Read Mizo Lushai LEHKHABU PAKHATNA LALTE 13 Bible Online

LEHKHABU PAKHATNA LALTE 13 - Mizo Lushai bible

LEHKHABU PAKHATNA LALTE 13

¹Jeroboama chu thil hlân tûra maichâm hmaa a din lai chuan LALPA mi tirh, zâwlnei, Judai ram aṭangin Bethel-ah a lo thleng a.

²LALPA thupêkin zâwlnei chuan maichâm chu hetiangin a hau va: “Maichâm, maichâm, LALPA chuan heti hian a ti: Davida thlah aṭangin a hming Josia a lo piang ang a, i chunga milem pathian hnêna rimtui hâl ṭhîntu puithiamte chu a rawn sâm ang a, i chungah an ruhte nên a rawn hâl ang,” tiin.

³Zâwlnei chuan a sawi zêl a, “He maichâm hi a phel phawk ang a, a chunga meivâpte pawh a la darh vek ang. Tichuan, LALPA chuan keimah mi hmangin thu a sawi a ni tih in hria ang,” a ti a.

⁴Bethel-a maichâm chu Pathian miin a hau tih lal Jeroboama chuan a hriatin maichâm bul aṭang chuan ani chu a kâwk a, “Man rawh u,” a ti a. Chu veleh lal bân chu a khawng a, a la thla thei ta lo va.

⁵Maichâm chu a phel phawk a, meivâpte chu LALPA hminga zâwlneiin a sawi ang khân leiah a darh ta vek a.

⁶Lal Jeroboama chuan zâwlnei hnênah, “Khawngaih takin, LALPA, i Pathian hnênah ka bân damna hi min dilsak rawh,” a ti a. Zâwlnei chu LALPA hnênah a ṭawngṭai a, lal bân chu a dam ta a.

⁷Lal chuan zâwlnei hnênah, “Ka inah lo kal la, ka hnênah eiin in la; tichuan, lâwmman ka pe ang che,” a ti a.

⁸Zâwlnei chuan lal hnênah, “I sum zâtve pawh min pe dâwn mah la, i inah chuan ka kal lo vang a, i eng mah ka eiin ka in lo vang.

⁹LALPA chuan eng mah eia in lo tûr leh ka lo kalna kawngah pawh kîr leh tawh lo tûrin min ti a ni,” a ti a.

¹⁰Tichuan, Bethel panna, a lo kal kawnga hâwng lovin kawng dangah a hâwng ta a.

¹¹Zâwlnei putar pakhat hi Bethel-ah chuan a awm a. A fapa pakhat chuan chumi nia Judai ram aṭanga zâwlnei lo kalin Bethel-a a thil tih leh lal Jeroboama hnêna a thu sawite chu a hrilh a.

¹²Zâwlnei putar chuan a fate hnênah, “Khawii lamah nge a kal tâk?” a ti a. A kalna lam an hrilh a.

¹³Sabengtung buatsaihsak tûrin a fate chu a ti a, an buatsaih zawh chuan,

¹⁴Judai ram aṭanga zâwlnei lo kal chu a ûm ta a. Ani chu sasaw thing hlimah a lo ṭhu a, “Judai rama zâwlnei kha i ni em?” a ti a. Ani chuan, “Ni e,” a ti a.

¹⁵Zâwlnei putar chuan, “Lo kal la, ka inah chaw rawn ei rawh,” a ti a.

¹⁶Judai ram zâwlnei chuan, “I ruala lo kîr thei ka ni lo, i hnêna ei leh in thei ka ni hek lo.

¹⁷LALPA chuan eng mah ei lo tûr leh ka lo kalna kawng ngaia kîr leh lo tûrin min ti tlat a ni,” a ti a.

¹⁸Bethel zâwlnei putar chuan a hnênah, “Kei pawh nang ang bawkin zâwlnei ka ni a, LALPA tirh Vântirhkohvin ka hnênah, ‘I ina eia in tûrin ani chu rawn hruai hâwng rawh,’ min ti a ni,” tiin dâwt a hrilh a.

¹⁹Judai ram zâwlnei chuan zâwlnei putar chu a zui a, a hnênah chaw a ei ta a.

²⁰Chaw an kîl lai chuan LALPA thu chu zâwlnei putar hnênah a lo thleng a.

²¹Judai ram aṭanga zâwlnei hnênah chuan, “LALPA thu i zâwm lo va, a thupêk angin i ti hek lo.

²²I kîr leha, ei leh in lo tûra a tihna hmunah i eia i in avângin i thi ang a, i ruang chu in chhûngkaw thlânah phûm a ni ve lo vang,” a ti a.

²³An ei kham chuan zâwlnei putar chuan Judai ram zâwlnei tân a sabengtung a buatsaih a, a chuantîr ta a.

²⁴Kawngah chuan sakeibaknei a va tâwk a, a lo seh hlum a. A ruang chu kawngah a lo thal reng a, a sîrah sabengtung leh sakeibaknei chu an lo ding reng bawk a.

²⁵Kawnga mi lo kalin a ruang chu an va hmu a, sakeibaknei a bula ding nên chuan. Bethel khuaah an va tlân a, an thil hmuh chu an va sawi a.

²⁶A rawn hruai kîrtu zâwlnei putarin a lo hriat chuan, ‘E, LALPA thupêk zâwm lotu zâwlnei kha a nih chu. LALPA sawi tawh angin ani chu seh hlum tûrin sakeibaknei a tîr a nih chu,” a ti a.

²⁷A fate hnênah chuan, “Ka sabengtung kha min han buatsaihsak teh u,” a ti a.

²⁸An buatsaih zawh chuan a tlân a, zâwlneipa ruang, kawnga lo thal reng leh a bula sabengtung leh sakeibaknei lo ding reng chu a va hmu a. Sakeibaknei chuan zâwlnei chu a ei lo va, sabengtung pawh a bei zui hek lo.

²⁹Zâwlnei putar chuan a ruang chu a hlâwm a, sabengtung chuan a phur a, Bethel-a phûm tûrin a la ta a.

³⁰Zâwlnei putar chuan an chhûngkaw thlânah a phûm a, “Aw ka unaupa, ka unaupa,” tiin a fate nên an ṭah a.

³¹An vui zawh chuan zâwlnei chuan a fate hnênah, “Ka thih hun chuan he thlânah hian min phûm ve ula, he mi bulah hian min zalh ang che u.

³²LALPA thupêka Bethel maichâm thu leh Samaria khawpuia inthawina hmun zawng zawng chungthu a sawite chu a lo thleng dik ngei dâwn a ni,” a ti a.

³³Israel lal Jeroboama chuan a nun sual a sim duh chuang lo va; mi narân zîng aṭangin a maichâm dina rawngbâwl tûr puithiamte a ruat belh zêl a. Puithiam nih duh apiang hmunsânga rawngbâwl tûrin a ruat a.

³⁴He thil sual a tih hian ama chhiatna leh a thlahte thlenga boralna a thlen ta a ni.