Read Mizo Lushai LEHKHABU PAKHATNA LALTE 18 Bible Online

LEHKHABU PAKHATNA LALTE 18 - Mizo Lushai bible

LEHKHABU PAKHATNA LALTE 18

¹Kum thum lai khua a khen hnu chuan LALPA thu chu Elija hnênah a lo thleng a, “Ahaba hnênah va kal rawh, ruah ka sûrtîr dâwn e,” a ti a.

²Elija chu Ahaba hmu tûrin a kal ta a, Samaria ramah chuan ṭâm chu a na hle a.

³Ahaba chuan lal in enkawltu Obadia a ko va, ani chu LALPA ṭih mi tak a ni a.

⁴Jezebelin LALPA zâwlnei a thah chiam lai khân Obadia hian zâwlnei za a hruai a, pâwl hniha siamin sawmnga ve vein pûkah a thukru a, chaw leh tui a pe ṭhîn a.

⁵Ahaba chuan Obadia hnênah, “Hawh teh, luikawr zawng zawng fang ila, tui i va zawng teh ang. Sakawr leh sabengtungte hi kan chhanhim theih nân hlobet awmnate i va zawng teh ang; chutilo zawng, rante hi kan chân vek dah ang e,” a ti a.

⁶Fan tûr ram an insem a, Ahaba leh Obadia chu mual hran ve veah an kal ta a.

⁷Obadia chu a kal zêl a, kawngah chuan Elija a tâwk thut a, Obadia chuan ani chu a hria a, kûnin chibai a bûk a, a hnênah, “Ka pu Elija, nang i ni maw?” a ti a.

⁸Ani chuan, “Ni e, keimah ka ni; kal la, i pu hnênah, Elija hetah a awm tih va hrilh rawh,” a ti a.

⁹Obadia chuan, “Eng nge ka tihsuala i chhiahhlawh hi thi tûra Ahaba kuta mi hlan i tum?

¹⁰LALPA, i Pathian nung chhâlin ka sawi e, ka puin ram tin mi tin zîngah a zawng mêk che asin. ‘Hetah a awm lo’ titu chu lalin an hmu lo ngei che a ni tih fiah nân chhia a chhamtîr ziah ṭhîn.

¹¹Nang erawh chuan ka pu hnênah kala, ‘Elija chu hetah a awm,’ tih hrilh tûrin mi ti a.

¹²Ka kalsan hnu chein LALPA Thlarauvin ka hriat lohna lamah a hruai daih ang che a, Ahaba ka va hrilha, a hmuh si loh che chuan min that mai dâwn asin. Kei i chhiahhlawh hi ka tleirâwl chhuah ata LALPA betu ka ni a.

¹³Ka pu hian Jezebelin LALPA zâwlneite a thah chiam laia ka thiltih kha i hria a ni lâwm ni? LALPA zâwlnei za, pâwl hniha siamin sawmnga ve ve pûkah ka thukru a, chaw leh tui ka pêk ṭhin kha.

¹⁴Tûnah ka pu hnêna kal a, ‘Elija hetah a awm,’ tih thu va hrilh tûra min ti mai hi min lo that ngei dâwn asin,” a ti a.

¹⁵Elija chuan, “A rawng ka bâwl, LALPA, Engkim Lalpa, mi nung hmingin vawiinah Ahaba hnênah ka inlan ngei ngei tûr a ni,” a ti a.

¹⁶Obadia chu Ahaba hmu tûr chuan a kal ta a, a va hrilh a; Ahaba chu zâwlnei Elija hmu tûrin a kal ta a.

¹⁷Ahaban Elija a hmuh chuan a hnênah, “Israel ram chawkbuaitu chu hetah hian a ni maw i lo awm?” a ti a.

¹⁸Elija chuan, “Israel-te ka tibuai hlei nêm; nangmah leh i pa hi a tibuaitute chu in ni zâwk e. LALPA thupêk in pawisa lo va, Baal te in be vei a.

¹⁹Tûnah, Israel mi zawng zawng min hmu tûrin Karmel tlângah ko khâwm rawh; Baal zâwlnei zali leh sawmnga leh Aseri zâwlnei zali, Jezebeli châwmte chu rawn hruai ang che,” a ti a.

²⁰Ahaba chuan Israel ram pumah thu a than a, Baal zâwlneite chu Karmel tlângah a ko khâwm a.

²¹Elija chu mipui zîngah a lo ding chhuak a, an hnênah, “Tuilairapin eng chen nge in awm dâwn? LALPA chu Pathian a nih chuan bia ula. Baal chu Pathian a nih leh bia ang che u,” a ti a, Mipui chu an ngawi reng a.

²²Elija chuan mipui hnênah, “LALPA zâwlnei la dam chhun ka ni a, Baal zâwlneite erawh chu zali leh sawmnga lai an ni.

²³Bâwngpa pahnih han la ula, pakhat chu Baal zâwlneite pual atân talh sela; chan sawm sela, thing chungah dah sela hâl rih suh se. Bâwngpa dang chu keiin ka buatsaih ve ang a, thing chungah ka dah ang a, ka hâl bîk lo vang.

