Read Mizo Lushai LEHKHABU PAKHATNA LALTE 19 Bible Online

LEHKHABU PAKHATNA LALTE 19 - Mizo Lushai bible

LEHKHABU PAKHATNA LALTE 19

¹Ahaba chuan Jezebeli hnênah Elija thiltih zawng zawng, zâwlneiho khandaiha a thah thute chu a hrilh a.

²Jezebeli chuan Elija hnênah, “Zâwlneiho chunga i tih angin naktûk tûn ang huna ka thah loh vaih che chuan pathianten an tih tihin min ti sela, nasa tak pawhin min sawisa rawh se, a ti,” tia hrilh tûrin mi a tîr a.

³Elija chuan a hlau va, himna zawngin a tlânchhe ta a. Judai rama Beer-seba a lo thleng a, chutah chuan a chhiahhlawh chu a hnutchhiah a.

⁴Ani chu thlalêrah nilêngin a kal leh a, thingbuk hnuaiah a ṭhu a, thih a dîl ta a, “Ka tlin ta lo, aw LALPA, ka nun hi la mai teh, ka tân thih a ṭha zâwk e,” a ti a.

⁵Thingbuk hnuaiah chuan a mu a, a lo muhîl ta a. Vântirhkoh hian a rawn khawih harh a, a hnênah, “Tho la, ei rawh,” a ti a.

⁶A han hawi a, a lu bulah chuan chhang ur hmin sa leh tuithâwl a lo awm a. Chhang chu a ei a, tui a in bawk a, a mu leh ta a.

⁷LALPA tirhkoh chu a lo kal leh a, a rawn khawih harh a, “Tho la, ei rawh, i kalna tûr a la hla hle si a,” a ti a.

⁸A tho va, a eiin a in a, a thil ei chuan a tichak thar leh ta a. Pathian tlâng Horeb a thlen thlengin ni sawmli leh zan sawmli a kal a.

⁹Chuta pûk pakhatah chuan riak tûrin a lût a. Tin, LALPA chuan a hnênah, “Elija, hetah hian eng nge i tih?” a rawn ti a.

¹⁰Ani chuan, “Engkim LALPA tân ṭhahnem ka ngai êm êm ṭhîn a; mahse, Israel-te chuan i thuthlung an bawhchhia a, i maichâm an tichim a, i zâwlneite khandaihin an that a; kei chauh hi ka la dam a, kei pawh hi min thah an tum a nih hi,” a ti a.

¹¹LALPA chuan a hnênah, “Lo chhuak la, tlângchhîpah lo kal la, LALPA hmaah lo ding rawh,” a ti a. LALPA chu a lo kal a, thlipui na tak a rawn tlehtîr a, tlâng chu a chhêm chim a, lungpuite a chhêm keh rem rum a; mahse, thliah chuan LALPA chu a awm lo. Thli chu a reh a, lîr a nghîng leh dur dur a, lîrnghîngah chuan LALPA chu a awm lo.

¹²Lîr nghîn zawh chuan mei a lo chhuak a; mahse meiah pawh chuan LALPA chu a awm lo. Mei a lo chhuah zawhah chuan ri lo aw a lo chhuak a.

¹³Elijan a han hriat chuan a kawrfualin a hmai a hup a, pûk kawngkaah a lo ding chhuak a, aw chuan, “Elija, hetah hian eng nge i tih?” a ti a.

¹⁴Ani chuan, “Engkim LALPA tân ṭhahnem ka ngai êm êm a; mahse, Israel-te chuan i thuthlung an bawhchhia a, i maichâmte an tichim a, i zâwlneite khandaihin an that a, kei chauh hi ka la dam a, kei pawh hi min thah an tum a nih hi,” a ti a.

¹⁵LALPA chuan a hnênah, “Thlalêr kawngah kîr leh la, Damaska khuaah lût la, Hazaela chu Suria lal atân hriak thih la,

¹⁶Nimsia fapa Jehua pawh Israel lal atân hriak thih bawk ang che. Tin, Abel Mehola khuaah Safata fapa Elisa chu i aiawha zâwlnei ni tûrin hriak thih bawk ang che.

¹⁷Hazaela khandaih pumpelh apiang Jehuan a that ang a, Jehua khandaih pumpelh chu Elisan a lo that ang.

¹⁸Israel ramah hian Baal hmaa la ṭhingṭhi ngai lo leh la fâwp ngai lo mi sângsarih ka tân ka zuah dâwn a ni,” a ti a.

¹⁹Elija chu a chhuak a, Safata fapa Elisa ho chuan bâwngpa tuak sâwm leh pahnih lei letah an lo chhawr a, a tuak sâwm leh pahnihna chu Elisa chuan a khalh a. Elija chuan a va pan a, a puan sin lai chu a bahtîr a.

²⁰Elisa chuan a bâwngte chu a tlânsan a, Elija chu a ûm ta a. Elija hnênah chuan, “Ka nu leh pa ka va chibai zet ang e; tichuan, ka rawn zui ang che,” a ti a. Elija chuan, “Va kal rawh, i chunga ka thiltih kha i hria alâwm maw?” a ti a.

²¹Elisa chu a kîr leh ta a, a bâwng chhawr laite chu a va talh a, leilehna hmanruate chu a sa chhum nân a hmang a, sa chu mite a pe a, an ei a. Tichuan, Elija zui tûrin a chhuak a, a rawng a bâwlsak ta a.