Read Mizo Lushai LEHKHABU PAKHATNA LALTE 5 Bible Online

LEHKHABU PAKHATNA LALTE 5 - Mizo Lushai bible

LEHKHABU PAKHATNA LALTE 5

¹Tura lal Hirama chuan Solomona chu a pa Davida aiawh tûra hriakthih a ni tih a lo hriatin a hnênah palai a tîr a. A pa Davida nên an lo inṭhian si a.

²Solomona chuan Hirama hnênah hetiangin thu a thawn lêt a:

³“Ka pa Davida kha, a chhehvêl ramte nên an indo ṭhîn a, LALPA chuan a hmêlmate a hnehtîr vek hma chuan, LALPA, a Pathian a biakna tûr Tempul a sa thei lo tih i hria.

⁴Tûnah, LALPA, ka Pathianin kan chhehvêl ramte nên min inremtîr a, hmêlma leh min tibuaitu tûr an awm ta lo.

⁵LALPA chuan ka pa Davida hnênah, ‘I fapa, lalṭhutthlêng luahtu tûr chuan ka hming chawimawi nân Tempul a la sa ang,’ tia a lo tiam tawh angin LALPA, ka Pathian hming ropui nân Tempul sak ka tum ta a ni.

⁶Tûnah, Lebanon tlânga sidar thing mi rawn pe tûrin thu pe rawh; ka mite leh i miten thawk ho sela, i mite chu i tih zât zât hlawh ka lo pe ang e. Sidon mite anga thing kih thiam tu mah ka nei lo tih i hre si a,” a ti a.

⁷Hiraman Solomona thu a lo hriat chuan a lâwm hle a, a hnênah, “He hnam ropui tak chunga rorêl tûra fapa fing tak Davida hnêna petu LALPA chu vawiin hian fakin awm rawh se,” a ti a.

⁸Hirama chuan Solomona hnênah, “I thu mi chah chu ka lo hria a, sidar thing leh fâr thing chu i duh zât zât ka pe ang che.

⁹Ka mite chuan thing chu Lebanon tlâng aṭangin tuifinriatah an rawn hnûk thla ang a, an têl khâwm ang a, dahna tûr i tih hmunah an rawn tawlh thleng ang a, chutah chuan an phelh darh hnuah i mite chuan an lo la dâwn nia. Nang pawhin ka mite hi ei tûr i lo tumsak ve a ni ang chu,” a ti a.

¹⁰Hirama chuan sidar leh fâr thing a mamawh zât chu a lo pe ta a.

¹¹Solomona pawhin Hirama chu chhangphut ṭin nuai li leh oliv hriak ṭha chi ṭin zali a mite ei atân a pe a. Chutiang chuan kum tin Solomona chuan Hirama chu a pe a.

¹²A lo tiam tawh angin LALPA chuan Solomona chu finna a pe a, Hirama leh Solomona inlaichînna chu a ṭha hle a, inremna thu an thlung a.

¹³Solomona chuan Israel ram pumah hna thawka rawih luih pâwl a siam a, chûng chu mi sîngthum lai an ni.

¹⁴Adonirama chu chûngho enkawltu chu a ni. Anni chu pâwl thumah a ṭhen a, a inchhâwkin sîngkhat zêl Lebanon-ah thla khat chhûng an han thang a, thla hnih in lamah an awm leh ṭhîn.

¹⁵Solomona chuan thuamphur mi sîngsarih leh lung chher mi sîngriat tlângramah chuan a nei a.

¹⁶Chûng bâkah hnathawkho vêngtu mi sângthum leh zathum a nei bawk.

¹⁷Lal thupêk ang chuan lung ṭha chi lian tak tak Tempul lungphûma rem tûr an rawn la a.

¹⁸In satuho Solomona mi te, Hirama mi te leh Biblos khuaa mi te chuan lung te, thing te chu Tempul hmanrua atân an buatsaih ta a.