Read Mizo Lushai LEHKHABU PAKHATNA LALTE 2 Bible Online

LEHKHABU PAKHATNA LALTE 2 - Mizo Lushai bible

LEHKHABU PAKHATNA LALTE 2

¹Davida thih hun chu a lo hnai a, a fapa Solomona chu hetiang hian thu a chah a.

²“Mi dangte ang bawkin ka lo thi ve dâwn ta a, patling takin awm la, zâm rêng rêng suh.

³LALPA, i Pathianin a phûtte chu zâwm la, a kawng zawh la, a thuruat te, a thupêk te, awm dân tûr a tih te leh a thu hriattîr, Mosia Dân bu-a ziak te chu zâwm la; tichuan, i thiltih apiangah te, i kalna apiangah te i lo hmuingîl thei ang.

⁴LALPA chuan, ‘I thlahte chu fîmkhur taka an khawsaka, thinlung leh tih tak zeta ka thupêkte an zawm chuan Israel-te lalṭhutthlêng hi an luah reng ang,’ tia a tiam kha a hlen ang.

⁵Zeruii fapa Joaba hian ka pawi a khawih kha hre reng rawh; Israel sipai hotu pahnih, Nera fapa Abnera leh Jethera fapa Amasa a thah kha. Râlmuan laiin indo lai ang ziazângin thisen phuba a la a, pawi khawih lo thisen a chhuah hi a mawh ka phur a, ka tân a pawi hle a ni.

⁶Tih dân tûr chu i hre mai ang, tarkûnin dam suh se.

⁷Gilead mi Barzilaia fate chu lo khawngaih la, i dawhkânah chaw kîltîr ve ang che. I unaupa Absaloma hlauva ka tlânchhiat lai khân min lo khawngaih si a.

⁸“Tin, hei, Bahurim khuaa mi Benjamina thlah, Gera fapa Simeia hi i hnênah a awm a; ani hi Mahanaim pana ka kal lai khân ânchhia min lawh a; mahse, Jordan-ah mi hmuak tûrin a lo chhuk a, chutah chuan, “Khandaihin ka that lo vang che,” tiin LALPA hming chhâlin a hnênah thu ka tiam a.

⁹Mahse, hrem loh chuan chhuah suh ang che, patling i ni a, tih dân tûr chu i hre mai ang. A tar hunah i that dâwn nia,” a ti a.

¹⁰Davida chu a thi a, Davida khawpuiah an phûm a.

¹¹“Israel-te chungah kum sawmli a lal a, kum sarih Hebron-ah, kum sawmthum leh pathum chu Jerusalem-ah.

¹²Solomona chu a pa aiawhin a lal ta a, ram chu a nghet ta hle a ni.

¹³Hagiti fapa Adonija chu Solomona nu Bathsebi hnênah a kal a, ani chuan, “Ṭha lam thu-a lo kal em i nih?” a ti a. Adonija chuan, “Aw, ṭha lam thu ni e,” a ti a.

¹⁴Ani chuan, “I hnênah eng emaw sawi tûr ka nei e,” a ti a. Bathsebi chuan, “Sawi ta che,” a ti a.

¹⁵Ani chuan, “Ram hi ka ta a ni tawh zet a, Israel-ho zawng zawng pawhin an lal angah min en tih i hria a; mahse, thil a inher danglam a, ram chu ka unaupa chan a lo ni leh ta zâwk a, chu chu LALPA remruat a ni.

¹⁶Tûnah, thil pakhat dîl che ka duh, mi remtihsak hrâm rawh;” a ti a. Ani chuan, “Eng nge ni a?” a ti a.

¹⁷Adonija chuan, “Khawngaih takin lal Solomona mi biaksak rawh, i thu zawng a hnial âwm si lo va, Sunam mi Abisagi hi nupuiah mi neihtîr teh se,” a ti a.

¹⁸Bathsebi chuan, “Ni e, lal chu ka lo biaksak ang che,” a ti a.

¹⁹Bathsebi chu Adonija biaksak tûrin lal Solomona hnênah a kal a; lal chu amah lo lâwm tûrin a tho va, kûnin chibai a bûk a, lalṭhutthlêngah chuan a ṭhu leh ta a. Lal nu tân ṭhutthlêng dang an rawn la a, a ding lamah chuan an ṭhuttîr a.

²⁰Lal nu chuan, “Thil tê tham tê ka dîl duh che a, min remtihsak hrâm ang che,” a ti a. Lal chuan, “Eng nge ni le? Ka nu, ka remtihsak ngei ang che,” a ti a.

²¹Ani chuan, “Sunam mi Abisagi hi i unaupa Adonija nupui atân pe rawh,” a ti a.

²²Lal Solomona chuan a nu hnênah, “Engtiziaa Sunam mi Abisagi hi Adonija tâna dîl nge i nih? Lalṭhutthlêng pawh hi dilsak ta law law che. Ka u a ni a, a tân te, a lamṭang puithiam Abiathara leh Zeruii fapa Joaba tân te pawh,” a ti a.

²³Lal Solomona chuan LALPA hming chhâlin hetiangin chhia a chham a, “Adonija chuan a thihna tûr a dîl a nih loh nâ chuan Pathianin a tih tihin min ti sela, na tak pawhin,” a ti a.

