Read Mizo Lushai LEHKHABU PAKHATNA LALTE 14 Bible Online

LEHKHABU PAKHATNA LALTE 14 - Mizo Lushai bible

LEHKHABU PAKHATNA LALTE 14

¹Jeroboama fapa Abija chu a damlo va.

²Jeroboama chuan a nupui hnênah, “Ka nupui i ni tih tu man an hriat theih loh nân inchei danglam la, Israel lal ka nih tûr thu min hrilhtu zâwlnei Ahija, Silo khuaa awm hnênah va kal teh.

³Chhang tlâwn sâwm leh kêk tlêm azâwng leh khawizu ûm khat kensak la, naupang awm dân tûr hi a lo hrilh thei ang che,” a ti a.

⁴A hrilh ang chuan Jeroboama nupui chu Silo khuaa Ahija inah chuan a va kal a, Ahija chu a upat tawh avângin a mit a fiah tawh lo va.

⁵LALPA chuan Ahija hnênah, “Jeroboama nupui, a fa damlo chungchâng zâwt tûr chein a lo kal a, hetiangin lo chhâng ang che. Mi narân angin a inchei danglam a ni,” a ti a.

⁶Kawngkaa lo lût thâwm Ahijan a hriat chuan, “Lo lût rawh, Jeroboama nupui i ni lâwm ni? Engtiziaa inchei danglam nge i nih? Chanchin lâwmawm lo tak ka lo hrilh ang che.

⁷Kal la, LALPA, Israel-te Pathian thuchhuak hi Jeroboama hnênah hetiangin va sawi rawh. ‘Mipui zîng ata ka chawisâng che a, ka mi Israel-te hruaitu atân ka dah che a.

⁸Davida chhûngte ram ka chhuhsak a, ka pe che a. Mahse, ka chhiahhlawh Davida angin i awm lo va, ani chuan ka thupêkte a zâwm a, tih tak zetin mi zui a, ka mit hmuhah thil dik chauh a ti ṭhîn.

⁹Nang zawng, i hmaa mite zawng zawng aiin i sual a; ka huatzâwng tak, pathian dangte leh milem chhûnte i siam a, mi hawisan ta a.

¹⁰Hêng avâng hian i thlahte, mipa fa tawh phawt chu naupang aṭanga puitling thlengin ka tiboral vek dâwn. Bawlhhlawh phiah fai ang maiin i chhûngkua chu ka la bo vek ang.

¹¹‘Jeroboama chhûngte, khawpuia thite chu, ui-in an ei ang a, tâmlaka thi chu chunglêng savaten an tlân ang,’ chu chu LALPA thuchhuak a ni,” a ti a.

¹²“Nang pawh haw la, khuaa i luh veleh naupang chu a thi ang.

¹³Israel mi zawng zawngin an sûn ang a, an phûm ang. Jeroboama chhûngte zîngah ani hi zawng LALPA, Israel-te Pathian mit hmuha ṭha a nih avângin amah chauh hi Jeroboama chhûngte zîngah thlâna phûm a ni ang.

¹⁴Jeroboama chhûngkaw tiboral tûrin LALPA chuan Israel-te chunga rorêltu a mi duhzâwng tak a ruat thuai dâwn.

¹⁵LALPA chuan Israel-te chu a hrem ang a, lui kam phairuang angin a tinghîng dual dual ang. Israel mite chuan pathiannu Aseri lemte an siam a, LALPA an tihthinur avângin an pute hnêna a pêk ram ṭha tak aṭangin a sawn chhuak ang a, Eufretis lui râlah a sawn darh vek ang.

¹⁶Israel-te chu Jeroboaman a hruaisual avângin LALPA chuan a hawisan ang,” a ti a.

¹⁷Jeroboama nupui chu Tirza khuaah a hâwng leh ta a, in a thlen veleh an fa chu a thi ta a.

¹⁸LALPA chhiahhlawh Ahijan a lo sawi tawh ang khân Israel mite chuan naupang chu an ṭah a, an phûm ta a.

¹⁹Jeroboama chanchin dang, a râl beih thu te, a rorêl dân te chu Israel lalte chanchin ziakna bu-ah a chuang.

²⁰Jeroboama chu kum sawmhnih leh pahnih chhûng a lal a, a thi a, an phûm a, a fapa Nadaba chuan a ai a awh ta a.

²¹Solomona fapa Rehoboama chu kum sawmli leh pakhat a nihin Judai ramah a lal ṭan a. Israel pum puia amah biakna hmun tûr LALPA thlan Jerusalem-ah kum sâwm leh pariat ro a rêl a. A nu chu Naami, Amon hnam a ni.

²²Juda mite chu LALPA mit hmuhah an sual hle a, an pute ai mahin LALPA an tithinur zual a.

²³Milem pathian biakna hmun tam tak an siam a, tlângah te, thingbuk hnuaiah te lung serh leh pathiannu Aseri lim te an phun a.

²⁴Chu aia la sual zâwk chu an milem biaknaah chuan mipa leh hmeichhiate bawlhhlawh takin an khawsa ho va. Israel fate Kanan ram an lo luha, an hmaa an hnawh chhuah tâk hnamte awm dân mawi lo zawng chu Juda mite hian an la ve ta a ni.

²⁵Lal Rehoboama lal kum nganaah Aigupta lal Sisaka chuan Jerusalem a rûn a.

²⁶LALPA Tempula ro te, lal ina ro te, Solomonan rangkachaka phaw a siamte nên a phur hâwng chiam a.

²⁷Lal Rehoboama chuan chûng phaw an lâksak tâk aiah dârin phaw dang a siam leh a, lal in kawngka vêngtute a kawltîr a.

²⁸Lal chu LALPA Tempula a kal apiangin vêngtute chuan phaw chu an keng a, chumi hnuah pindanah an dah leh hlawm ṭhîn a.

²⁹Rehoboama chanchin dangte leh a thiltih zawng zawng chu Juda lalte chanchin ziakna buah a chuang a.

³⁰A lal chhûng zawngin Rehoboama leh Jeroboama chu an indo reng a.

³¹Rehoboama chu a thi a, Davida khawpuiah an phûm a. A nu chu Naami, Amon hnam a ni. A fapa Abija chuan a ai a awh ta a.