Read Mizo Lushai LEHKHABU PAKHATNA LALTE 20 Bible Online

LEHKHABU PAKHATNA LALTE 20 - Mizo Lushai bible

LEHKHABU PAKHATNA LALTE 20

¹Suria lal Ben-hadada chuan a sipai rual a khâwm a, lal sawmthum leh pahnihin an sakawr leh tawlailîrte nên an ṭanpui a. Samaria khua an pan a, an bei ṭan ta a.

²Ani chuan khawpui chhûngah mi a tîr a, Israel lal Ahaba hnênah chuan,

³“I hausakna zawng zawng leh in nupui fanaute nên khân inpe rawh u,” tiin a vau va.

⁴Israel lal chuan “Aw lalber ka pu, i sawi ang chuan kei leh ka neih zawng zawng hi i ta a ni e,” a ti a.

⁵Ben-hadada chuan Ahaba hnênah mi a tîr leh a, “In tangkarua leh rangkachak te, in nupui fanau te nên inpe rawh u ka ti tak na a,

⁶naktûk tûn ang hunah ka mite ka rawn tîr zâwk ang e; lal in leh milianhovin an rawn dap ang a, in ro hlu zawng zawng an rawn lâksak ang che u,” a ti a.

⁷Israel lal chuan ram hruaitu zawng zawng a ko khâwm a, an hnênah, “He mi hian mi tihboral a tum tih in hria e, ka nupui leh fanau te, ka tangkarua leh rangkachak te a rawn ngên a, ka lo remti a ni,” a ti a.

⁸Hruaituho leh mipui chuan, “A thu pawisa suh la, a dîl pawh eng mah pe suh,” an ti a.

⁹Ahaba chuan Ben-hadada hnênah mi a tîr a, “Lalber ka pu chu hetiangin va hrilh rawh u, ‘I chhiahhlawh hian i dîl hmasak zâwk chu ka remti a, a hnuhnûng erawh chu ka remti thei lo,’ a ti,” tiin mi tirhte chuan a sawi ang chuan an va sawi a.

¹⁰Ben-hadada chuan hetiangin a rawn sawi lêttîr leh a. “Samaria khua tichhe vek tûrin ka mite tam tak ka rawn tîr ang, eng mah an zuah lo vang. Chutianga ka tih loh vaih chuan pathianten an duh tâwkin min sawisa mai rawh se,” a ti a.

¹¹Israel lal chuan, “Sipai huaisen zawng indo hma ni lovin indo zawhah a nia an uan ṭhin tih va hrilh rawh u,” a ti a.

¹²Ben-hadada leh a ṭanrualpui lalte chuan an puan ina zu an in lai chuan chu thu chu an lo hria a, a sipaite chu khawpui bei tûrin thu a pe a, an insiam ta a.

¹³Chutih lai chuan zâwlnei pakhat hi lal Ahaba hnênah a lo kal a, “LALPA chuan heti hian a ti: ‘Hêng sipai rual tam tak hi hlau reng reng suh, vawiinah i kutah ka pe dâwn a ni; tichuan, LALPA ka ni tih i hria ang,’ a ti,” a rawn ti a.

¹⁴Ahaba chuan, “Tu-in nge ho vang?” a ti a. Zâwlnei chuan, LALPAN heti hian a ti: ‘Ram bung hrang awptu hnuaia sipaiho thlan chhuahten an ho vang,’ a ti,” a ti a. Ahaba chuan, “Tu nge hruai ang?” a ti a. Zâwlnei chuan “Nangin le,” a ti a.

¹⁵Ahaba chuan ram bung hrang hrang awptute hnuaia sipai thothâng ṭha tak takte chu a ko khâwm a, an vaiin zahnih sawmthum pahnih an ni. Israel sipai zawng zawng a ko khâwm leh a, an vaiin sângsarih an ni a.

¹⁶Chhûnah an bei ṭan a, Ben-hadada leh a ṭanrualpui lal sawmthum leh pahnih chu an puan inah an lo rui hle a.

¹⁷Ram bung hrang awptute hnuaia sipai thlante chuan an rawn pan a, Ben-hadada dah râlvêngtu chuan, “Samaria khua aṭangin sipai an lo thawk chhuak e,” a ti a.

¹⁸“Rem thu sawi tûr an ni emaw, min rawn bei tûr an ni emaw a nung chungin lo man rawh u,” a ti a.

¹⁹Ram bung hrang awptute hnuaia sipai thlante chuan an rawn bei a, anmahni zuitu sipai dangte chuan an rawn pui a.

²⁰Mi tinin an bitum chu an that ta ṭheuh va, Suria-ho chu an tlânchhe ta a. Israel-hote chuan an ûm a, Suria lal Ben-hadada chu a sakawr chungchuang mi ṭhenkhat nên an tlân chhuak hrâm a.

²¹Israel lal chuan a va pan a, sakawr leh tawlailîrte chu a bei a, Suria mite chu a that ṭeuh va.

²²Lal Ahaba hnênah zâwlnei chu a lo kal leh a, a hnênah, “Hâwng la, sipai lâk belh sauh sauh rawh, fîmkhur takin thil ruahman ang che, nakkum ṭhâlah Suria lal hian a rawn bei leh dâwn che a ni,” a ti a.

²³Suria lal hnênah a ṭhuihruaite chuan, “Israel Pathiante chu tlângram Pathian an ni a; chuvângin, alâwm kan hneh loh, phaizâwlah bei ila kan hneh ngei ngei ang.

