhoh fo chuan an pu Rehoboama, Juda lal an bêl ang a, min that mai ang,” a ti bawk a.

²⁸Chutiang thil a ngaihtuah hnu chuan rangkachakin bâwngno lem pahnih a siam a. A mite hnênah chuan, “In tân Jerusalem-a chhoh fo a harsa si a, hei hi in pathian, Aigupta ata hruai chhuaktu che u kha a ni e,” a ti a.

²⁹Pakhat chu Bethel-ah a dah a, pakhat chu Dan khuaah a dah a.

³⁰Mite chuan Bethel leh Dan khuaahte kalin thil an lo tisual ta a.

³¹Jeroboama chuan tlângchhîpahte pathian biakna hmun a siam a, Levia chi pawh ni lo, a duh duh puithiamah a ruat a.

³²Jeroboama chuan Judai rama kût an neih ṭhin angin thla riatna, ni sâwm leh panga ni chu kût ni atân a ruat a. Bethel-a maichâmah chuan rangkachaka siam bâwngno, ama kutchhuak hnênah a inthawi ta a. Tlângchhîp inthawina hmunah puithiamte a dah ang khân Bethel-ah chuan puithiamte a dah a.

³³Thla riatna, ni sâwm leh panga ni, Israel mipui tâna kût ni a ruatsakah chuan Bethel-ah a kal a, maichâmah chuan inthawina a hlân a.