Read Mizo Lushai LEHKHABU PAKHATNA LALTE 4 Bible Online

LEHKHABU PAKHATNA LALTE 4 - Mizo Lushai bible

LEHKHABU PAKHATNA LALTE 4

¹Lal Solomona chu Israel mi zawng zawng lal a ni a.

²Hêng hi a miliante chu an ni: An puithiam chu Zadoka fapa Azaria a ni.

³Ziaktu lian chu Elihorefa leh Sisa fapa Ahija an ni. Ahiluda fapa Jehosafata chu chanchin ziaktu a ni.

⁴Jehoiada fapa Benaia chu sipai hotu a ni. Zadoka leh Abiathara te chu puithiam an ni.

⁵Nathana fapa Azaria chu ram bial ṭhen enkawltute chunga hotu ber a ni. Nathana fapa Zabuda chu lal puithiam leh lal kaiza vêngtu a ni.

⁶Ahisara chu lal in enkawltu a ni a; Abda fapa Adonirama chu hnathawka rawih luihte hotu a ni.

⁷Solomona chuan Israel ram pum pui chu bial sâwm leh pahnihah a ṭhen a, an chungah hotu a ruat vek a. Chûngte chuan lal tân leh lal chhûngkaw tân ei tûr an pe ṭhîn. Hotu pakhatin thla khat chhûng tumin kum tluanin ei tûr an tumsak ṭhîn.

⁸Hêng hi hotute hming leh an thawhna bial hming chu a ni: Efraim tlângramah Ben-Hura.

⁹Makaz te, Salbim te, Beth-semes te, Elon te leh Beth-hanan khaw hotu chu Ben-dekera a ni.

¹⁰Arubot leh Soko te leh Hefer ram zawng zawng nêna enkawltu chu Ben-heseda a ni.

¹¹Dor bial pum enkawltu chu Ben-Abinadaba a ni. Ani chuan Solomona fanu Tafati nupuiah a nei a.

¹²Tanak leh Megido te, Zerethan dep Jezreel hnuai, Beth-sean aṭanga Abel Mehola leh Jokmeam thlengin, Beth-sean ram pum nêna enkawltu chu Ahiluda fapa Baana a ni.

¹³Gilead rama Ramot khua te, Manasea thlah, Jaira chhûngte chênna khua Gilead rama mi te, Basan ram, Argob biala kulh leh dâr tlâwn kawngkhâr kalhna nei khaw sawmruk te enkawltu chu Ben-gebera a ni.

¹⁴Mahanaim bial enkawltu chu Idoa fapa Ahinadaba a ni.

¹⁵Naftali bial enkawltu chu Ahimaaza a ni. Ani chuan Solomona fanu Basemathi nupuiah a nei a.

¹⁶Aser leh Bealoth bial enkawltu chu Husaia fapa Baana a ni.

¹⁷Isakar bial enkawltu chu Parua fapa Jehosafata a ni.

¹⁸Benjamin bial enkawltu chu Ela fapa Simeia a ni.

¹⁹Gilead ram, Amor lal Sihona ram Gilead te, Oga ram Basan te huama enkawltu chu Uria, Gebera fapa a ni. Hêng mi sâwm leh pahnih bâkah a ram pum pui chunga hotu pakhat a la awm bawk.

²⁰Juda-te leh Israel-te chu tuifinriat kama ṭiau zât zetin an tam a. An eiin an in a, an hlim hle a.

²¹Solomona chuan Eufretis lui aṭanga Aigupta ram dep Filistia ram thlengin ro a rêl a. Chûng lai ram zawng zawng chuan Solomona hnênah chhiah an pe a, Solomona dam chhûng chu a khua leh tui an ni.

²²Solomona ni khat ei ral chu chhangphut ṭha chi kg. sângnga, chhangphut narân kg. sîngkhat;

²³ran châwm thau sâwm, rama tla ṭhîn bâwngpa sawmhnih, berâm za leh sakhi te, sazuk te, saza te, âr châwm thau te a ni.

²⁴Solomona chuan Eufretis luipui khawthlang Tifsa khua aṭanga Gaza thlengin ro a rêl a. A chhehvêla ram dangte nên an inrem a.

²⁵Solomona dam chhûng chuan Juda-te leh Israel-te chu Dan aṭanga Beer-seba thlengin mi tin mahni grep huanah leh theipui hmunah thlamuang takin an awm a.

²⁶Solomona chuan tawlailîr hnûktu sakawr sîngli leh sakawr chungchuang mi sîngkhat leh sânghnih a nei a.

²⁷Ramawptute chuan mahni chan thla ṭheuhvah lal Solomona leh a dawhkâna chaw kîltute tân ei tûr an ngaihtuah a, eng mah an tlachham ngai lo.

²⁸Chûng mite chuan a indawtin sakawr te, tawlailîr hnûk sakawrte tân an tla tâwk buhpâwl leh barli an rawn pe ṭhîn.

²⁹Pathianin Solomona chu finna leh hriatna thûk tak a pe a, rilru zau tak, chhui chhuah rual loh khawp a pe bawk.

³⁰Solomona chu khawchhak mi fingte leh Aigupta mi fingte aiin a fing a.

³¹Khawvêla mi fing ber a ni. Ezra mi Ethana te, Mahola fa Hamana te, Kalkola te leh Darda te aiin a fing zâwk a, a chhehvêl ram tinah a hming a thang hle a.

³²Thufing sângthum a siam a, hla sângkhat leh panga a phuah a.

³³Thlai chanchin, Lebanon tlânga sidar thing aṭanga kulh banga ṭo husop chenin a zir vek a. Ramsa te, sava te, bawkvâka kal leh sangha chanchin te pawh a hre hle a ni.

³⁴Khawvêla lal zawng zawng chuan Solomona finzia zir tûrin an mite a hnênah an tîr ṭhîn.