Read Mizo Lushai LEHKHABU PAKHATNA LALTE 16 Bible Online

LEHKHABU PAKHATNA LALTE 16 - Mizo Lushai bible

LEHKHABU PAKHATNA LALTE 16

¹Baasa chungchâng, Zâwlnei Jehua, Hanania fapa hnênah LALPA thu hetiangin a lo thleng a,

²“Eng mah ni lo kha, Israel-te rorêltu atân ka ruat che a. Tûnah Jeroboama anga thil sual tiin ka mi Israel-te i hruai sual a, an sualna chuan min tithinur ta a ni.

³Chuvângin, Nebata fapa Jeroboama chhûngte chunga ka tih angin nang leh i chhûngte hi ka tiboral vek dâwn.

⁴I chhûngte zînga mi khawpuia thi chu ui-in an sa an tlân ang a, ramhnuaia thite chu chunglêng savaten an tlân ang,” a ti a.

⁵Baasa chanchin dang, a thiltih te, a huaisenzia te chu Israel lalte chanchin ziakna buah a chuang.

⁶Baasa chu a thi a, Tirza khuaah an phûm a, a fapa Ela chu a aiawhin a lal a.

⁷Baasa leh a chhûngte chuan LALPA mit hmuha thil sual an tih nasat êm avângin Hanania fapa zâwlnei Jehua hnênah LALPA thu a lo thleng a. Lal Jeroboama anga thil sual a tih avâng leh Jeroboama chhûngte a thah vek avângin LALPA chu a chungah a thinur ta hle a ni.

⁸Juda lal Asa kum sawmhnih leh paruk a lal kumah Baasa fapa Ela chu Israel ramah a lal a. Tirza khuaah kum hnih a lal a.

⁹A hote zînga pakhat, Zimria, a tawlailîr zâtve lai chunga hotu chu a lakah a hel a. Chutih lai chuan Ela chu Tirza khuaah a awm a. Lal in enkawltu Arza inah zu a lo rui a.

¹⁰Zimria chu inah chuan a va lût a, Ela chu a that a, a aiah a lal ta a. Chu chu Juda lal Asa kum sawmhnih leh pasarih a lal kum a ni.

¹¹Zimrian lalṭhutthlêng a luah veleh Baasa chhûngte chu a that vek a, a laichîn leh a ṭhian, mipa tawh phawt chu tu mah a zuah lo.

¹²Baasa chungchânga zâwlnei Jehua hnêna LALPA thu lo thleng ang chuan Zimria chuan Baasa chhûngte chu a that vek a.

¹³Milem pathian an bia a, Israel-te an hruai sual avângin Baasa leh a fapa Ela chuan LALPA, Israel-te Pathian chu an tithinur atin a ni.

¹⁴Ela thiltih zawng zawng chu Israel lalte chanchin ziakna buah a chuang.

¹⁵Juda lal Asa, kum sawmhnih leh pasarih a lal kum chuan Zimria chu Tirza khuaah ni sarih chhûng Israel-te chungah a lal a. Israel sipaite chuan Filistia khua Gibethon chu an hual a.

¹⁶Zimrian lal a phiara, lal chu a that tih an hriat chuan chu khaw hualtute chuan, an riahhmunah chuan an hotupa Omria chu Israel lalah an siam ta a.

¹⁷Omria leh a hnêna mi awm zawng chuan Gibethon an ṭînsan a, Tirza khua chu an han hual ta a.

¹⁸Khua an la tih a hriat chuan Zimria chu lal in chhûnga kulhah a tlân lût a, lal inah chuan a inkalhkhum a, a kâng hlum ta a.

¹⁹LALPA mit hmuhin thil a tisual a, Jeroboama kawng a zawh a, Israel-te a hruai sual avângin chu thil chu a chungah a lo thleng ta a ni.

²⁰Zimria chanchin dang te, a phiar rûk thu te chu Israel lalte chanchin ziakna bu-ah a chuang.

²¹Israel mipui chu pâwl hnihah an inṭhen a, a zâtve chuan Ginata fapa Tibnia chu lala siam an duh a, a zâtve chuan Omria an zui a.

²²Omria zuitute chuan Ginata fapa Tibnia zuitute chu an hneh ta a. Tibnia chu a thi a, Omria chu a lo lal ta a.

²³Juda lal Asa lal kum sawmthum leh pakhat kumin Omria chu Israel-te chungah a lo lal ṭan a. Kum sâwm leh pahnih a lal a, a hun hmasa lam kum ruk chhûng chu Tirza khuaah a lal a.

²⁴Semera hnên aṭangin Samaria tlâng tangkarua sângrukin a lei a, chutah chuan khawpui a din a, kulh a siam a. Tlâng neitu hmasa Semera hming chawiin a khaw hmingah Samaria a sa a.

²⁵Omria chuan LALPA mit hmuhah thil sual a ti ṭhîn a, a hmaa mite zawng zawng aiin a sual a.

²⁶Nebata fapa Jeroboama awm dân ṭha lo zawng zawng a la a, Israel-te chu a hruai sual a, an milem biakte avâng chuan LALPA, Israel-te Pathian chu an tithinur hle a.

²⁷Omria chanchin dang, a thil tih theihzia te chu Israel lalte chanchin ziakna buah a chuang.

²⁸Omria chu a lo thi ve ta a, Samaria khuaah an phûm a, a fapa Ahaba chu a aiawhin a lal ta a.

²⁹Juda lal Asa chu kum sawmthum leh pariat a lal kumin Omria fapa Ahaba chu Israel-te chungah a lal ṭan a, Omria fapa Ahaba chu Samaria khuaah kum sawmhnih leh pahnih a lal a.

³⁰Omria fapa Ahaba chuan a hmaa lal zawng zawng ai khân thil sual a ti nasa zâwk a.

³¹Nebata fapa Jeroboama anga sual chu tâwk a ti lo va, Sidon lal Ethbaala fanu Jezebeli chu nupuiah a nei a. Baal pathiante a be ve ta zêl a.

³²Samaria khuaah Baal pathian maichâm a din a, Baal biakna inte a sa a.

³³Ahaba chuan Aseri lim a phun bawk a, a hmaa Israel lal zawng zawng aiin LALPA, Israel-te Pathian chu a tithinur a.

³⁴Ahaba lal laiin Bethel mi Hiela chuan Jeriko khua a din ṭha a; Nuna fapa Josua hnêna LALPA sawi tawh ang khân Hiela chuan lungphûm a phûm avângin a fapa upa ber Abirama a chân a, kulh kawngkhâr a siam ṭhat avângin a fapa naupang ber Seguba a chân bawk.