Read Mizo Lushai LEHKHABU PAKHATNA LALTE 15 Bible Online

LEHKHABU PAKHATNA LALTE 15 - Mizo Lushai bible

LEHKHABU PAKHATNA LALTE 15

¹Nebata fapa Jeroboama, Israel lal chu kum sâwm leh pariat a lal kumin Judai ramah Abija a lo lal ve a.

²Jerusalem-ah kum thum a lal a, a nu chu Maaki, Absaloma fanu a ni.

³A pa angin thil sual a ti a, a pu Davida hlan ang khân a thinlung chu LALPA hnênah a hlân ve lo.

⁴Nimahsela, Davida avângin LALPA, a Pathian chuan Abija chu a thih hnua Jerusalem-a lal tûr fapa a pe a, Jerusalem khua pawh a humhimsak a.

⁵Hit mi, Uria chunga thil sual a tih bâk chu Davida chuan LALPA thupêkte a bawhchhe ngai lo va, a mit hmuha thil ṭha a ti ṭhîn a.

⁶Abija rorêl chhûng zawng Jeroboama leh Abija chu an indo reng a.

⁷Abija chanchin dang, a thiltihte chu Juda lalte chanchin ziaknaah a chuang.

⁸Abija chu a thi a, Davida khawpuiah an phûm a, a fapa Asa chu a pa aiawhin a lal a.

⁹Israel lal Jeroboama kum sawmhnih a lal kumah, Asa chu Judai ramah a lo lal a.

¹⁰Kum sawmli leh pakhat Jerusalem-ah a lal a, a pi chu Absaloma fanu Maaki a ni.

¹¹Ani chuan a pu Davida angin LALPA lâwmzâwng a ti ṭhîn.

¹²Milem pathian biakna hmuna mipa leh hmeichhe inzuarte chu ram chhûng ata a hnawt chhuak a, a puten milem pathian an siam zawng zawng chu a tichhia a.

¹³A pi Maakin Aseri lim tenawm tak chu a phun avângin, lalnu a nihna a hlihsak a, Asa chuan milem pathiante chu a kit a, Kidron ruamah a hâl a.

¹⁴Ram chhûnga pathian dang an biakna hmun zawng zawng chu lal Asa chuan tibo vek lo mah se, a dam chhûng zawng LALPA chauh a vuan a.

¹⁵A pain Pathian hnêna a thilpêk zawng zawng chu Asa chuan tempulah a dah a; amah ngeiin rangkachak leh tangkarua a hlante chu a dah bawk a.

¹⁶Juda lal Asa leh Israel lal Baasa chu an lal chhûng zawng an indo va.

¹⁷Israel lal Baasa chuan Judai ram a han rûn a, Judai ram aṭanga mi an lo chhuaha, mi dang Judai rama an luh theih loh nân Rama khuaah kulh a siam a.

¹⁸Asa chuan Tempul sum bâwm ata leh lal ina rangkachak leh tangkaruate chu a la chhuak a, Damaska khuaa awm Suria lal Ben-hadada hnênah a thawn a. Ben-hadada chu, Heziona tupa, Tabrimona fa a ni. A mi tirhte chuan hetiangin an sawi a:

¹⁹“Ka pa leh i pa an ṭang dûn ang khân keini pawh i ṭang dûn teh ang. En teh, rangkachak leh tangkarua ka rawn thawn a che: Israel lal Baasa nên in inṭhianna titâwp la, kan ram chhûnga a sipaite hnûk kîr teh se,” a ti a.

²⁰Ben-hadada chuan Asa thu rawt chu a lo remti a, a sipai hotu a ko va, a sipaite chuan Israel ram chu an rûn ta a. Izon te, Dan te, Abel-beth-maaka te an la a, Galili dîl kiang ramte leh Naftali bial pum pui chu an lâksak ta a.

²¹Chûng thu chu Lal Baasan a hriatin Rama khaw kulh a siam chu a chawlhsan a, Tirza khuaah a awm ta a.

²²Lal Baasan Rama khaw kulh a siam nân lung leh thing a hmante chu la tûrin Asa chuan Juda ram mi zawng zawng chu a pun a. Benjamin biala Geba leh Mizpa khaw kulh siam nân a hmang ta a.

²³Lal Asa thil tih dang, a huaisenzia te, khaw kulh a siam thu te Juda lalte chanchin ziakna bu-ah a chuang. A tar hnuin a ke-ah hri ṭha lo a vei a, a bawksawp ta a.

²⁴Asa chu a thi a, Davida khawpuia lal chhûngkaw thlânah an phûm a, a fapa Jehosafata chu a aiawhin a lal ta a.

²⁵Juda lal Asa lal kum hnihnaah, lal Jeroboama fapa Nadaba chu Israel ramah a lal a, kum hnih ro a rêl a.

²⁶A pa ang bawkin LALPA mite hmuha thil sual a ti a, Israel-te chu a hruai sual ta a.

²⁷Ahija fapa Baasa, Isakar hnama mi chuan Nadaba chu a phiar ru a, Nadaba leh a sipaite chuan Filistia rama Gibethon khua an hual laiin Baasa chuan Nadaba chu a that a.

²⁸Juda lal Asa lal kum thumnaah Baasa chuan Nadaba chu a that a, a aiawhin Israel ramah chuan a lal ta a.

²⁹A lal ṭan chauh tihin Jeroboama chhûngte chu a that vek a. LALPA chuan a chhiahhlawh Ahija, Silo khuaa mi hnêna a sawi tawh ang khân Jeroboama chhûngte chu tu mah zuah lovin a that ta a.

³⁰Jeroboama thil sual tih chuan Israel te chu a hruai sual a, chu chuan LALPA, Israel-te Pathian a tithinur a ni.

³¹Nadaba chanchin dang, a thiltih zawng zawng chu Israel lalte chanchin ziakna bu-ah a chuang a.

³²Juda lal Asa leh Israel lal Baasa chu an lal chhûng zawng an indo a ni.

³³Juda lal Asa lal kum thumnaah Ahija fapa Baasa chu Israel mi zawng zawng chungah a lal a, Tirza khuaah kum sawmhnih leh pali ro a rêl a.

³⁴LALPA mit hmuhah thil sual a ti a, Jeroboama angin Israel-te hruai sualtu a ni.