Read Mizo Lushai LEHKHABU PAKHATNA LALTE 3 Bible Online

LEHKHABU PAKHATNA LALTE 3 - Mizo Lushai bible

LEHKHABU PAKHATNA LALTE 3

¹Solomona chuan Aigupta lal Farawa nên inkûngkaih nân a fanu chu nupuiah a nei a; lal in te, Tempul te, Jerusalem khaw kulh bangte a siam zawh hma chuan a nupui chu Davida khawpuiah a dah a.

²Mite chu hmunsângahte an inthawi ṭhîn a, LALPA Tempul sak a la nih rih loh avângin.

³Solomona chuan LALPA chu a hmangaih a, a pa Davida zirtîrnate chu a zâwm a; mahse, hmunsângahte thilhlante a hlân a, rimtui te a hâl ṭhîn.

⁴Lal chu thilhlan hlân tûrin Gibeon-ah a kal a, chu chu thilhlanna hmunpui ber a ni. Solomonan chuta maichâmah chuan hâlral thilhlan atân ran sângkhat zet a hlân a.

⁵Gibeon-ah chuan Solomona mangah LALPA chu a inlâr a, Pathian chuan, “I duh apiang min dîl rawh, ka pe ang che,” a ti a.

⁶Solomona chuan, “I chhiahhlawh Davida, ka pa chu i lakah a rinawm a, dik tak leh thinlung thianghlim taka a awm avângin i ngaina êm êm ṭhîn a, a chunga i ngilneihna nasa tak avângin tûnah a lalṭhutthlênga ṭhu tûr fapa i pe a.

⁷Tûnah hian, aw LALPA ka Pathian, i chhiahhlawh hi ka pa Davida aiawhin min laltîr a, kei lah naupang mai ka ni a, ka tih tûr hlen chhuah dân pawh ka hre si lo.

⁸I chhiahhlawh hi i mi, i thlan, eng zât nge an nih pawh hriat lohte chungah lalah mi siam a.

⁹Thu dik leh dik lote thliara fel taka i mite ro ka rêlsak theih nân i chhiahhlawh hi finna pe ang che. Chuti lo zawng, mi heti zozai hi ro ka rêlsak thei lo vang,” a ti a.

¹⁰Solomona thil dîl avâng chuan LALPA chu a chungah a lâwm ta hle a.

¹¹Pathian chuan a hnênah, “Dam reina te, hausakna te, i hmêlmate thihna tûr dîl lovin dik taka rorêl thiamna i dîl zâwk avângin,

¹²i dîl chu ka pe ang che, i hmaa mi tu ma neih ngai loh i hnua mite pawhin an neih loh tûr finna leh rorêl thiamna ka pe ang che.

¹³I dîl loh hausakna leh hmingthanna ka pe bawk ang che. I dam chhûngin lal tu mahin an tluk lo vang che.

¹⁴I pa Davida anga ka kawngte i zawha, ka thuruat leh ka thupêkte i zawm chuan rei tak ka damtîr ang che,” a ti a.

¹⁵Solomona chu a lo harh a, a mumangah Pathianin thu a sawi a ni tih a hria a. Jerusalem-ah a lo hâwng a, LALPA Thuthlung Bâwm hmaah a ding a, hâlral thilhlante leh remna thilhlante a hlân a, a chhiahhlawh zawng zawng tân ruai a ṭheh a.

¹⁶Ni khat chu nawhchizuar pahnih lal hnênah an lo kal a, a hmaah an ding a.

¹⁷Pakhat chuan, “Ka pu, he hmeichhia nên hian in khatah kan chêng dûn a; chuta kan awm lai chuan nau ka nei a.

¹⁸Ka nau neih aṭanga ni thum niah he hmeichhia hian nau a hring ve a. Chu inah chuan tu mah dang an awm lo va, kan pahnih chauhvin kan awm dûn a ni.

¹⁹Zânah he hmeichhia hian a fapa chu a delh hlum a.

²⁰Zan laiah a tho va, i bawihnu hi ka muthilh laiin ka fapa, ka kianga mu chu, a la a, a pawm ta a, a fapa thi chu mi pawmtîr ta a ni.

²¹Zînga hnute pe tûra ka han thawh chuan nautê thi chu ka hmu a, ka han en chian chuan ka fapa, ka hrina kha a ni ta hauh lo mai a,” a ti a.

²²Pakhat zâwk chuan, “Ni lo, a dam zâwk hi ka fapa a ni a, a thi hi i fapa a ni,” a ti a. A hmasa zâwk chuan, “Ni lo, a thi hi i fapa a ni a, a dam zâwk hi ka fapa a ni,” a ti tlat a. Chutiang chuan lal hmaah an inhnial a.

²³Lal chuan, “He nu hian, ‘A dam zâwk kha ka fapa a ni a, a thi kha i fapa a ni,’ a ti a. Ani lah hian, ‘Chutiang a ni lo, a thi zâwk hi i fapa a ni a, a dam hi ka fa zâwk a ni,’ a ti si a.

²⁴Khandaih mi han pe teh u,” a ti a.

²⁵Khandaih chu an han pe a, lal chuan, “Naute la dam chu bung hnihah chhuah ula, a chanve pakhat pe ula, a chanve dang chu hmeichhe pakhat kha pe rawh u,” a ti a.

²⁶Naupang dam zâwka nu chuan a fapa chu a lainat êm avângin lal hnênah chuan, “Ka pu, khawngaih takin nautê chu he mi hi pe mai rawh; that lul suh ang che,” a ti a. Pakhat zâwk chuan, “Bung hnihah chhuah mai rawh, tu mah mahin kan chang lo mai ang,” a ti a.

²⁷Lal chuan hetiangin thu a rem ta a; “Nausên dam chu he nu, thu rawn sawi hmasatu hi pe rawh u, that suh u, hei hi a nu tak a ni e,” a ti a.

²⁸Israel mi zawng zawngin lal thurem chu an hriatin lal chu an zah ta hle a, Pathianin dik taka rorêl thiamna a pe tih an hria a.