²⁴Lal sawmthum leh pahnihte chu an thuneihna chhuhsak vek la, an aiawhtu tûr hruaitu dang ruat rawh.

²⁵Sipai i hloh zât chiah la thar leh la; chutiang bawkin sakawr leh sakawr-tawlailîrte pawh buatsaih leh ang che. Tichuan, Israel-te chu phaizâwlah kan bei ang a, kan hneh tawh ang,” an ti a. Benhadada chuan an thurâwn ang chuan a ti a.

²⁶A kum leh ṭhalah chuan Ben-hadada chuan a sipaite chu a khâwm a, Israel-te bei tûrin Afek khuaah a chho va.

²⁷Israel-te pawh chu an pung khâwm a, ei tûrte an chhêk a. An lo thawk chhuak a, Suria-ho epah chuan hmun hnihah ṭanhmun an khuar a. Suria-ho lakah chuan Israel-te chu kêlno tlêm tê bawk khâwm ang lek an ni a. Suria-ho erawh chu a ram khahin an khat mup a.

²⁸Zâwlnei pakhat hi Israel lal Ahaba hnênah a lo kal a, “LALPA chuan heti hian a ti: ‘Suria-hovin LALPA chu tlângram Pathian a ni a, phaizâwl Pathian zawng a ni lo an tih avângin hêng sipai tam tak hi i kutah ka pe ang a, nang leh i mite hian LALPA chu ka ni tih in hria ang,’ a ti e,” a ti a.

²⁹Ni sarih chhûng Suria-ho leh Israel-te chu an ṭanhmunah chuan an inep a, a ni sarih ni chuan an inbei ṭan ta a. Israel sipaite chuan Suria sipai nuai khat lai ni khat chhûngin an that a.

³⁰A la dam zawng chu Afek khaw chhûngahte an tlân lût a, kulh bang chimin mi sînghnih leh sângsarih a delh hlum leh a; Ben-hadada chu khawpuiah a tlân lût a, pindan chhûngrilah a biru a.

³¹A hote chuan a hnênah, “Ngai teh, Israel lalte chu an ngilnei hle ṭhîn tih kan hria a, saiip puan vengin kan lu-ah hruizên kan vêt ang a, Israel lal hnênah min va kaltîr la, anin a zuah mial mahna che,” an ti a.

³²Tichuan, saiip puan an fêng a, an nghâwngah hruiin an hlîng a, Israel lal hnênah chuan an va kal a, a hnênah, “I chhiahhlawh ‘Ben-hadada chuan, khawngaih takin min zuah hrâm rawh se,’ a ti e” an ti a. Ahaba chuan, “A la dam a ni maw? Ka unaupa a ni alâwm,” a ti a.

³³Mite chuan ngaihṭha takin, “Aw, i unaupa a ni e,” an lo ti ve var a. Lal chuan, “Va kal ula, rawn hruai rawh u,” a ti a. Ben-hadada chu a lo chhuak a, Ahaba chuan a bulah tawlailîra chuang ve tûrin a sâwm a.

³⁴Ben-hadada chuan, “Ka pain i pa khua a lo lâksakte chu ka pe kîr leh ang che a, ka pain sumdâwnna hmun Samaria khuaa a siam ang khân Damaska khuaah i siam ve dâwn nia,” a ti a. Ahaba chuan, “Chutianga thu i tiam avâng chuan ka chhuah leh ang che,” a ti a.

³⁵Zâwlneiho zînga pakhat hian LALPA thupêkin a zâwlneipui pakhat hnênah, “Mi han vaw teh khai,” a ti a. Ani chuan a vaw duh lo va.

³⁶Zâwlnei chuan, “LALPA thu i awih loh avângin mi kalsan veleh sakeibakneiin a lo seh ang che,” a ti a. Chu mi chu a kal chhuak a, sakeibaknei chuan a lo seh hlum a.

³⁷Zâwlnei chuan mi dang a va hmu a, a hnênah, “Mi han vaw teh,” a ti leh a. Ani chuan na takin a vua a, a sil ta a.

³⁸Zâwlnei chuan a hmêl thup nân a hmai puanin a tuam a, Israel lal lo kal nghâkin kawng sîrah chuan a ding a.

³⁹Lal a lo kal chuan zâwlnei chuan a lo au va, a hnênah, “I chhiahhlawh hi indona hmunah ka kal a, mi pakhat hi a sal man nên a lo kal a, ‘He mi hi vêng rawh, a tlân bo chuan a aiah ka that ang che, anih loh leh tangka zathum i chawi ang,’ min ti a.

⁴⁰I chhiahhlawh hian thil dang ka tih buai laiin ani chu a tlân bo ta daih mai si a,” a ti a. Israel lal chuan, “I thiam lo a nih chu, a mawh chu nangman i phur tûr a ni,” a ti a.

⁴¹Chu veleh zâwlnei chuan a mit tuamna a phelh a, Israel lal chuan zâwlneiho zînga pakhat kha a ni tih a hre ta a.

⁴²Lal hnênah, “LALPA chuan heti hian a ti: ‘Mi thi tûra ka ruat i chhuah avângin a thih ai i thi ang a, a mite tuar ai i miten an tuar ang,’ a ti,” a ti a.

⁴³Israel lal chu thinur ṭeuh leh lunghnûr takin Samaria khuaah a haw ta a.