Read Mizo Lushai LEHKHABU PAKHATNA LALTE 22 Bible Online

LEHKHABU PAKHATNA LALTE 22 - Mizo Lushai bible

LEHKHABU PAKHATNA LALTE 22

¹Kum thum chhûng chu Suria-ho leh Israel-te chu indo lovin an awm a.

²A kum thum kum chuan Juda lal Jehosafata chu Israel lal Ahaba hnênah a zu kal a.

³Israel lal chuan a upate hnênah, “Gilead rama Ramot khua hi kan ta a ni reng si a, engtizia nge Suria lal hnên ata kan lâk lêt loh?” a ti a.

⁴Jehosafata hnênah chuan, “Ramot khua mi han beihpui peih em?” a ti a. Jehosafata chuan Israel lal hnênah chuan, “Kal i peih hun hunah kei leh ka sipaite chu kan inpeih alâwm, kan pui ang che.

⁵Amaherawhchu, LALPA, i râwn hmasa zet teh ang,” a ti a.

⁶Ahaba chuan zâwlnei zali rual lai chu a ko va, “Ramot khua ka han bei ang em?” tiin a râwn a. Anni chuan, “Bei rawh, LALPA chuan a hnehtîr ang che,” an ti a.

⁷Jehosafata chuan, “Zâwlnei dang, LALPA min râwnsak tûr an awm lâwm ni?” a ti a.

⁸Israel lal chuan Jehosafata hnênah, “Imla fapa Mikaia chu a awm. Ani hian thil ṭha eng mah min hrilh lâwksak ngai lo va, ka ngei hle asin. Thil ṭha lo eng emaw a hril lâwk zêl ṭhîn a ni,” a ti a. Jehosafata chuan, “Lal meuhvin chuti êma tih tûr em ni le?” a ti a.

⁹Lal chuan hotu pakhat a ko va, Mikaia hruai tûrin a tîr a.

¹⁰Lal pahnih chu Samaria khawpui kawngkhâr pâwn hruihah, lalṭhutthlêng an chhawpah chuan an ṭhu a, zâwlnei rual chuan an kal hual a, thu an hril bual bual a.

¹¹An zînga pakhat, Kenaana fapa Zedekia chuan thîr, seki lem a siam a, Ahaba hnênah, “LALPA chuan heti hian a ti: ‘Suria-ho chu hêng hian i bei ang a, i tudawl dêr ang,’ a ti,” a ti a.

¹²Zâwlnei dangte pawh chuan chutiang bawk chuan an ti a, “Kal la, Ramot khua chu han bei rawh, i hneh ngei ang, LALPA chuan a hnehtîr ang che,” an ti a.

¹³Mikaia hruaitu tûra an tirh chuan a hnênah, “Zâwlnei dang zawng zawngin a ṭha lamin lal hnênah thu an puang a, nang pawhin chutiang chuan ti ve mai ta che,” a ti a.

¹⁴Mikaia chuan, “LALPA, mi nung hming chhâlin ka sawi e, LALPA chuan sawi tûra min tih chauh ka sawi ang,” a ti a.

¹⁵Lal Ahaba hnên a va thlen chuan lal chuan, “Mikai, Gilead rama Ramot khua hi kan han bei ang nge bei lo vang?” a ti a. Mikaia chuan, “Han bei teh rêng u, in hneh mawlh ang, LALPA chuan hnehtîr che u ang hmiang,” a ti a.

¹⁶Ahaba chuan, “LALPA hminga ka hnêna thu i sawiin thu dik chauh min hrilh rawh vawi eng zât nge ka tih dâwn che,” a ti a.

¹⁷Mikaia chuan, “Vêngtu nei lo berâm angin Israel mite chu tlânga an darh chum chum ka hmu, LALPA chuan heti hian a ti: ‘Hêng mite hian hruaitu an nei lo, thlamuang takin mahni in lamah hâwng mai rawh se,’ a ti e,” a ti a.

¹⁸Ahaba chuan Jehosafata hnênah, “Ngai ta che, ka tâna thil ṭha tûr eng mah a sawi ngai lo tih ka hrilh che kha, thil ṭha lo lam hlîr a ni a sawi ṭhin,” a ti a.

¹⁹Mikaia chuan a sawi zêl a, “LALPA thu hi lo ngaithla teh. Vâna a lalṭhutthlêngah LALPA ṭhu ka hmu a; Vântirhkohte chuan an din hual a.

²⁰‘Tu nge Ahaba hnênah zu chhuk ang a, Ramot beia thi tûrin zu bum ang?’ LALPA chuan a ti a. Vântirhkoh ṭhenkhat chuan thu khat an sawi a, a dangin thu dang an sawi bawk a.

²¹Thlarau pakhat hi a lo kal a, LALPA hmaah chuan a va ding a, ‘Ka zu bum ang e,’ a ti a.

²²LALPA chuan, ‘Engtin nge i bum ang?’ a ti a. Thlarau chuan, ‘Ka zu kal ang a, Ahaba zâwlneite chu dâwt ka hrilh ang,’ a ti a. LALPA chuan, ‘Kal la, zu bum rawh, i hlawhtling ngei ang,’ a ti a.”

²³Mikaia chuan, “Chutiang chu a ni, LALPA chuan hêng zâwlneite hi i hnênah dâwt a sawitîr a ni, LALPA ngeiin i chhiatna tûr a ruat tawh a ni e,” a ti a.