²⁴Nangni Baal zâwlneiten in pathian in ko vang a, keiin LALPA ka ko vang a, meia rawn hâltu zâwk chu Pathian dik a ni ang,” a ti a. Mipui chuan, “Ni ang hmiang,” an ti a.

²⁵Elija chuan Baal zâwlneite hnênah, “Nangni in tam zâwk a, bâwngpa pakhat hi buatsaih hmasa rawh u, in pathian chu ko ula hâl erawh chu hâl suh u,” a ti a.

²⁶An puala bâwngpa ruat chu an la a, an buatsaih a, “Aw Baal, min han chhâng teh,” tiin zîng aṭangin chhûn thlengin an au an au va, an maichâm siam chu an lâm hual an lâm hual a; mahse, a rawn chhâng lo.

²⁷Chhûnah chuan Elija chuan nuihzatbûr chungin, “Au ta vak vak che u, pathian a ni lâwm ni? A inngaihtuah mêk emaw, a inthiar emaw, a zin emaw a ni mai thei! A muhîl a ni ang, kaitho rawh u,” a ti a.

²⁸An au ring tawlh tawlh a, an tih ṭhin dân angin chemte leh feiin thisen chhuak zawih zawih khawpin an invit a.

²⁹Ni a lo thlang her a, tlai lam inthawi hun thlengin an au dual dual a, tu mah chhângtu an awm lo va, thâwm eng mah hriat a ni lo.

³⁰Elija chuan mipui hnênah, “Lo kal hnai teh u khai,” a ti a. Mite chuan an va hnaih a, LALPA maichâm chim rem rum chu a siam ṭha a.

³¹LALPAN, “I hming chu Israela an ti ang,” tia a lo sawi Jakoba fa sâwm leh pahnih pualin lung sâwm leh pahnih Elija chuan a la a.

³²Chûng lung chuan LALPA tân maichâm a siam a. Maichâm vêl chuan lei a lai khuar a, chu chu tui litar sâwm leh pali dawng lai a ni.

³³Maichâm chungah chuan thing a chhep a, bâwngpa chu a chan sawm a, thing chungah chuan a dah a. Mite hnênah, “Bêl pali-ah tui chhûng khat ula, hâlral thilhlan leh thing hi leih huh vek rawh u,” a ti a.

³⁴An leih huh ta vek a, vawi thum an leih nawn a,

³⁵maichâm vêla lei laih khuar khat vek khawpin maichâm chu an leih huh hnêp a.

³⁶Tlai lam inthawi hunah zâwlnei Elija chuan maichâm chu a rawn pan hnai a, a ṭawngṭai a, “Aw LALPA, Abrahama te, Isaka te, Jakoba te Pathian, Israel Pathian i nih te, i thupêka hêng thil hi ti ka nih te tûnah han târ lang teh.

³⁷Aw LALPA, ka ṭawngṭai ngaithla la, min han chhâng teh! Tichuan, hêng mite hian LALPA Pathian chu i ni tih an hria ang a, simin i lamah an lo kîr leh dâwn nia,” a ti a.

³⁸LALPA chuan mei a rawn tîr a, hâlral thilhlan te, thing te, lung te chu a kâng ral vek a, lei pawh a kâng sen huam a, khuara tui tling chu a hîp kang vek a.

³⁹Mipuiin chu chu an hmuhin leiah an bawkkhup a, “LALPA hi Pathian chu a ni, LALPA hi Pathian chu a lo ni ngei e,” tiin an au chhuak a.

⁴⁰Elija chuan mipui hnênah, “Baal zâwlneite hi tu mah chhuah lovin man vek rawh u,” a ti a. Mite chuan an man a, Elija chuan Kison ruamah a hruai thla a, chutah chuan a that ta vek a.

⁴¹Elija chuan Ahaba hnênah, “Khai le, eiin in tawh rawh, ruah a lo sûr dâwn tawh e,” a ti a.

⁴²Ahaba chu ei leh in tûrin a kal ta a. Elija erawh chu Karmel tlâng chhîp lamah a chho va, a khûp kârah a kûn reng a.

⁴³A chhiahhlawh hnênah chuan, “Kal chhuak la, tuifinriat lam han thlîr teh,” a ti a. Ani chu a tho va, a han hawi vêl a, “Eng mah ka hmu lo,” a ti a. Elija chuan chutianga hawi vêl tûrin vawi sarih lai a kaltîr a.

⁴⁴A vawi sarihnaah chuan a chhiahhlawh chuan, “Tuifinriat aṭangin kuttum tiat lek chhûm a lo chho nel nel e,” a ti a. Elija chuan a chhiahhlawh hnênah, “Kal la, Ahaba chu a tawlailîr buatsaiha chhuak vat tûrin hrilh rawh, ruahin a dang dah ang e,” a ti a.

⁴⁵Rei lo teah chhûm dum vânah a lo lang tup tup a, thlite a lo tleh ta hum hum a, ruahpuivânâwn a lo sûr ta a; Ahaba chu a tawlailîrah a zuang lût a, Jezreel lamah a tlân haw ta a.

⁴⁶LALPA thiltihtheihna chu Elija chungah a lo thleng a, a kawrfual chu a kâwngah a vêt chhîng sauh sauh va, Jezreel panin Ahaba chu a tlân pêl ta a.