²⁴“Tûnah, LALPA, a thutiam anga ka pa lalṭhutthlênga min ṭhuttîra min tinghettu, kan chhûngkua lalna min dinsaktu nunna chhâlin ka sawi e, vawiinah Adonija hi tihhlum tûr a ni,” a ti a.

²⁵Lal Solomona chuan Jehoiada fapa Benaia chu a tîr a, Adonija chu a bei a, a va that ta a.

²⁶Lal chuan, Abiathara hnênah, “I khua Anathot-ah haw rawh, thi mai tlâk zawng i ni a; mahse, tûnah zawng ka that rih lo vang che. Ka pa Davida hmaa Engkim LALPA Bâwm i lo zâwn ṭhin avâng leh harsatna a tuarte i tuarpui ve avângin,” a ti a.

²⁷Solomona chuan Abiathara chu LALPA puithiam a nihna a bân a, Elia chhûngte chungchâng Silo khuaa LALPA sawi chu a lo thleng ta a.

²⁸Chu thu chu Joaban a lo hria a, Absaloma lamah a ṭang lo na a, Adonija lamṭang a ni si a. Tichuan, LALPA inah a tlân lût a, maichâm ki a vuan ta a.

²⁹“Joaba chu LALPA puan inah a tlân lût a, maichâm bulah a tawm,” tiin lal Solomona an hrilh a. Solomona chuan Jehoiada fapa Benaia hnênah, “Kal la, va that rawh,” a ti a.

³⁰Benaia chu LALPA puan inah a lût a, Joaba hnênah chuan, “Lalin lo chhuak rawh a ti,” a va ti a. Ani chuan, “Ni lo ve, hetah hian ka thi mai ang e,” a ti a. Benaia chuan, “Joaba chuan hetiangin min lo chhâng e,” tiin lal chu a va hrilh a.

³¹Lal chuan, “A sawi ang chuan va that la, phûm nghâl rawh. Kei leh ka pa chhûngte hi Joaban pawi khawih lo thisen a chhuah lak ata kan fihlîm thei ang.

³²Ka pa Davida hriat lohvin mi pahnih a bei a, khandaihin a that a, LALPA chuan a thisen chhuah man thungrûl rawh se. Chûng mi pahnih, Nera fapa Abnera, Israel sipai hotu leh Jethera fapa Amasa, Juda sipai hotute kha, amah aia ṭha leh tling an ni si a.

³³An thisen chhuah man chu Joaba leh a thlahte lu chungah tla kumkhua rawh se. Davida te, a thlah te, a chhûngkua leh a lalṭhutthlêng te erawh chu LALPA chuan tihmuingîl zêl rawh se,” a ti a.

³⁴Jehoiada fapa Benaia chu a han chho va, Joaba chu a bei a, a that ta a; thlalêra ama inah chuan an phûm ta a.

³⁵Lal chuan Jehoiada fapa Benaia chu sipai hotu ber atân Joaba hmunah a dah a, puithiam Zadoka chu Abiathara ai a awhtîr bawk a.

³⁶Lal chuan Simeia a kohtîr a, a hnênah, “Jerusalem-ah in sa la; tah chuan awm la, khawiah mah kal chhuak suh.

³⁷I chhuaha Kidron ruam i kân ni chu i thih ni a ni mai tih hre rawh; i thisen mawh chu nangman i phur ang,” a ti a.

³⁸Simeian lal hnênah, “Ni e, LALPA, ka puin i sawi ang chuan i chhiahhlawhin a ti zêl ang,” a ti a. Simeia chu Jerusalem-ah a awm ta rêng a.

³⁹Kum thum hnuah chuan Simeia chhiahhlawhte zînga mi pahnih chu Gath khaw lal Maaka fapa Akisa hnênah an tlân a. Miin Simeia hnênah, “I chhiahhlawhte Gath khuaah an awm e,” tiin an hrilh a.

⁴⁰Chu veleh Simeia chuan a sabengtung a thuam a, a chhiahhlawhte chu zawng tûrin Gath khuaa Akisa hnênah a kal ta a. Simeia chuan chhiahhlawhte chu Gath ata a rawn hruai hâwng leh a.

⁴¹Simeia chu Jerusalem aṭangin Gath khuaah a kal a, a lo kîr leh tih Solomona chu an hrilh a.

⁴²Lal chuan Simeia chu a ko va, a hnênah, “Hmun danga i chhuah chuan i kal ni la lain i thi ang tiin LALPA hming chhâlin chhia ka chhamtîr che a, ka hrilh lâwk che a ni lâwm ni? Chutih lai chuan nang pawhin ka hnênah, ‘Ni e, ka zâwm ang e,’ i ti a.

⁴³Engati nge LALPA hnêna i thutiam chu i zawm lohva, thu ka pêk che chu i bawhchhiat?” a ti a.

⁴⁴Lal chuan Simeia hnênah, “Ka pa Davida chunga i sualzia kha i la hre vek a, tûnah LALPA chuan i suahsual man a thungrûl ve ang che.

⁴⁵Kei erawh chu mal min sâwm ang a, Davida lalṭhutthlêng chu LALPA hmaah nghet takin a ding reng ang,” a ti a.

⁴⁶Lal chuan Jehoiada fapa Benaia chu thu a pe a, ani chuan a va bei a, a that ta a. Solomona chu nghet takin a lal ta a.