Read Mizo Lushai LEHKHABU PAKHATNA LALTE 21 Bible Online

LEHKHABU PAKHATNA LALTE 21 - Mizo Lushai bible

LEHKHABU PAKHATNA LALTE 21

¹Jezreel khuaa Samaria lal Ahaba in kiangah chuan Jezreel mi Nabota an tih chuan grep huan a nei a.

²Ahaba chuan Nabota hnênah, “Ka in kianga i grep huan hi thlai huan atân min pe rawh. A aiah grep huan ṭha zâwk ka pe ang che, i duh zâwk phei chuan, a man âwm tâwk tangka ka pe ang che,” a ti a.

³Nabota chuan Ahaba hnênah, “Kan pute hun lai aṭanga kan huan ro a ni a, chutiang han pêk che chu LALPA ngaihin a âwm lo ve,” a ti a.

⁴Jezreel mi Nabotan, “Kan pute huan ro ka pe thei lo vang che,” a tih avângin lunghnûr tak leh thinur ṭeuhvin Ahaba chu a in lamah a hâwng ta a. Bang lam hawiin a khumah a mu a, chaw a ei duh ta lo va.

⁵A nupui Jezebeli chu a va kal a, a hnênah, “Engtizia nge i ngui bûra, chaw i ei duh loh le?” a ti a.

⁶Ani chuan, “Jezreel mi Nabota chu a grep huan leiah ka dîl a, a duh zâwk phei chuan a aiah grep huan dang ka pe ang che ka ti a. Ani chuan, ‘Ka grep huan zawng ka pe lo vang che,’ tiin min chhâng alâwm maw le,” a ti a.

⁷A nupui Jezebeli chuan a hnênah, “Tho la, hlim takin chaw ei rawh, Jezreel mi Nabota grep huan neihsak dân tûr keiman ka ngaihtuahsak ang che,” a ti a.

⁸Tichuan, Ahaba hmingin lehkha a ziak a, a chhinchhiahna a chhu a, Nabota awmna khuaa awm ve upate, rorêltute chu a thawn a.

⁹Heti hian a ziak a, “Chaw nghei ni puang ula, mipui ko khâwmin Nabota chu mipui hmaah ṭhuttîr ula,

¹⁰mi sual pahnih amah hêktu tûr a hma zâwnah ṭhuttîr ula, ‘Pathian leh lal i sawichhia a ni,’ tiin hêk sela, khua ata hnûkchhuak ula, dêng hlum ang che u,” tiin.

¹¹Tin, Nabota chênna khaw upate leh rorêltute chuan Jezebelin tih dân tûr a hrilh ang chuan an ti ta a.

¹²Chaw nghei ni an puang a, mipui an ko khâwm a, Nabota chu a laiah an ṭhuttîr a.

¹³Mi sual pahnih hian, “Pathian leh lal a sawichhia a ni,” tiin an hêk a. Nabota chu khua ata an hnûk chhuak a, an dêng hlum ta a.

¹⁴Jezebeli hnênah chuan, “Nabota chu a thi ta,” tiin an hrilh a.

¹⁵Jezebelin Nabota an dêng hlum ta tih a hriat veleh Ahaba hnênah chuan, “Tho la, Jezreel mi Nabota grep huan, a leitîr phal loh che kha, va neihsak rawh le, ani chu a thi tawh e,” a ti a.

¹⁶Ahaba chuan Nabota a thi tawh tih a hriat chuan a grep huan neihsak tûr chuan a chhuak ta a.

¹⁷ LALPA thu chu Tisbe mi Elija hnênah a lo thleng a,

¹⁸“Tho la, Samaria khuaa awm Israel lal Ahaba hmu tûrin kal tawh. Tûnah Nabota grep huan neihsak tumin chutah chuan a awm e.

¹⁹A hnênah, LALPA chuan heti hian a ti: ‘Nabota tihhlum tâwk ti lovin a huan leh zêl neihsak i tum elo?’ va ti rawh, LALPA chuan heti hian a ti: ‘Ui-in Nabota thisen an liahna hmun ngeiah hian i thisen an liak ang,’ ” a ti a.

²⁰Ahaba chuan Elija hnênah, “Mi hre chhuak ta a ni maw ka hmêlma pa?” a ti a. Elija chuan, “Aw, ka rawn hre ta che a nih hi, LALPA mit hmuha thil dik lo ti tûrin inhralh ta hek che.

²¹I chungah chhiatna ka rawn thlentîr dâwn a ni. In chhûngkuaa mipa fa tawh phawt chu naupang leh tar pawh, nangmah nên ka tiboral vek ang che u.

²²I chhûngkua chu Nebata fapa Jeroboama chhûngkua ang leh Ahija fapa lal Baasa chhûngkua angin ka sawisa ang; min tithinur tûra Israel-te i hruai sual tâk avângin.

²³LALPA chuan Jezebeli chungthu pawh heti hian a ti: ‘Jezreel khawpuiah ui-in a sa an la ei ang. Ahaba chhûngkaw zînga mi khawpuia thi apiang ui-in an ei ang a,

²⁴ramhnuaia thi apiang chunglêng savaten an tlân ang,’ ” a ti a.

²⁵A nupui Jezebeli fuihpawrha LALPA mit hmuha thil ṭha lo ti tûra inpe Ahaba ang hi tu mah an awm rêng rêng lo.

²⁶Israel-te hmaa LALPA hnawh chhuah Amor-ho angin Ahaba hian milemte a bia a, thil tenawm tak tak a ti ṭhîn.

²⁷Elijan chutiang thu a hrilh zawh chuan Ahaban a puan a pawtthlêr a, saiip puan a sin a, chaw a nghei a, saiip puan chungah a mu a, ngui takin a awm ta a.

²⁸LALPA thu chu Tisbe mi Elija hnênah a lo thleng a,

²⁹“Ahaba ka hmaa a inngaihtlâwmzia hi i hria maw? Hetianga a inngaihtlâwm avângin a dam chhûng chuan a chungah chhiatna ka thlentîr lo vang a, a fapa hun chhûngin a chhûngte chungah chhiatna ka thlentîr ang,” a ti a.