²⁴Zâwlnei Zedekia chuan Mikaia chu a pan a, a bêng a, “Engtik lai khân nge LALPA thlarauvin min kalsana, i hnêna thu a sawi tâk le?” a ti a.

²⁵Mikaia chuan a chhâng a, “Pindan chhûngrila i bihrûk hunah i hre mai ang,” a ti a.

²⁶Ahaba chuan hotu pakhat hnênah, “Mikaia kha man la, khaw awptu Amona hnênah hruai la, Lal fapa Joasa pawh hmuhtîr rawh u.

²⁷Dam têa ka lo kîr leh hma chu ripah khung sela, chhang leh tui chauh pe rawh se,” a ti a.

²⁸Mikaia chuan, “Nungdama i lo haw chuan LALPA hian mi be lo a ni ang. Ka sawi hi mi tinin hre rawh se,” a ti a.

²⁹Lal Ahaba leh lal Jehosafata chu Gilead biala Ramot khua bei tûr chuan an kal ta a.

³⁰Ahaba chuan Jehosafata hnênah, “Kan inbeih hunah, ka inchei danglam ang a, nang chu lal incheiin inchei zêl ang che,” a ti a. Lal Ahaba chu a inchei danglam a, inbeihnaah chuan a tel ve ta a.

³¹Suria lal chuan tawlailîr khalhtu hotu sawmthum leh pahnih chu, “Israel lal chauh lo chu tu mah bei suh ang che u,” a ti a.

³²Chûngho chuan Jehosafata an hmuh chuan Israel lal emaw an ti a, an rawn bei ta a. Jehosafata chu a au chiam a,

³³Tawlailîr khalhtu hotu chuan Israel lal a ni lo tih a hre ta a, a rawn ûm duh ta lo va.

³⁴Suria sipai thal kâp mai mai hian lal Ahaba chu a râlthuam inkârah a kâp fuh palh a. A tawlailîr khalhtu hnênah chuan, “Hliam ka tuar e, lêt la, inbeihna hmun ata tlân chhuak rawh,” a ti a.

³⁵An inbeih mup mup lai chuan Ahaba chu a tawlailîr bang nghêngin Suria mite lam hawiin an tung a. Thisen chu tawlailîr chhuata tling rui khawpin a chhuak a, tlai lamah chuan a thi ta a.

³⁶Ni tlâk dâwn ruai chuan Israel sipai zawng zawng hnênah thu a lo thleng a, “Mi tin mahni khaw lamah hâwn vek tûr,” an ti a.

³⁷Lal Ahaba chu a thi ta a, a ruang chu Samaria khuaah an hâwnpui a, an phûm ta a.

³⁸A tawlailîr chu nawhchizuarte insilna ṭhin Samaria dîlah chuan an sil fai a; uite chuan a thisen chu an liak a, LALPA sawi ang chu a lo thleng ta a ni.

³⁹Lal Ahaba thiltih dangte, a lal in sainghova a chei dân te, khawpui a din ṭan te chu Israel lalte chanchin ziakna buah a chuang a.

⁴⁰A thih hnu chuan a fapa Ahazia chu a aiawhin a lal ta a.

⁴¹Israel lal Ahaba lal kum linaah Asa fapa Jehosafata chu Judai ramah a lal ṭan a,

⁴²Jehosafata chu a lal tirh chuan kum sawmthum leh panga a ni. Jerusalem-ah kum sawmhnih leh panga chhûng ro a rêl a. A nu chu Azubi, Silhia fanu a ni.

⁴³A pa angin Pathian mit hmuha thil ṭha a ti ṭhîn. Milem biakna hmunsâng erawh chu a tichhe lo va; chuvângin, mipuite chu hmunsângahte chuan an la inthawi reng a, rimtuite an hâl ṭhîn.

⁴⁴Jehosafata chu Israel lal nên an inrem a.

⁴⁵Jehosafata thil tih dang, indonaa a huaisenzia te chu Juda lalte chanchin ziakna buah a chuang a.

⁴⁶A pa Asa dam laia mipa leh hmeichhia milem biakna hmuna inzuar ṭhînte chu a tibo vek a.

⁴⁷Edom ram chuan lal an nei lo va, Juda lalin a aiawhtu a dah a.

⁴⁸Ofir rangkachak phur tûrin lal Jehosafata chuan lawng rual a siam a; mahse, Ezion-geber-ah a chhiat tâk avângin an zin ngai ta lo.

⁴⁹Israel lal Ahazia chuan a mite chu Jehosafata mite nên zin ho se a ti a; mahse, Jehosafata chuan a duh lo va.

⁵⁰Jehosafata chu a thi ta a, Davida khawpuia lalho thlânah an phûm a, a fapa Jehorama chu a aiawhin a lal ta a.

⁵¹Juda lal Jehosafata lal kum sâwm leh pasarih kumin Ahaba fapa Ahazia chu Israel-te chunga ro rêl tûrin Samaria khuaah a lo lal a. Kum hnih chhûng ro a rêl a.

⁵²LALPA duh loh zâwng thil sual a ti a; a pa Ahaba te, a nu Jezebeli te, lal Jeroboama te ang bawkin thil sual a ti a, Israel-te hruai sualtu a ni.

⁵³A pu ang bawkin Baal pathian rawng a bâwl avângin Israel-te Pathian, LALPA chu a tithinur hle a.